អតីតតួ ហាន់ជីអ៊ុន ឬ Song Hye Kyo ត្រូវបានអ្នកគាំទ្រដាក់រហ្ស័សនាមជា «ទេពធីតាសម្រស់» នៃទឹកដីកូរ៉េ ដោយសារស្បែកសរលោងភ្លឺថ្លា សម្រស់ក្មេងជាងវ័យ ទោះបីជានាងឈានចូលវ័យ ៤០ឆ្នាំហើយក៏ដោយ។

Song Hye Kyo មិនមែនជាឈ្មោះ​ប្លែក​សម្រាប់​អ្នក​គាំទ្រ​ទៀត​នោះទេ។ នាងត្រូវបានទស្សនិកជនខ្មែរស្គាល់យ៉ាងច្បាស់តាមរយៈតួនាង ហាន់ជីអ៊ុន ក្នុងរឿង “បំណុលផ្ទះជំពាក់ស្នេហ៍” ។ មិន​ត្រឹម​តែ​ចាប់​អារម្មណ៍​នឹង​ការ​សម្ដែង​​របស់​នាង​ទេ កំពូលតារាស្រីរូបនេះ ​ធ្វើ​ឱ្យ​មនុស្ស​ស្រីជាច្រើន​ច្រណែន​នឹង​ស្បែកដ៏ស្រស់ស្អាត​របស់​នាងផងដែរ។ ឈាន​ចូល​វ័យ ​៤០​ឆ្នាំ​ហើយ ប៉ុន្តែ​គ្រប់គ្នាមិន​អាច​បដិសេធទេ​បាន​ថា​នាង​នៅ​តែ​ជា​ចំណុច​ទាក់ទាញ​រាល់​ពេល​លេច​មុខជាសាធារណៈ។

ពាក់ព័ន្ធនឹងអាថ៌កំបាំងនៃសម្រស់ក្មេងជាងវ័យនេះដែរ Song Hye Kyo បានចែករំលែកថា ខ្លួនចំណាយពេលច្រើនលើការហាត់ប្រាណ និងហាត់យូហ្គា ដើម្បីរក្សារាងឱ្យុស្លីម។ ដោយឡែកនៅក្នុងម៉ឺនុយអាហារប្រចាំថ្ងៃ នាងផ្តោតលើការទទួលទានបន្លែ និងផ្លែឈើ ដើម្បី​ជួយ​​ផ្តល់​នូវ​វីតាមីន​​ឱ្យ​ស្បែក​មាន​សុខភាព​ល្អ​។ ជាពិសេស អាហារ Fast Food ដែលមានជាតិខ្លាញ់ច្រើន នាងតមដាច់ខាតតែម្ដង។

លើសពីនេះទៀត ជារៀងរាល់ថ្ងៃ Song Hye Kyo ផឹកទឹក ១០កែវ ដើម្បីផ្តល់សំណើមដល់ស្បែក។ តារាស្រីរូបនេះ ក៏តែងតែផឹកទឹកក្រូចឆ្មា ដោយមិនដាក់ស្ករ ឬផឹកតែយិនស៊ិន ដើម្បីជួយបន្ថែមវីតាមីន C ជួយឱ្យស្បែកភ្លឺថ្លា និងមានរាងស្ដើង។

បើក្រឡេកមកមើលវិថីសិល្បៈ តាំងពីដើមរហូតដល់បច្ចុប្បន្ន Song Hye Kyo នៅតែស្រស់ស្អាតមិនចាញ់តារាវ័យក្មេងស្រករក្រោយឡើយ។ ប្រហែលមូលហេតុនេះហើយ ទើបអ្នកគាំទ្រនិយមដាក់ឈ្មោះនាងជា «ទេពធីតាសម្រស់» របស់កូរ៉េ៕

ប្រែសម្រួល៖ សន្យា

ចុចអាន៖ Song Hye Kyo និង Jun Ji Hyun ក្លាយជាតារាស្រី​កូរ៉េខាងត្បូង រកចំណូលបានច្រើនជាងគេ ក្នុងរឿងមួយភាគ

ចុចអាន៖ ហ្វេនចំហមាត់ ក្រោយដឹងតម្លៃរថយន្តរបស់តារាកូរ៉េ ៦រូបនេះ