វេទិកា “និយ័តករ និងអគ្គនាយកធានារ៉ាប់រង” សម្រេចបានលទ្ធផលសំខាន់៤ ដើម្បីពង្រឹងវិស័យធានារ៉ាប់រងនៅកម្ពុជា

វេទិកា “និយ័តករ និងអគ្គនាយកធានារ៉ាប់រង” ឆ្នាំ២០២៥ បានរៀបចំដោយនិយ័តករធានារ៉ាប់រងកម្ពុជា ដើម្បីស្វែងរកបញ្ហាប្រឈមនានាក្នុងវិស័យធានារ៉ាប់រងកម្ពុជា ហើយបន្ទាប់ពីចំណាយពេល១ព្រឹកពេញ នៅថ្ងៃទី២៥ ខែកក្កដា ឆ្នាំ២០២៥ វេទិកានេះ សម្រេចបានលទ្ធផលសំខាន់ៗចំនួន៤ ដើម្បីពង្រឹងវិស័យធានារ៉ាប់រងនៅកម្ពុជាកាន់តែល្អប្រសើរ។

លទ្ធផលដែលវេទិកានិយ័តករ និងអគ្គនាយកធានារ៉ាប់រង ឆ្នាំ២០២៥ សម្រេចបាន មានដូចជា៖ ទី១.ពង្រឹងការអនុវត្តបទប្បញ្ញតិទាក់ទងនឹងការលក់ផលិតផលធានារ៉ាប់រង និងការប្រើប្រាស់សេវាគណនាបុព្វលាភធានារ៉ាប់រង ក៏ដូចជាការធានាកម្រិតសាធនភាពរបស់ក្រុមហ៊ុនធានារ៉ាប់រង។ ទី២.សិក្សារៀបចំក្របខណ្ឌយុទ្ធសាស្ត្រសម្រាប់ធ្វើពិពិធកម្មការវិនិយោគមូលនិធិធានារ៉ាប់រងរបស់ក្រុមហ៊ុនធានារ៉ាប់រងទាំងក្នុង និងក្រៅប្រទេស។ ទី៣.សិក្សារៀបចំក្របខណ្ឌរបបលើកទឹកចិត្តពន្ធដារសម្រាប់វិស័យធានារ៉ាប់រង និងទី៤. ពង្រឹងគុណភាពវិជ្ជាជីវៈធានារ៉ាប់រង និងសម្រួលដល់នីតិវិធីនៃការចុះបញ្ជីភ្នាក់ងារធានារ៉ាប់រងជារូបវន្តបុគ្គលដោយអនុញ្ញាតឱ្យប្រើអត្តសញ្ញាណបណ្ណសញ្ជាតិខ្មែរជំនួសសៀវភៅស្នាក់នៅ។

សូមជម្រាបថា វេទិកានិយ័តករ និងអគ្គនាយកធានារ៉ាប់រង ជាយន្តការនៃភាពជាដៃគូរវាងរដ្ឋ និងឯកជន ដែលបានរៀបចំឡើងជាប្រចាំឆ្នាំដើម្បីដោះស្រាយបញ្ហាប្រឈមនានាក្នុងវិស័យធានារ៉ាប់រងកម្ពុជា ក្នុងគោលដៅធានាប្រសិទ្ធភាពនៃការធ្វើនិយ័តកម្ម និងជំរុញការអភិវឌ្ឍវិស័យធានារ៉ាប់រងប្រកបដោយចីរភាព និងបរិយាបន្ន។

វេទិកានេះ មានការចូលរួមក្រោមអធិបតីភាព លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា និងលោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា ព្រមទាំងក្រុមហ៊ុនធានារ៉ាប់រងទាំងអស់នៅកម្ពុជាផងដែរ៕