Connect with us

ជីវិតកម្សាន្ដ

ត្រួសៗ ពីបណ្ឌិតច្នៃម៉ូដ ឯម រៀម

បានផុស

នៅ

ឯម រៀម ត្រូវ​បាន​មហាជន​ជា​ច្រើន​ស្គាល់​លោក​តាមរយៈ​ការ​ច្នៃ​ម៉ូដ​ដ៏​លេចធ្លោ ទាក់ទាញ ជា​ពិសេស​ទៅ​លើ​ការ​ស្លៀកពាក់ និង​តែងខ្លួន​ប្លែកៗ ចូលរួម​កម្មវិធី​ផ្សេងៗជាច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឯម រៀម មាន​នាម​ខាងក្រៅ​មួយ​ទៀត​ថា «​បណ្ឌិត​ច្នៃ​ម៉ូដ​»។ ការ​ទទួល​បាន​រហស្សនាម «បណ្ឌិត​ច្នៃ​ម៉ូដ» នេះ ក្រោយពី​មហាជន​ទទួល​ស្គាល់​ស្នាដៃ ភាព​ប៉ិនប្រសព្វ​ក្នុង​ការ​ច្នៃ​ម៉ូដ និង​ការ​តុបតែង​ខ្លួន​ប្លែកៗ របស់​លោក។

បណ្ឌិត​ច្នៃ​ម៉ូដ រូប​នេះ មាន​កេរ្តិ៍ឈ្មោះ​ល្បីល្បាញ សមត្ថភាព​អស្ចារ្យ ច្នៃ​ម៉ូដ​បានល្អ ប្លែក​គេ សម្រាប់​តារា​ចម្រៀង និង​សម្ដែង​ល្បីៗ ជា​ច្រើន​រូប​ផង​ដែរ។

មុន​នឹង​ទទួល​បាន​កេរ្តិ៍ឈ្មោះ​ល្បីល្បាញ​នេះ លោក ឯម រៀម ក៏​ធ្លាប់​ទទួល​បាន​ការ​រិះគន់​យ៉ាង​ចាស់​ដៃ​ពី​មហាជន​ទាំង​បែប​ស្ថាបនា និង​មាក់ងាយ​ផង​ដែរ។ ទោះ​រង​ព្យុះភ្លៀង​បែបនេះ​ក្ដី លោក ឯម រៀម មិន​ដែល​បាក់​ទឹកចិត្ត ហើយ​ក៏​មិន​ដែល​គិត​ថា បោះបង់​អាជីព​របស់​លោក​ចោល​នោះ​ដែរ។

ក្នុង​នាម​លោក ឯម រៀម ជា​អ្នក​ច្នៃ​ម៉ូដ លោក​ត្រូវ​តែ​បង្ហាញ​ម៉ូដ ផ្សព្វផ្សាយ​ម៉ូដ​របស់​លោក ព្រោះថា លោក​ជា​សិល្បករ គំនូរ ចម្លាក់ ជា​អ្នក​ធ្វើ​ទីផ្សារ អ្នក​ទំនាក់ទំនង ដើម្បី​ឲ្យ​ប្រជាពលរដ្ឋ​ស្គាល់ គឺ​ធ្វើ​អ្វីៗ ដើម្បី​ជា​រូបភាព​ឲ្យ​គេ​ស្គាល់។

នៅ​ក្នុង​វិថី​សិល្បៈ បណ្ឌិត​ច្នៃ​ម៉ូដ ឯម រៀម តែងតែ​ឮ​ពាក្យ​បង្អាប់ និង​មិន​ពេញចិត្ត​ពី​អ្នកដទៃ តែ​សម្រាប់​ម្ដាយ និង​ក្រុម​គ្រួសារ​របស់​លោក តែងតែ​ផ្ដល់​កម្លាំងចិត្ត និង​ពេញចិត្ត​ចំពោះ​ភាព​ច្នៃប្រឌិត​របស់​លោក។

