តារាសម្ដែងជើងចាស់ នារីរ័ត្ន គន្ធា វិលពីអាមេរិកមកកម្ពុជា មានអ្វីពិសេស?

ក្រោយពីចាកឆ្ងាយពីវិស័យសិល្បៈ នៅក្នុងកំឡុងឆ្នាំ២០០១ លោកស្រី នារី រ័ត្នគន្ធា បានចេញទៅរស់នៅសហរដ្ឋអាមេរិក ដោយបានរៀបអាពាហ៍ពិពាហ៍ជាមួយស្វាមី ជាទាហានធ្វើការលើកប៉ាល់។ លោកស្រី និងស្វាមី រួមទាំងកូនពីរនាក់ រស់នៅក្នុងរដ្ឋអាយលែន និងមានមុខរបរបើកហាងឈ្មោះ “នារី រ័ត្នគន្ធា New Collection” លក់សំលៀកបំពាក់ខ្មែរ និងវត្ថុអនុស្សាវរីយ៍បែបបុរាណខ្មែរ។

បច្ចុប្បន្ន លោកស្រី នារីរ័ត្ន គន្ធា កំពុងមានវត្តមានលើមាតុភូមិកំណើតសារជាថ្មីជាមួយកូនប្រុសពៅកំលោះ។ តើលោកស្រីអញ្ជើញមកកម្ពុជានៅពេលនេះ មានកិច្ចការអ្វីសំខាន់ខ្លះ?

ឆ្លើយប្រាប់ “កម្ពុជាថ្មី” ដោយសម្ដីទន់ភ្លន់រួសរាយរាក់ទាក់តាម សារអេឡិចត្រូនិកថា នៅរសៀលនេះថា លោកស្រី នារីរ័ត្ន គន្ធា បានឱ្យដឹងថា លោកស្រីមកកម្ពុជាពេលនេះ ព្រោះមានធុរៈផ្ទាល់ខ្លួនខ្លះ និងគ្រោងមកថតភាពយន្តរឿង អប្សរាមហាអង្គរ ផងដែរ ប៉ុន្តែលោកស្រីមិនទាន់បានដឹងថា តួអង្គលោកស្រីនឹងថតនៅថ្ងៃណាទេ ដោយត្រូវរង់ចាំការផ្ដល់ដំណឹងពីអ្នកដឹកនាំសម្ដែង លោក ហ្វៃ សំអាង សិន។

លោកស្រី នារីរ័ត្ន គន្ធា បានឱ្យដឹងបន្ថែមថា៖ “ប៉ុន្តែក្នុងរយៈពេល ២សប្ដាហ៍នេះ នាងខ្ញុំធ្វើកិច្ចផ្ទាល់ខ្លួន ម៉្យាងដោយសារកូនប្រុសរបស់ខ្ញុំមកលេងតែរយៈពេល១៨ថ្ងៃទេ គេនឹងត្រឡប់ទៅអាមេរិកមុន។ ខ្ញុំត្រូវចំណាយពេលជាមួយកូនសិន ដូចនេះខ្ញុំចង់នាំគាត់ទៅកន្លែងផ្សេងៗដែលគាត់មិនធ្លាប់ទៅ។ ខ្ញុំទៅផ្ទះនៅខេត្តសៀមរាប និងនាំកូនមកលេងកំពង់សោម ហើយនឹងទៅនឹងស្រុកវាលវែង តំបន់ទេសចរណ៍ទឹកធ្លាក់ថ្មដា ព្រោះចង់ឱ្យកូនប្រុសទៅដល់តំបន់ហ្នឹងម្ដង ព្រោះគាត់មិនដែលស្គាល់”។

