កីឡា

វីរកងទ័ព ព្រឿង សុជាតិ នឹងឡើងប្រកួតគុនខ្មែរថ្ងៃទី១៩ ខែមេសា ជាថ្មីនៅសង្វៀនបាយ័ន

បានផុស

៣ ខែ មុន

នៅ

ថ្ងៃចន្ទ ៣០ មីនា ២០២៦

ដោយ

កីឡាករ ព្រឿង សុជាតិ ដែលគេស្គាល់ថាជាវីរកងទ័ពនឹងឡើងប្រកួតកម្ពៅសាច់ដុំនៅថ្ងៃទី១៩ ខែមេសា ឆ្នាំ២០២៦ នេះនៅសង្វៀនបាយ័ន ដើម្បីរំលឹកវិជ្ជាគុនផង និងជាការបង្ហាញមុខឡើងវិញជូនអ្នកគាំទ្រគុនខ្មែរផងដែរក្រោយជាប់ដៃនៅព្រំដែនអស់ជាច្រើនខែមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រឿង សុជាតិ ពេលកំពុងហ្វឹកហាត់

កីឡាករ ព្រឿង សុជាតិ បានឲ្យដឹងថា រូបគេនឹងឡើងប្រកួតគុនខ្មែរមួយប្រកួតនៅថ្ងៃទី១៩ ខែមេសា នេះនៅលើសង្វៀនបាយ័នដោយត្រូវប៉ះបរទេស។ ឥលូវរូបគេចូលហ្វឹកហាត់បានប្រហែល ២សប្ដាហ៍ហើយ និងសម្រក់ទម្ងន់បានប្រហែល ៤គីឡូក្រាម។

វីរកងរូបនេះបន្ថែមទៀតថា ខ្លួននឹងត្រូវហ្វឹកហាត់ និងសម្រក់ទម្ងន់បន្ថែមទៀត ព្រោះលើកនេះឡើងប្រកួតទម្ងន់ ៦៥គីឡូក្រាមសិន។ ចំពោះការប៉ះបរទេសមកពីខាងណានោះ សុជាតិ នៅមិនទាន់ដឹងនៅឡើយទេ ពោលឥលូវនេះផ្ដោតលើតែលើការហ្វឹកហាត់ពង្រឹងសមត្ថភាពវិញ។

ព្រឿង សុជាតិ នៅសមរភូមិ

បញ្ជាក់ដែរថា ព្រឿង សុជាតិ ជាកីឡាករប្រដាល់គុនខ្មែរមួយរូបនៅក្លឹបប៉ែនកាក់គុនខ្មែរនាពេលបច្ចុប្បន្ននេះ។ រូបគេជាអតីតកូនសិស្សលោក ធន់ សុភា នៃសមាគមប្រដាល់ក្រសួងការពារជាតិពីមុន។ សុជាតិ ក៏ជាវីរកងមួយផងដែរនៅឯខេត្តឧត្តរមានជ័យ និងបានឈរជើងច្បាំងជាមួយសៀមអំឡុងការឈ្លានពានកន្លងទៅផងដែរ៕

អត្ថបទដោយ៖ នួន ស៊ីណា