ងាក​មក​ចាប់​អារម្មណ៍​ពី​ជីវិត​ឯកជន​របស់​អ្នក​ច្នៃ​ម៉ូដ ឯម រៀម វិញ បន្ទាប់ពី​បញ្ចប់​ការ​សិក្សា​ថ្នាក់​បរិញ្ញាបត្រ​ផ្នែក​គំនូរ​នៅ​ប្រទេស​កម្ពុជា ក្នុង​ឆ្នាំ ២០០០ លោក​ទទួល​បាន​អាហារូបករណ៍​ទៅ​សិក្សា​ផ្នែក​គ្រឿង​សង្ហារិម​ឯ​ប្រទេស​បារាំង។ នៅ​ប្រទេស​បារាំង លោក​សិក្សា​បាន ៦ ឆ្នាំ គឺ ថ្នាក់​បរិញ្ញាបត្រ ៥ ឆ្នាំ និង​ថ្នាក់​បណ្ឌិត ១ ឆ្នាំ។ លោក ឯម រៀម រៀន​ផ្នែក​ច្នៃ​ម៉ូដ​គ្រឿង​សង្ហារិម ហើយ​នៅ​មហាវិទ្យាល័យ​នោះ​មាន ផ្នែក​ក្រណាត់ FASHION ដោយ​ក្នុង​ថ្នាក់រៀន​មាន​និស្សិត​ប្រហែល ១៥ នាក់ ជំនាញ​ខុសៗ​គ្នា។

បណ្ឌិត​ច្នៃ​ម៉ូដ ឯម រៀម មិន​ត្រឹម​តែ​មាន​ភាព​ប៉ិនប្រសព្វ​ប៉ុណ្ណោះ​ទេ ប៉ុន្តែ​រាល់​ការ​ច្នៃ​ម៉ូដ លោក​តែងតែ​គិតគូរ​ដល់​វត្ថុធាតុដើម និង​ផល​ប៉ះពាល់​ដល់​បរិស្ថាន។

ឆ្នាំ ២០១៥ បណ្ឌិត​ច្នៃ​ម៉ូដ ឯម រៀម បាន​យក​សំលៀកបំពាក់​ធ្វើ​ពី​ស្រទាប់​ចេក​ទៅ​ដាក់​បង្ហាញ​ក្នុង​កម្មវិធី​ពិព័រណ៍​នៅ​ឯ​ប្រទេស អ៊ីតាលី ហើយ​ត្រូវ​បាន​ជ្រើសរើស​ដាក់​តាំង​បង្ហាញ​នា​ទីនោះ​តែម្ដង។

នៅ​ឆ្នាំ ២០១៧ លោក​ទទួល​បាន​ពានរង្វាន់​ផ្នែក​ហត្ថកម្ម​ចម្លាក់​ធ្វើ​អំពី​ផ្ដៅ អ​រូបិយ ធ្វើ​ដោយ​ដៃ ក្នុង​កម្មវិធី «Asian actress» នា​ប្រទេស​ថៃ​ទៀត​ផង។

ចំពោះ​ជីវិត​គូ​វិញ លោក ឯម រៀម មាន​ភរិយា ២ នាក់ និង កូន ២ នាក់ ដោយ​ម្ដាយ​មួយ មាន​កូន​មួយ​។ កូនប្រុស​ច្បង​អាយុ ១១ ឆ្នាំ ឯ​កូនស្រី​ជា​ប្អូន​អាយុ ៩ ឆ្នាំ។ លោក ឯម រៀម ជា​អ្នក​ផ្ដល់​អាហារកិច្ច​ដល់​អ្នក​ទាំង ៤ នាក់ ដែល​(​រស់នៅ​ផ្ទះ​ពីរ​ផ្សេងគ្នា​)។

បណ្ឌិត​ច្នៃ​ម៉ូដ លេចធ្លោ ទាក់ទាញ ប្លែក​គេ ឯម រៀម មាន​វ័យប្រមាណ ៥៣ ឆ្នាំ ហើយ​។ លោក ឯម រៀម ទោះ​បាន​ប្រឡូក​ក្នុង​វិស័យ​នេះ​តាំងពី​ឆ្នាំ ១៩៩៧ ក្ដី តែ​លោក​នៅតែ​មានចិត្ត​ស្រឡាញ់​វិស័យ​នេះ៕

អត្ថបទ ៖ ពិសី

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម