ធ្ងន់ធ្ងរមែនទែន! មីយ៉ាន់ម៉ា កំពុងជួបរលកព្យុះកូវីដដ៏ខ្លាំងក្លា ខណៈប្រព័ន្ធថែទាំសុខភាពក៏ដួលរលំ

អ្នករាយការណ៍ពិសេសរបស់ UN ទទួលបន្ទុកសិទ្ធិមនុស្សនៅប្រទេសមីយ៉ាន់ម៉ា បានអំពាវនាវកាលពីថ្ងៃពុធសុំឲ្យមានការចូលរួមជាបន្ទាន់របស់អន្តរជាតិ ដើម្បីដោះស្រាយ “រលកព្យុះដ៏ខ្លាំងក្លា” នៃជំងឺកូវីដ ១៩ នៅក្នុងប្រទេសមីយ៉ាន់ម៉ា ដោយសារតែប្រព័ន្ធថែទាំសុខភាពដួលរលំ ។

លោក Tom Andrews បាននិយាយថា “ការផ្ទុះនូវករណីជំងឺកូវីដ ១៩ ដែលរួមមានវីរុសបំប្លែងខ្លួនឥណ្ឌា “Delta” ការដួលរលំនៃប្រព័ន្ធថែទាំសុខភាពរបស់មីយ៉ាន់ម៉ា និងការមិនទុកចិត្តរបស់ប្រជាជនមីយ៉ាន់ម៉ាទៅនឹងយោធា គឺជារលកព្យុះដ៏ខ្លាំងក្លាដែលប្រទេសកំពុងជួប” ។

លោកបាននិយាយថា “ប្រជាជនមីយ៉ាន់ម៉ាកំពុងបាត់បង់ជីវិត បន្ទាប់ពីគ្មានជំនួយបន្ទាន់ពីសហគមន៍អន្តរជាតិ” ។

លោកក៏បាននិយាយផងដែរថា យោធាមីយ៉ាន់ម៉ាត្រូវតែផ្ដល់ទឹកប្រាក់ចំនួន ៣៥០ លានដុល្លារជាជំនួយសម្រាប់ជំងឺកូវីដ ១៩ ដែលមូលនិធិរូបិយវត្ថុអន្តរជាតិ (IMF) បានផ្តល់ដល់ប្រជាជនមីយ៉ាន់ម៉ា ពោលតែប៉ុន្មានថ្ងៃប៉ុណ្ណោះ មុនរដ្ឋប្រហារថ្ងៃទី ១ ខែកុម្ភៈ ។

នៅក្នុងសេចក្តីថ្លែងការណ៍មួយលោក Andrews បាននិយាយថា “ស្តង់ដារសុខភាពខ្ពស់បំផុត គឺជាសិទ្ធិជាមូលដ្ឋានមួយ ក្នុងចំណោមសិទ្ធិជាមូលដ្ឋានរបស់មនុស្សគ្រប់រូប ប៉ុន្តែសិទ្ធិនេះត្រូវបានបដិសេធចំពោះប្រជាជនភាគច្រើននៅក្នុងប្រទេសមីយ៉ាន់ម៉ា ហើយសហគមន៍អន្តរជាតិត្រូវតែធ្វើសកម្មភាព” ។

ចុងក្រោយ លោកក៏បានបញ្ជាក់ម្តងទៀតនូវការអំពាវនាវរបស់លោក នៅឯក្រុមប្រឹក្សាសិទ្ធិមនុស្សក្នុងទីក្រុងហ្សឺណែវកាលពីថ្ងៃទី ៧ ខែកក្កដា ថា ការរួបរួមជាបន្ទាន់សម្រាប់ប្រជាជនមីយ៉ាន់ម៉ា ដើម្បីទទួលជំនួយមនុស្សធម៌គឺជារឿងចាំបាច់បំផុត ។

គួរបញ្ជាក់ថា គិតត្រឹមពេលនេះ ប្រទេសមីយ៉ាន់ម៉ា មានករណីឆ្លងជំងឺកូវីដ ១៩ ជិត ២១ ម៉ឺនករណី និងមានអ្នកស្លាប់សរុប ៤,១៨១ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ មីយ៉ាន់ម៉ា កំពុងប្រឈមកង្វះអុកស៊ីសែនធ្ងន់ធ្ងរមែនទែន ក្រោយផ្ទុះកូវីដខ្លាំងទៅៗ