តារាស្រីឯកទសវត្សឆ្នាំ៩០នេះ មានប្រសាសន៍បន្តថា លើសពីនេះ លោកស្រីគ្រោងនឹងរៀបចំធ្វើបុណ្យសង្ឃទានលក្ខណៈជួបជុំគ្រួសារដើម្បីឧទ្ទិសកុសលជូន លោកឪពុក និងបុព្វការីជនដែលបានចែកឋាន តាមទម្លាប់នៅពេលមកលេងស្រុកខ្មែរម្ដងៗ។

លោកស្រី នារីរ័ត្ន គន្ធា មានប្រសាសន៍ទៀតថា៖ “នាងខ្ញុំក៏មានគម្រោងជួបជុំមិត្តសិល្បករចាស់ៗ​រួមជំនាន់ ដោយការនឹករលឹក ចង់ជួបជុំគ្នាម្ដង ព្រោះខានជួបគ្នាយូរហើយ។ ដល់ពេលនេះ ពួកយើងចាស់ៗរៀងៗខ្លួន ក៏ចង់ជួបសំណេះសំណាលរំលឹកអនុស្សាវរីយ៍កាលកន្លងដែលធ្លាប់បានធ្វើការងាររួមគ្នា”។

លោក ហ្វៃ សំអាង អ្នកដឹកនាំសម្ដែង បានឱ្យដឹងថា ក្នុង​ភាពយន្ត​ភាគ​ខ្នាត​ធំ​ រឿង​​ “អប្សរា​មហាអង្គរ” លោកស្រី នារី រ័ត្នគន្ធា នឹងសម្ដែង​ជា​តួ​អង្គ​ដែល​មាន​ឈ្មោះ​ថា​ “ជម្ពូ​” ជា​ស្ត្រី​ដែល​មាន​ចំណេះដឹង​ខាង​មេផ្ទះ​ មាន​របៀបរៀបរយ​អប់រំ​មនុស្ស​នៅ​ជុំវិញ​ខ្លួន​។ ជម្ពូ ជា​ស្ត្រី​រក្សាភាពក្រមុំ​ព្រហ្មចារិនី រហូត​ដល់​អាយុ​ជាង​ហាសិបឆ្នាំ​ ក៏បាន​ខាបបេះដូង​លោក​សេដ្ឋី​ ម៉ៅស្វិតឈ្មោះ បរិបូណ៌​ ដែល​សម្ដែង​ដោយ​នាយ​ក្រឹម​ ឱ្យលង់​ស្នេហ៍​យ៉ាង​ងប់ងល់។

គួរបញ្ជាក់ថា អ្នកនាង នារី រ័ត្នគន្ធា គឺជាអតីតតារាសម្តែងជំនាន់ឆ្នាំ ៨០-៩០ ដ៏ល្បីល្បាញមួយរូប ដែលអ្នកនាងត្រូវបានអ្នកគាំទ្រចាត់ទុកជាតារាទឹកភ្នែក និយមដើរតួកម្សត់ ដែលដៃគូស័ក្តិសមរបស់អ្នកនាងនោះគឺលោក ច័ន្ទ រិទ្ធមេធានី និង តារាប្រុសល្បីៗមួយចំនួនទៀត។ អ្នកនាងធ្លាប់បានសាងស្នាដៃក្នុងរឿងជាច្រើនដូចជា “កំលោះឆ្នាំ ៩១” “បុប្ផាភ្នំពេញ” រឿង “ផ្លូវបែកជាបី” “មរណមាតា” ជាដើម។ បន្ទាប់ពីសម្ដែងជាតួនាងទាវ ក្នុងកម្រងវីដេអូចម្រៀង ខារ៉ាអូខេ រឿង ទុំទាវ កំឡុងឆ្នាំ ២០០០ មក តារាសម្ដែងតួស្លូតបូតទន់ភ្លន់ និងទឹកភ្នែក លោកស្រី នារី រ័ត្នគន្ធា បានបាត់ស្រមោលពីវិស័យសិល្បៈ៕

អត្ថបទ៖ ច័ន្ទ វីរៈ