ជនជាតិសិង្ហបុរីម្នាក់ជាប់គុក ២៩ ឆ្នាំ ពីបទបណ្ដោយឲ្យបុរស ៥ នាក់រំលោភប្រពន្ធរបស់ខ្លួន

បុរសម្នាក់ដែលជាជនល្មើសធំបំផុតក្នុងករណីចែកគ្នារំលោភប្រពន្ធនៅប្រទេសសិង្ហបុរីត្រូវតុលាការកាត់ទោសឲ្យជាប់ពន្ធនាគារ ២៩ ឆ្នាំ និងវាយ ២៤ រំពាត់ កាលពីថ្ងៃព្រហស្បតិ៍ ទី០៤ ខែឧសភា កន្លងផុតទៅ ។ 

ក្នុងករណីនេះមានជនល្មើសសរុប ៦ នាក់ ពួកគេស្គាល់គ្នាដំបូងក្នុងឆ្នាំ ២០១០ តាមបណ្ដាញសង្គមអនឡាញ ហើយបានធ្វើការចែករំលែកពីចំណង់ផ្លូវភេទគឺផ្លាស់ប្ដូរវេនគ្នារំលោភប្រពន្ធទៅវិញទៅមក ។

បុរសវ័យ ៤២ ឆ្នាំជនជាតិសិង្ហបុរីដែលជាមេខ្លោងបានរួមគំនិតជាមួយបុរស ៥ នាក់ទៀតក្នុងការដាក់ថ្នាំប្រពន្ធរបស់ពួកគេហើយរំលោភអស់រយៈពេល ៨ ឆ្នាំមកហើយ ទន្ទឹមនោះគាត់ក៏បានរួមគំនិតជាមួយបុរស ២ នាក់ដើម្បីរំលោភប្រពន្ធនិងអតីតប្រពន្ធផងដែរ ។ អ្នកទាំង ៦ មិនត្រូវបានបញ្ចេញឈ្មោះនោះទេ ដូច្នេះគេតំណាងឈ្មោះពួកគេជាអក្សរ ក ខ គ ឃ ង ច វិញ ។ 

បុរស “ក” ជាជនល្មើសសំខាន់បំផុតក្នុងរឿងក្ដីខាងលើ ជាក់ស្ដែងលោក “ក” ធ្លាប់សុំប្រពន្ធរួមភេទ ៣ នាក់ដែរ ប៉ុន្តែនាងមិនព្រមទើបបែកគំនិតដាក់ថ្នាំរួចហៅគេមករំលោភជុំគ្នាតែម្ដង សំណាងអាក្រក់អ្នកស្រីក៏ដឹងខ្លួនចំពេលប្ដីកំពុងគេងលក់ក៏ឃើញវីដេអូដែលលាតត្រដាងការពិតគ្រប់យ៉ាងទៅ ។

យោងតាមការសារភាពបានឲ្យដឹងថាលោក “ក” ធ្វើបែបនេះព្រោះប្រពន្ធធ្លាប់លួចផិតក្បត់ក្នុងឆ្នាំ ២០១០ និងឆ្នាំ២០១៤ បច្ចុប្បន្នគាត់កំពុងទទួលការ​ប្រឹក្សា​ផ្នែក​វិកលចរិត​ក្នុង​ពន្ធនាគារផងដែរ ។

ចំណែកលោក “ច” ត្រូវបានកាត់ទោសមុនគេបង្អស់គឺក្នុងខែមករា ឆ្នាំ២០២២ ។ បន្ទាប់មកលោក ខ គ ឃ ង ក៏ត្រូវបានកាត់ទោសឲ្យជាប់គុកដូចគ្នា ចន្លោះពី ១៣ ឆ្នាំ ៦ ខែ ទៅ ២២ ឆ្នាំ តាំងពីខែវិច្ឆិកា ឆ្នាំ២០២២ មកម្ល៉េះ ។ ក្នុងនោះបុរសបីនាក់បានទទួលពិន័យ ២០ រំពាត់ ខណៈម្នាក់ទៀតរួចខ្លួនព្រោះគាត់មានអាយុលើស ៥០ ឆ្នាំហើយ ៕ 

ប្រភព ៖ scmp

ចុចអាន ៖ ចាប់ខ្លួនក្មេងប្រុសពីរនាក់ រួមគំនិតឆក់ខ្សែកមាសពីហាងគ្រឿងអលង្ការនៅ សិង្ហបុរី