សម្ដេច ហ៊ុន ម៉ាណែត ឱ្យក្រសួងពាណិជ្ជកម្មគ្រប់គ្រងតម្លៃប្រេង និងមុខទំនិញមួយចំនួន នៅ ​ចំ​​​​​ពេល​ដែលកម្ពុជាបិទការនាំចូលពីថៃ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំឱ្យក្រសួងពាណិជ្ជកម្ម គ្រប់គ្រងតម្លៃប្រេងឥន្ធនៈ និងមុខទំនិញមួយចំនួននៅលើទីផ្សារ បន្ទាប់ពីកម្ពុជាបិទ​ការនាំ​ចូល​ប្រេងឥន្ធនៈ និងមុខទំនិញមួយចំនួននៅលើទីផ្សារ។

សម្ដេច ហ៊ុន ម៉ាណែត​ បានលើកឡើង​ក្នុងពិធីបិទកិច្ចប្រជុំគណៈកម្មាធិការកណ្តាល​សហ​ភាព​សហព័ន្ធយុវជនកម្ពុជានៅព្រឹកថ្ងៃទី ២៣ ខែមិថុនា ឆ្នាំ ២០២៥​ថា សម្ដេចបាន​ផ្ដល់​គោល​ការណ៍​​ឱ្យខិតខំបង្កើនសមត្ថភាពផលិតផ្ទៃក្នុង និងតភ្ជាប់​ទីផ្សារក្នុងប្រទេស ដោយកុំឱ្យពឹង​ដង្ហើម​ពីខាងក្រៅច្រើនតាមរយៈការធ្វើពិពិធកម្ម។

សម្ដេច ហ៊ុន ម៉ាណែត ថ្លែងថា៖ «ពិតណាស់យើងមិនអាចផលិត ១០០ មុខខ្លួនឯងទេ គ្មានពី​ណាផលិតបន្លែ ១០០ មុខ ១០០០ មុខទេ យើងត្រូវធ្វើពាណិជ្ជកម្មហើយ ប៉ុន្តែកុំភ្លេចទីផ្សារ​ក្នុងស្រុក​ក៏ច្រើន ធ្វើឱ្យច្រើននៅ​ក្នុង​ស្រុក សល់ប៉ុន្មានយើងនាំចេញ ដូចស្រូវអញ្ចឹង»។

ក្នុងពេលនេះ ក្រសួងពាណិជ្ជកម្មត្រូវមើលការគ្រប់គ្រងតម្លៃ ហើយការបិទការនាំចូលប្រេង និងឧស្ម័យពីថៃ បានធ្វើឡើងនៅចំពេលដែលអាមេរិកវាយប្រហារអ៊ីរ៉ង់ធ្វើឱ្យតម្លៃប្រេងកើនឡើង ខណៈសម្ដេចបញ្ជាក់ថា កត្តាខាងក្រៅជារឿងមួយ ប៉ុន្តែនៅក្នុងប្រទេសកុំឱ្យមានអ្នកឆ្លៀតឱកាស​ដំឡើងថ្លៃទំនិញ​យកផល​ចំណេញ។

លោក ​វន់ ពៅ ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅប្រព័ន្ធ ប្រាប់កម្ពុជាថ្មីថា ចាប់តាំងពីថៃបិទច្រកព្រំដែន មិនទាន់មានទំនិញ​ណាមួយ​ឡើង​​ថ្លៃនៅឡើយនោះទេ រាប់តាំង​ពីសាច់គោ សាច់ជ្រូក បន្លែ និងអាហារទទួលទានប្រចាំថ្ងៃ ដោយ​​សារ​កម្ពុជាមានទំនិញ​ប្រទេសផ្សេងៗនាំចូលជំនួសបាន។  

សម្រាប់លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា តម្លៃទីផ្សារសាច់ជ្រូក មិនមាន​ការ​ឡើង​ថ្លៃនោះទេ ពោលគឺនៅថេរដដែល សាច់សុទ្ធលក់រាយនៅលើទីផ្សារតម្លៃក្រោម ២ ម៉ឺនរៀល ក្នុង​មួយគីឡូក្រាម។

យោងតាមធនាគារ ARDB តម្លៃកសិផលតាមទីផ្សារនៅរាជធានីភ្នំពេញនៅថ្ងៃទី ២៣ ខែមិថុនា ឆ្នាំ ២០២៥ នេះ មិនមានការឡើងថ្លៃនោះទេ សាច់គោមួយគីឡូតម្លៃ ៣ ៧០០០ រៀល សាច់ជ្រូក ១ ៥០០០ រៀល ក្នុងមួយគីឡូក្រាម សាច់មាន់ ១ ម៉ឺនរៀល ក្នុងមួយគីឡូក្រាម និងស្ពៃចង្កឹះ ៣០០០ រៀល ក្នុងមួយគីឡូក្រាម អង្ករផ្កាខ្ចី ៣០០០ រៀល និងអង្ករ​សែនក្រអូប ៣ ៥០០ រៀល ក្នុងមួយគីឡូក្រាម៕

អត្ថបទ៖ ឡេង ដេត