ព័ត៌មានអន្ដរជាតិ

សិង្ហបុរីទិញសព្វាវុធធុនធ្ងន់និងស្រាលក្នុងតម្លៃ ២.៣ប៊ីលានដុល្លារពីអាមេរិក

បានផុស

៦ ខែ មុន

នៅ

ថ្ងៃពុធ ២១ មករា ២០២៦

ដោយ

សហរដ្ឋអាមេរិកបានយល់ព្រមលើការលក់សព្វាវុធចំនួន ២.៣ប៊ីលានដុល្លារ ទៅឱ្យប្រទេសសិង្ហបុរី ដែលរួមមានយន្តហោះឈ្លបយកការណ៍ប្រភេទ P-៨A Poseidon យន្តហោះចម្បាំងធុនស្រាល និងប្រព័ន្ធការពារដែនអាកាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសអាមេរិកបានជូនដំណឹងដល់សភាអាមេរិកអំពីការលក់សព្វាវុធនេះ កាលពីថ្ងៃពុធ។ នេះបើយោងតាមសេចក្តីថ្លែងការណ៍នៅលើគេហទំព័រទីភ្នាក់ងារសហប្រតិបត្តិការសន្តិសុខការពារជាតិ (DSCA) ។

DSCA លើកឡើងថា៖«ការលក់នេះនឹងអនុញ្ញាតឱ្យសិង្ហបុរី អាចការពារខ្លួនពីការគំរាមកំហែងនាពេលបច្ចុប្បន្ន និងអនាគតដោយផ្តល់នូវកម្លាំងដែនសមុទ្រដែលអាចជឿទុកចិត្តបាន ពិសេសអាចរារាំងសត្រូវ ពីការយាយីនានា»។

សេចក្ដីថ្លែងការណ៍បានបន្ដថា ការលក់ដែលបានស្នើឡើងនេះ នឹងពង្រឹងគោលនយោបាយការបរទេស និងគោលដៅសន្តិសុខជាតិរបស់សហរដ្ឋអាមេរិក។ តាមរយៈការកែលម្អសន្តិសុខនៃដៃគូយុទ្ធសាស្ត្រ ដែលជាកម្លាំងដ៏សំខាន់សម្រាប់ស្ថិរភាពនយោបាយ និងវឌ្ឍនភាពសេដ្ឋកិច្ចនៅអាស៊ី។

លោក Ian Chong អ្នកវិទ្យាសាស្ត្រនយោបាយ បានប្រាប់សារព័ត៌មាន Al Jazeera ថា៖«យន្តហោះល្បាតត្រូវបានប្រើដើម្បីការពារ ផ្លូវសមុទ្រដែលលាតសន្ធឹង និងផ្លូវទឹកដ៏មមាញឹករបស់សិង្ហបុរីនៅអាស៊ីអាគ្នេយ៍»។

រីឯ រដ្ឋមន្ត្រីការពារជាតិសិង្ហបុរី លោក Chan Chun Sing បានប្រកាសពីគម្រោងទិញយន្តហោះអាមេរិក នៅក្នុងខែកញ្ញា បន្ទាប់ពីជំនួបជាមួយរដ្ឋមន្ត្រីការពារជាតិ Pete Hegseth នៅមន្ទីរបញ្ចកោណ សហរដ្ឋអាមេរិក។

យោងតាមក្រសួងការបរទេសអាមេរិកបានឱ្យដឹងថា សហរដ្ឋអាមេរិកលក់សព្វាវុធក្នុងតម្លៃទឹកប្រាក់ចំនួន ៨.៣៨ប៊ីលានដុល្លារ ឱ្យរដ្ឋាភិបាលសិង្ហបុរី ជាពិសេសអាមេរិកមានចាប់ពីគ្រាប់បែក រហូតដល់យន្តហោះចម្បាំង F-៣៥ ។

ចំណែកក្រសួងការពារជាតិប្រទេសសិង្ហបុរីបានឱ្យដឹងថា ប្រទេសសិង្ហបុរីនឹងទទួលយន្តហោះដំបូងពីការបញ្ជាទិញពីអាមេរិកចំនួន២០ ម៉ាក F-៣៥s នៅចុងឆ្នាំនេះ។

គួរឱ្យដឹងផងដែរថា សហរដ្ឋអាមេរិក និងសិង្ហបុរីសហការគ្នាលើបញ្ហាសន្តិសុខជាច្រើន ហើយយោធារបស់ពួកគេតែងតែធ្វើសមយុទ្ធហ្វឹកហាត់រួមគ្នា៕

ប្រែសម្រួល៖ ណឺ មិនា