ស្រីនា និង ហេង វិសាល ទទួលបានពានរង្វាន់អន្តរជាតិ Stellar Creator Award នៅប្រទេសចិន

អ្នកផលិតមាតិកាល្បីឈ្មោះរបស់កម្ពុជា អ្នកនាង ជា ស្រីនា និងស្វាមី គឺលោក ហេង វិសាល បាននាំមកនូវមោទនភាពជូនជាតិ បន្ទាប់ពីអ្នកទាំងពីរទទួលបានពានរង្វាន់ Stellar Creator Award ក្នុងកម្មវិធី The 1st South Asia & Southeast Asia Online Content Creators Conference ដែលរៀបចំឡើងនៅខេត្តយូណាន ប្រទេសចិន។

ជាមួយនឹងរូបភាពកាន់ពានរង្វាន់ក្នុងដៃ អ្នកទាំងពីរបានបង្ហាញពីក្តីរំភើប និងសេចក្តីដឹងគុណយ៉ាងជ្រាលជ្រៅ ដោយបានសរសេររៀបរាប់ថា “យើងកាន់ដៃគ្នាដើរតាមក្តីស្រមៃ ហើយតែងតែនាំយកឈ្មោះកម្ពុជាទៅជាមួយយើងគ្រប់ជំហាន”។

អ្នកនាង ជា ស្រីនា បានបញ្ជាក់ថា ថ្ងៃនេះ គឺជាពេលវេលាដ៏មានអត្ថន័យ និងពោរពេញដោយមោទនភាព ខណៈអ្នកទាំងពីរបានទទួលស្គាល់ពីស្នាដៃ និងការខិតខំប្រឹងប្រែងរបស់ខ្លួននៅលើឆាកអន្តរជាតិ។

សាធារណជនបានចូលរួមអបអរ និងចាត់ទុកថា ការទទួលបានពានរង្វាន់ Stellar Creator Award មិនត្រឹមតែជាជោគជ័យផ្ទាល់ខ្លួនរបស់អ្នកទាំងពីរប៉ុណ្ណោះទេ ប៉ុន្តែក៏ជាការបង្ហាញពីសក្តានុពល និងការរីកចម្រើនរបស់អ្នកផលិតមាតិកាខ្មែរ ដែលកំពុងទទួលបានការទទួលស្គាល់កាន់តែទូលំទូលាយនៅក្នុងតំបន់ និងពិភពលោកផងដែរ។

សមិទ្ធផលនេះ បានក្លាយជាមោទនភាពមួយទៀតសម្រាប់កម្ពុជា ខណៈអ្នកទាំងពីរនៅតែបន្តប្រើប្រាស់ភាពច្នៃប្រឌិត និងខ្លឹមសារដែលមានគុណភាព ដើម្បីផ្សព្វផ្សាយអត្តសញ្ញាណ និងកេរ្តិ៍ឈ្មោះរបស់ប្រទេសកម្ពុជាទៅកាន់ឆាកអន្តរជាតិ៕