នាយ ពែកមី បង្ហាញដំណើរការសង់ផ្ទះជូន ព្រឿង សុជាតិ និងអំពាវនាវសប្បុរសជនបន្តជួយ ខណៈខ្វះថវិកាដើម្បីបញ្ចប់

នាព្រឹកថ្ងៃអង្គារ ទី៩ ខែមិថុនា ឆ្នាំ២០២៦នេះ តារាកំប្លែងល្បីឈ្មោះ នាយ ពែកមី បានបង្ហាញដំណើរការនៃការសាងសង់ផ្ទះជូនអតីត​អ្នក​ប្រដាល់​គុន​ខ្មែរ​ ព្រឿង សុជាតិ និងជាយោធិនមួយរូប កំពុងបំពេញកាតព្វកិច្ចបម្រើជាតិនោះ បាននិងកំពុងដំណើរការទៅមុខជាបន្តបន្ទាប់ ក្រោមការថវិកាគាំទ្រពីសប្បុរសជន។

តាមរយៈការបង្ហោះសារលើបណ្ដាញសង្គម នាយ ពែកមី បានឱ្យដឹងថា ដំណើរការសាងសង់ផ្ទះសម្រេចបានមួយកម្រិតហើយ ប៉ុន្តែថវិកាសម្រាប់បញ្ចប់គម្រោងនៅមិនទាន់គ្រប់គ្រាន់នៅឡើយ។ លោកបានសរសេរថា “ផ្ទះរបស់ ព្រឿង សុជាតិ​ ធ្វេីបានប៉ុណ្ណឹងហេីយ​ ចំណែកថវិកា​ គឺមិនទាន់គ្រប់ទេ​ សង្ឃឹមថាបងប្អូននឹងជួយបន្ថែម​ ដេីម្បីបំពេញក្តីប្រាថ្នារបស់កងទ័ពយេីងម្នាក់នេះផង”។

បើតាមការបញ្ជាក់ ថវិកាដែលប្រមូលបានក្នុងដំណាក់កាលកន្លងមក មានប្រមាណជាង ៧,០០០ដុល្លារអាមេរិកប៉ុណ្ណោះ ខណៈគម្រោងសាងសង់ផ្ទះទាំងមូលត្រូវការថវិកាបន្ថែមមួយចំនួនទៀត ហេតុនេះ នាយ ពែកមី ក៏បានអំពាវនាវដល់ក្រុមហ៊ុនសំណង់ និងសប្បុរសជននានា បន្តចូលរួមគាំទ្រតាមលទ្ធភាព ដើម្បីឱ្យការសាងសង់អាចបញ្ចប់ទៅដោយរលូន។

គួររំលឹកថា កាលពីខែមេសាកន្លងទៅ នាយ ពែកមី បានផ្តួចផ្តើមគម្រោងសាងសង់ផ្ទះជូនលោក ព្រឿង សុជាតិ ដែលជាវីរកងទ័ព និងជាអតីតកីឡាករមួយរូប បន្ទាប់ពីទទួលបានការគាំទ្រយ៉ាងកក់ក្តៅពីសប្បុរសជនខ្មែរទាំងក្នុង និងក្រៅប្រទេស៕