ទំនុកចិត្តអ្នកប្រើប្រាស់ថៃ ធ្លាក់ចុះទាបបំផុតក្នុងរយៈពេល ៤ ឆ្នាំ ដោយសារសម្ពាធសេដ្ឋកិច្ច

សន្ទស្សន៍ទំនុកចិត្តអ្នកប្រើប្រាស់ថៃ​ (CCI) ប្រចាំខែឧសភា បានធ្លាក់ចុះមកត្រឹម ៤៩,៥ ពិន្ទុ ​ដែលជាកម្រិតទាបបំផុតចាប់តាំងពីខែធ្នូ ឆ្នាំ២០២២ ចំពេលសេដ្ឋកិច្ចថៃបន្តរងសម្ពាធ។ នេះបើតាមការចុះផ្សាយរបស់កាសែតបាកកប៉ុស្តិ៍កាលពីសប្ដាហ៍មុន ដោយស្រង់ទិន្នន័យពីសាកលវិទ្យាល័យសភាពាណិជ្ជកម្មថៃ (UTCC)​។

មជ្ឈមណ្ឌលព្យាករណ៍សេដ្ឋកិច្ច និងពាណិជ្ជកម្មរបស់សាកលវិទ្យាល័យ បាននិយាយថា ការធ្លាក់ចុះនៃទំនុកចិត្តអ្នកប្រើប្រាស់នេះ ភាគច្រើនបណ្តាលមកពីការព្រួយបារម្ភអំពីសង្គ្រាមនៅមជ្ឈិមបូព៌ា និងតម្លៃប្រេងខ្ពស់ថេរ​ ដែល​រំពឹងថានឹងជះឥទ្ធិពលដល់កំណើនសេដ្ឋកិច្ចរបស់​ថៃ និងបង្កើន​ការចំណាយសម្រាប់ការរស់នៅ។

សន្ទស្សន៍​វាស់ស្ទង់ទំនុកចិត្តលើសេដ្ឋកិច្ចទាំងមូល ឱកាសការងារ និងប្រាក់ចំណូលនាពេលអនាគតមានចំនួន ៤៣,១ ពិន្ទុ ៤៧,៥ ពិន្ទុ និង ៥៧,៩ ពិន្ទុ រៀងគ្នា​ ដោយ​បន្តស្ថិតនៅក្រោមកម្រិតស្តង់ដារ ១០០ ពិន្ទុ។ នេះបង្ហាញ​កង្វះទំនុកចិត្តជាបន្តបន្ទាប់ក្នុងចំណោមអ្នកប្រើប្រាស់លើទស្សនវិស័យសេដ្ឋកិច្ចថៃ ការរំពឹងទុកពីការងារ និងប្រាក់ចំណូលនាពេលអនាគត។

សាកលវិទ្យាល័យ UTCC រំពឹងថា អ្នកប្រើប្រាស់ថៃនឹង​បន្ត​ប្រុងប្រយ័ត្នចំពោះការចំណាយពេញមួយឆមាសទី១នៃឆ្នាំនេះ ខណៈ​ពួកគេកំពុងរង់ចាំភាពច្បាស់លាស់​នៃស្ថានការណ៍នៅ​មជ្ឈិមបូព៌ា។

អ្នកប្រើប្រាស់ថៃក៏កំពុងតាមដានយ៉ាងដិតដល់នូវវិធានការរបស់រដ្ឋាភិបាល ដើម្បីកាត់បន្ថយផលប៉ះពាល់នៃជម្លោះ និង​កំណើន​តម្លៃថាមពល ​ក្នុងចំណោមគោលនយោបាយសេដ្ឋកិច្ចផ្សេងៗទៀតផងដែរ រួមទាំងគម្រោង «ថៃជួយថៃបូក»​ ដែល​ចាប់ផ្តើមនៅថ្ងៃទី ១ ខែមិថុនា ​ដល់ចុងខែកញ្ញា៕