ក្រសួងកសិកម្ម គ្រោងបង្កើត QR Code ផ្លែឈើខ្មែរ បង្ការការក្លែងបន្លំ

ក្រសួងកសិកម្មរុក្ខាប្រមាញ់ និងនេសាទ គ្រោងបង្កើត ​ស្ទីកឃ័រកំណត់ប្រភពកសិផលកម្ពុជា​ក្នុងទម្រង់ជា​ QR Code​ ដើម្បីបង្ការការក្លែងបន្លំប្រភព​កសិផលកម្ពុជា​ ក៏ដូចជាបង្កើន​ទំនុក​ចិត្តរបស់អ្នកទិញ​ និងអ្នកទទួលទាន។ នេះបើតាម លោក ឌិត ទីណា រដ្ឋមន្ត្រីក្រសួងកសិកម្ម បានបញ្ជាក់ក្នុងពេលជួបជាមួយកសិករដាំទុរេន នៅឃុំអូរសោម ស្រុកវាលវែង​ ខេត្តពោធិ៍សាត់នៅថ្ងៃទី ២៤ ខែឧសភា ឆ្នាំ ២០២៥។

លោករដ្ឋមន្ត្រី ឌិត ទីណា បានចុះជួបកសិករ ដើម្បីក្តាប់ស្ថានភាពផលិតកម្ម​ទុរេន ស្តាប់ការសំណូមពរ​ និងផ្តល់ការគាំទ្រចាំបាច់។

កសិករដាំទុរេននៅឃុំអូរសោមទទួលបាន​ប្រាក់ចំណេញ​ច្រើន​ និងកំពុងបង្កើន​ការដាំដុះ​បន្ថែម ដើម្បី​ត្រៀមផ្គត់ផ្គង់ទៅទីផ្សារប្រទេសចិន​ នាពេលខាងមុខ​ ក្រោយពីរាជរដ្ឋាភិបាល​សម្រេចបាន​ការបើក​ទីផ្សារដើម្បីនាំចេញទុរេនកម្ពុជា​ទៅប្រទេសចិន​ កាលពីខែមេសាកន្លងទៅ។

ជាក់ស្តែង​ កសិករមួយរូបដែល​មានផ្ទៃដីដាំដុះទុរេនចំនួន ៣០ហិកតា​ អះអាងថា លោកអាចរក​បានប្រាក់ចំណេញប្រមាណ​ ២៥ ម៉ឺន​ដុល្លារ​ ក្នុងមួយឆ្នាំ។

ជាមួយគ្នានេះ​ កសិករមួយរូបទៀត​កំពុងសាងសង់ឃ្លាំងវេចខ្ចប់ទុរេនអូរសោម​ ដើម្បីសាកល្បងនាំចេញទៅប្រទេសចិន​ នាពេល​ខាងមុខផងដែរ។

លោករដ្ឋមន្ត្រីបានលើកទឹកចិត្តបងប្អូនកសិករដាំទុរេនឱ្យអនុវត្តកម្មវិធីកសិកម្មល្អ​ឱ្យបានខ្ជាប់ខ្ជួន​ដើម្បីរក្សាកេរ្តិ៍ឈ្មោះល្អរបស់ទុរេនកម្ពុជា​ ហើយក្រសួងនឹងផ្តល់ការគាំទ្រចាំបាច់​ រួមមានការចុះ​បញ្ជី​ចម្ការ​ ការប្រើប្រាស់ជី និងថ្នាំកសិកម្មឱ្យមានប្រសិទ្ធភាព​ ព្រមទាំងការចាត់មន្ត្រីចុះមកពិនិត្យ​ និងវាយតម្លៃការរៀបចំឃ្លាំងវេចខ្ចប់ទុរេនសម្រាប់នាំចេញនេះឱ្យត្រូវតាមស្តង់ដារដែលប្រទេសចិនតម្រូវ៕