ជីវិតកម្សាន្ដ

អារម្មណ៍ពិតរបស់លោក ទេព រិន្ទដារ៉ូ បានត្រឡប់មករួមការងារជាថ្មីជាមួយ នារីរ័ត្ន គន្ធា

បានផុស

៣ years មុន

នៅ

ថ្ងៃចន្ទ ២៧ កុម្ភៈ ២០២៣

ដោយ

លោក ទេព រិន្ទដារ៉ូ គឺជាតារាសម្ដែងភាពយន្តជើងចាស់ដ៏ល្បីឈ្មោះ និងមានភាពលេចធ្លោលើវិថីសិល្បៈនាអំឡុងទសវត្សរ៍ឆ្នាំ ៨០ និង ៩០ រួមជំនាន់ជាមួយអ្នកនាង អម្ពរ ទេវី ដែលជាដៃគូសម្ដែងដ៏ស័ក្ដិសមបំផុតនាសម័យនោះ។ ក្នុងនោះក៏មានតារាសម្ដែងប្រុស-ស្រីល្បីៗមួយចំនួនទៀតរួមការងារសិល្បៈជាមួយលោកផងដែរ តួយ៉ាងដូចជា តារាស្រីអ្នកនាង នារីរ័ត្ន គន្ធា ជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើគិតរហូតមកទល់បច្ចុប្បន្ននេះ សម្រាប់តារាសម្ដែងជើងចាស់លោក ទេព រិន្ទដារ៉ូ គឺបានប្រឡូកក្នុងវិស័យសិល្បៈមានរយៈពេលប្រមាណ ៣០ ឆ្នាំហើយ ខណៈប្រជាប្រិយភាព និងទីផ្សារសម្ដែង នៅតែរក្សាបានការគាំទ្រខ្ពស់មិនមានការចុះថមថយឡើយ។ លោក ទេព រិន្ទដារ៉ូ ក៏ជាតួអង្គប្រុសមួយរូបធ្លាប់រួមសម្ដែងភាពយន្ត និងកាយវិការបទចម្រៀងខារ៉ាអូខេជាច្រើនជាមួយអ្នកនាង នារីរ័ត្ន គន្ធា ផងដែរ។

ក្រោយបែកគ្នាពីការសម្ដែងជាង ២០ ឆ្នាំកន្លងទៅនេះ ដោយសារតែអ្នកនាង នារីរ័ត្ន គន្ធា ចេញទៅរស់នៅសហរដ្ឋអាមេរិក កសាងសុភមង្គលជាមួយស្វាមី និងកូននោះ ស្រាប់តែថ្មីៗនេះអ្នកទាំងពីរក៏បានឱកាសវិលត្រឡប់មករកការសម្ដែងជាថ្មីជាមួយគ្នាក្នុងភាពយន្តបុរាណរឿង«អប្សរាមហាអង្គរ» ដែលដឹកនាំដោយផលិតករល្បីឈ្មោះលោក ហ្វៃ សំអាង។ ក្នុងការវិលមកជួបគ្នាឡើងវិញក្រោយបែកគ្នា ២៥ ឆ្នាំមកនេះ ទាំងអ្នកនាង នារីរ័ត្ន គន្ធា និងលោក ទេព រិន្ទដារ៉ូ ឃើញថា ហាក់មានអារម្មណ៍រំភើបដូចគ្នា ព្រោះបានជួបគ្នាឡើងវិញសម្រាប់ការសម្ដែងនៅលើទឹកដីប្រទេសកំណើតកម្ពុជា។

ជុំវិញចំណាប់អារម្មណ៍របស់លោក ទេព រិន្ទដារ៉ូ បានរៀបរាប់ដោយក្ដីរំភើបថា លោកកម្របានជួបគ្នា យូរឆ្នាំហើយដែលមិនបានជួបគ្នា បែកគ្នារៀងៗខ្លួនទៅបំបែកវិជ្ជាគុនរៀងៗខ្លួន សង្ឃឹមថា ជួបគ្នាលើកនេះនឹងបញ្ចេញក្បាច់គុនរបស់យើងតាមទេពកោសល្យរៀងៗខ្លួន ហើយក៏រំលឹកក្បាច់គុនចាស់មកវិញខ្លះដែរ ដើម្បីកុំឲ្យភ្លេច។ លោកថា រំភើបចិត្តមែនទែនដែលយើងបានត្រឡប់មករួមការងារជាមួយគ្នាជាថ្មី …! សូមទទួលបានការគាំទ្រពេញទំហឹងពីបងប្អូនរួមជាតិ និងជោគជ័យគ្រប់ភារកិច្ច សំណាងល្អ សុខភាពរឹងមាំ មានសុវត្ថិភាពទាំងអស់គ្នា។

សូមបញ្ជាក់ដែរថា លោក ទេព រិន្ទដារ៉ូ គឺជាតារាជើងចាស់មួយរូបដែលបានចូលប្រឡូកក្នុងវិស័យសិល្បៈផ្នែកសម្ដែងអស់រយៈពេល ៣ ទសវត្សរ៍ជាងមកម្ល៉េះ និងមានប្រជាប្រិយភាពមិនរីងស្ងួតមកដល់សព្វថ្ងៃ។ លោកក៏តែងទទួលបានការគាំទ្រ និងសរសើរខ្លាំងចំពោះសមត្ថភាព និងភាពរួសរាយរាក់ទាក់អ្នកនៅជុំវិញខ្លួន៕

អត្ថបទ ៖ ចាន់រ៉ា