ស្លាប់ច្រើនទៅៗ មីយ៉ាន់ម៉ា ដល់ដំណាក់កាលទុកចោលសាកសពអ្នកជំងឺកូវីដនៅកន្លែងបូជា

ប្រទេសមីយ៉ាន់ម៉ា កំពុងរងគ្រោះខ្លាំងនូវការកើនឡើង ចំនួនអ្នកស្លាប់ដោយសារជំងឺកូវីដ ១៩ នាពេលថ្មីៗនេះ ខណៈសាកសពជាច្រើនបន្តកន្ទុយគ្នាទាំងនោះ មានលើសពីសមត្ថភាពកន្លែងបូជាសព ។

ទន្ទឹមនោះ កន្លែងបូជាសពនៅក្នុងទីក្រុងយ៉ាំងហ្គោន ត្រូវបានគេមើលឃើញថា មានសាកសពក្នុងចំនួនដ៏ច្រើនសន្ធឹកសន្ធាប់ ហើយសាកសពទាំងនោះ ត្រូវបានទុកចោលនៅខាងក្រៅកន្លែងបូជាសពដោយសារវាលើសពីសមត្ថភាពកន្លែងបូជាសព ។

វាក៏កើតឡើង បន្ទាប់ពីរដ្ឋប្រហារយោធារបស់ប្រទេសនេះកាលពីខែកុម្ភៈ បានធ្វើឲ្យប្រព័ន្ធថែទាំសុខភាពរបស់ប្រទេសមានភាពវឹកវរ ។

មនុស្សជាច្រើនដែលបានឆ្លងកូវីដ ឬស្ថិតក្នុងករណីសង្ស័យ មិនអាចទទួលបានការថែទាំសុខភាពត្រឹមត្រូវនោះទេ ហើយត្រូវបង្ខំឲ្យស្នាក់នៅផ្ទះ ។

ស្របពេលជាមួយនោះ ប្រជាជនដែលកំពុងស្នើសុំអុកស៊ីសែនវេជ្ជសាស្ត្រ សម្រាប់សមាជិកគ្រួសារដែលឈឺ បានឈរតម្រង់ជួរយ៉ាងវែង នៅឯរោងចក្រអុកស៊ីសែននៅទូទាំងប្រទេស ។

អាជ្ញាធរសុខាភិបាលមីយ៉ាន់ម៉ាបាននិយាយថា គិតត្រឹមថ្ងៃពុធមនុស្ស ២០៨,៣៥៧ នាក់នៅក្នុងប្រទេសបានធ្វើតេស្តវិជ្ជមានកូវីដ ហើយប្រហែលមួយភាគបួននៃករណីឆ្លងទាំងនោះ ត្រូវបានបញ្ជាក់ក្នុងរយៈពេល ២ សប្តាហ៍ដំបូងនៃខែនេះ ។

ចំណែកចំនួនអ្នកស្លាប់ប្រចាំថ្ងៃដោយសារជំងឺកូវីដ ១៩ បានហក់ឡើងដល់កម្រិតខ្ពស់គួរឲ្យកត់សម្គាល់ ក្នុងរយៈពេល ៦ ថ្ងៃកន្លងមកនេះ ខណៈប្រព័ន្ធផ្សព្វផ្សាយក្នុងស្រុកនិយាយថា ចំនួនពិតប្រាកដនៃករណីឆ្លង និងស្លាប់ អាចមានច្រើនជាងតួលេខផ្លូវការ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មីយ៉ាន់ម៉ា កំពុងជួបរលកព្យុះកូវីដដ៏ខ្លាំងក្លា ខណៈប្រព័ន្ធថែទាំសុខភាពក៏ដួលរលំ