ទស្សនាវដ្ដីអាមេរិក Rolling Stone បានរិះគន់យ៉ាងចាស់ដៃទៅលើខ្សែភាពយន្ត “The Idol” ដែលមានការចូលរួមសម្ដែងពីតារាល្បីៗរួមទាំង Jennie សមាជិកក្រុម BLACKPINK ផងដែរនោះថាជា “រឿងអាសអាភាស និងរឿងធ្វើទារុណកម្ម” ។

ជាពិសេសទស្សនាវដ្ដី Rolling Stone ថែមទាំងហៅអ្នកដឹកនាំរឿងលោក Sam Levinson ថាវង្វេងចេញពីទិសដៅដើម ដោយដឹកនាំខ្សែភាពយន្តនេះ “ក្នុងលក្ខណៈគួរឲ្យខ្លាច និងគួរឲ្យស្អប់ខ្ពើម” ។

ទន្ទឹមនោះ Rolling Stone ក៏បានចោទប្រកាន់រឿង “The Idol” ដែលយកឈ្មោះ Jennie សមាជិកក្រុម BLACKPINK មកបង្កើតរូបភាព ដើម្បីធ្វើឲ្យទស្សនិកជនចាប់អារម្មណ៍លើរឿងនេះ បើទោះជាឈុតឆាករបស់តួអង្គ Jennie មិនសូវមានច្រើនក្នុងសាច់រឿងក៏ដោយ ។

ទោះជាយ៉ាងណាក៏ដោយទូរទស្សន៍ HBO បានប្រឆាំងនឹងទស្សនាវដ្ដី Rolling Stone ដោយអះអាងថា ខ្សែភាពយន្តនេះបំពេញតាមស្តង់ដាររបស់ស្ទូឌីយោ ។ HBO បាននិយាយទៀតថា “អ្នកបង្កើត និងអ្នកផលិតកម្មរឿង The Idol បានខិតខំបង្កើតរឿងភាគយ៉ាងលំបាកបំផុត” ។

HBO បានបន្តទៀតថា “ក្នុងអំឡុង ពេលថត ក្រុមការងារច្នៃប្រឌិតបានបង្កើតបរិយាកាសការងារប្រកបដោយសុវត្ថិភាព សហការ និងគោរព ។ ក្រុមការងារទាំងអស់បានធ្វើការផ្លាស់ប្តូរ និងការបង្កើតអ្វីដែលពួកគេមានអារម្មណ៍ថាល្អបំផុត សម្រាប់ផលិតករ និងតួសម្តែង” ។

ទន្ទឹមនឹងនេះដែរ តួសម្តែងសំខាន់ទាំងពីរ Lily-Rose Depp និងតារាចម្រៀង The Weeknd ក៏បានចេញមុខនិយាយការពាររឿងភាគទូរទស្សន៍មួយនេះផងដែរថា ត្រូវបានកំណត់នៅក្នុងឧស្សាហកម្មតន្ត្រីបច្ចុប្បន្ន ៕

ប្រែសម្រួល ៖ នាងតូច

ចុចអាន៖Bella ត្រូវមហាជនថានាងពូកែយកមុខ សូម្បីតែពេលថតរូបកៀក Mew