រដ្ឋមន្ត្រីឧស្សាហកម្ម៖ បញ្ហាប្រឈមព្រំដែនកម្ពុជា-ថៃ ជាឱកាសសម្រាប់ផលិតករក្នុងស្រុក​

រដ្ឋមន្ត្រី​ក្រសួង​ឧស្សាហកម្ម លោក ហែម វណ្ណឌី បាន​មាន​ប្រសាសន៍​ថា បញ្ហាប្រឈមព្រំដែនរវាងកម្ពុជា-ថៃ គឺ​ជា​ឱកាស​សម្រាប់​ផលិតករ​ក្នុង​ស្រុក​ដែល​អាច​បង្ហាញ​ពី​សមត្ថភាព​ក្នុង​ការ​ប្រកួតប្រជែងកាន់តែខ្ពស់​នៅ​ក្នុងទីផ្សារ។

នៅ​ក្នុង​កិច្ចប្រជុំពិគ្រោះយោបល់ ដើម្បីដោះស្រាយបញ្ហាប្រឈមរបស់ផ្នែកឯកជនក្នុងវិស័យកម្មន្តសាល សហគ្រាសធុនតូចនិងមធ្យម និងសេវាកម្ម នៅ​ថ្ងៃ​ទី​០៤ ខែ​សីហា​ ឆ្នាំ​២០២៥ នេះ លោក​រដ្ឋមន្ត្រី ហែម វណ្ណឌី បាន​លើក​ឡើង​ពីការផ្លាស់ប្តូរក្នុងខ្សែច្រវាក់ផ្គត់ផ្គង់តំបន់ ដែលបណ្តាលមកពីបញ្ហាជម្លោះព្រំដែនរវាងកម្ពុជា-ថៃ ដោយផ្តោតលើឱកាសសម្រាប់អ្នកផលិតក្នុងស្រុក។

លោក​រដ្ឋ​មន្ត្រី អះអាង​ថា​ «​បញ្ហា​ប្រឈម​ជម្លោះព្រំដែនរវាងកម្ពុជា-ថៃនេះ​ ក៏​ជា​ឱកាស​សម្រាប់​ផលិតករ​ក្នុង​ស្រុក​របស់​យើង​ដែរ​​។ យើង​បាន​ឃើញ​កំណើន​នៃ​តម្រូវការ​ផលិតផល​ពីក្រុមហ៊ុនផ្គត់ផ្គង់ក្នុងស្រុក ហើយ​ក្រុមហ៊ុន​ក្នុង​ស្រុក​ជា​ច្រើន​បាន​បង្ហាញ​សមត្ថភាព​ប្រកួតប្រជែងកាន់តែខ្ពស់នៅក្នុងទីផ្សារ»។

ស្រប​ពេល​ជា​មួយ​គ្នា​នោះ លោក ហែម វណ្ណឌី ក៏​បានសង្កត់ធ្ងន់លើភាព​ចាំបាច់​ក្នុងការ​កសាង​ប្រព័ន្ធអេកូឡូស៊ី​ខ្សែច្រវាក់​ផ្គត់ផ្គង់​ក្នុង​ស្រុក​ពេញលេញ​មួយ ដែល​មានទាំងពីការផ្គត់ផ្គង់វត្ថុធាតុដើម និងការកែច្នៃ រហូត​ដល់​សេវា​ឡូជីស្ទីក ការធានា​គុណភាព និងលទ្ធភាពចូលក្នុងទីផ្សារ។ ជាក់ស្តែង យើង​មិន​ត្រឹម​តែ​ត្រូវផលិត​ឱ្យ​បាន​ច្រើនប៉ុណ្ណោះ​ទេ តែត្រូវ​ផលិតឱ្យ​បាន​កាន់​តែ​ល្អប្រសើរ​ដើម្បីបំពេញតម្រូវការទីផ្សារ និងដើម្បីប្រកួតប្រជែងបាន ទំនិញ​ត្រូវតែ​មានស្តង់ដាគុណភាព និងសុវត្ថិភាព។

លោក​រដ្ឋមន្ត្រី ក៏បានជំរុញឱ្យក្រុមហ៊ុនក្នុងស្រុកខិតខំពង្រីកខ្សែច្រវាក់ផលិតកម្មរបស់ខ្លួន និងបង្កើតការងារបន្ថែមទៀតសម្រាប់ពលករកម្ពុជា ពិសេសពលករដែលត្រឡប់មកពីប្រទេសថៃ។

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងរៀបចំរបាយការណ៍ស្តីពីបញ្ហាប្រឈម និងដំណោះស្រាយសម្រាប់ផ្នែកឯកជនក្នុងវិស័យកម្មន្តសាល សហគ្រាសធុនតូចនិងមធ្យម និងសេវាកម្ម ដើម្បីដាក់ជូនក្រុមប្រឹក្សាអភិវឌ្ឍន៍កម្ពុជា បន្តសម្របសម្រួល និងស្វែងរកអន្តរាគមន៍ចាំបាច់របស់រាជរដ្ឋាភិបាល៕