ព័ត៌មានអន្ដរជាតិ

ថៃ៖ ការគំរាមកំហែងអ៊ិនធឺរណិតសម័យ AI កើនឡើង ដល់ជាង ១ ០០០ ករណី ៥ខែដើមឆ្នាំ

បានផុស

១ year មុន

នៅ

ថ្ងៃព្រហស្បតិ៍ ១៩ មិថុនា ២០២៥

ដោយ

ប្រទេសថៃកំពុងមើលឃើញពីកំណើននៃក្ដីបារម្ភផ្នែកសន្តិសុខអ៊ិនធឺរណិត ដោយការគំរាមកំហែងអ៊ិនធឺណិតកាន់តែកើនឡើងទាំងចំនួន និងភាពទំនើប ក្នុងសម័យបញ្ញាសិប្បនិម្មិត (AI) នាពេលបច្ចុប្បន្ន។ នេះបើតាមការចុះផ្សាយរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចន្លោះពីខែមករា ដល់ខែឧសភា ឆ្នាំ ២០២៥ ទីភ្នាក់ងារសន្តិសុខអ៊ិនធឺណិតជាតិថៃ (NCSA) បានកត់ត្រាពីការគំរាមកំហែងអ៊ិនធឺណិតជាង ១ ០០០ ករណី ខណៈពិភពលោករំពឹងពីកំណើនឧក្រិដ្ឋកម្មអ៊ិនធឺណិតនៅឆ្នាំនេះ ដោយបង្កការខាតបង់រហូតដល់ ៧ ទ្រីលានដុល្លារសហរដ្ឋអាមេរិក។

របាយការណ៍ Cloudflare Signals បានបង្ហាញពីនិន្នាការដ៏គួរឱ្យព្រួយបារម្ភ ដោយក្រុមហ៊ុននេះ បានបិទផ្លូវការវាយប្រហារបែប DDoS (Distributed Denial of Service) ជាង ២០,៩ លានករណី កាលពីឆ្នាំមុន ដោយកើនឡើង ៥០ ភាគរយ។ ក្នុងប្រទេសថៃ ៦៣ ភាគរយ អង្គការស្ថាប័ន បានប្រឈមមុខនឹងការលួចទិន្នន័យ ហើយជាងពាក់កណ្តាលក្នុងនោះ ត្រូវបង់ថ្លៃលោះ ដែលនេះបង្ហាញពីបញ្ហាធ្ងន់ធ្ងរ។

ទោះបីជារដ្ឋាភិបាលថៃ បានដាក់ឈ្មោះឆ្នាំ ២០២៥ ជា «ឆ្នាំនៃសន្តិសុខតាមអ៊ិនធឺណិត» ក្ដី វាច្បាស់ណាស់ថា សុវត្ថិភាពតាមអ៊ិនធឺណិតមិនមែនគ្រាន់តែជាបញ្ហាផ្នែកព័ត៌មានវិទ្យាប៉ុណ្ណោះទេ ដោយថ្នាក់ដឹកនាំអាជីវកម្ម ក៏ត្រូវទទួលខុសត្រូវផងដែរ។

ឥឡូវនេះ ឧក្រិដ្ឋជនតាមអ៊ិនធឺណិតប្រើប្រាស់ AI ដើម្បីបើកការវាយប្រហារលឿន និងឆ្លាតជាងមុន ដូចជាការលួចព័ត៌មានសម្រាប់ការ «Login» និងដំណើរការវាយប្រហារ DDoS ដែលប្រើ «បត» (bot) ជាដើម។ Bots ដំណើការ ៩៤ ភាគរយ នៃការប៉ុនប៉ង Login ដោយប្រើពាក្យសម្ងាត់ដែលគេលួចបាន ខណៈ «AI បង្កើត» ត្រូវបានប្រើប្រាស់ដើម្បីបង្កើតអត្តសញ្ញាណក្លែងក្លាយ ដែលមើលទៅដូចពិតប្រាកដ។

ដើម្បីទប់ទល់ ក្រុមហ៊ុននានាត្រូវការប្រព័ន្ធការពារដែលដំណើរការដោយ AI ដូចជា ការចាប់យកការគំរាមកំហែងដោយស្វ័យប្រវត្តិ និងប្រព័ន្ធសុវត្ថិភាពឆ្លាតវៃ ជាដើម។

ក្រៅពី AI និងលក្ខខណ្ឌផ្សេងទៀត របាយការណ៍របស់ Cloudflare បាននិយាយថា ភាពតានតឹងភូមិសាស្ត្រនយោបាយ ក៏រួមចំណែកដល់ឧក្រិដ្ឋកម្មអ៊ិនធឺណិតផងដែរ ដោយ «ការវាយប្រហារតាមអ៊ិនធឺណិតឧបត្ថម្ភដោយរដ្ឋ» កំពុងរំខានដល់ឧស្សាហកម្មផ្សេងៗកាន់តែខ្លាំងឡើងៗ និងបង្ហាញពីភាពងាយរងគ្រោះសំខាន់ៗនៅក្នុងខ្សែច្រវ៉ាក់ផ្គត់ផ្គង់សកល៕