ជីវិតកម្សាន្ដ

ចាន់ សុផានី បន្តបើកកកាយរឿងអតីតស្វាមីគ្មានទំនួលខុសត្រូវលើកូនស្រី

បានផុស

៤ ខែ មុន

នៅ

ថ្ងៃពុធ ១០ ឧសភា ២០២៣

ដោយ

គិតមកដល់ពេលនេះ អតីតតារាសម្ដែង និងពិធីការិនីអ្នកនាង ចាន់ សុផានី បានឃ្លាតឆ្ងាយពីវិថីសិល្បៈច្រើនឆ្នាំមកហើយ ចាប់តាំងពីផ្ទុះរឿងរ៉ាវបែកបាក់ស្វាមីដែលជាតារាចម្រៀង គឺ លោក ហ្សូណូ ដោយបន្សល់ទុកកូនស្រីម្នាក់ឲ្យនាងជាអ្នករ៉ាប់រងការចិញ្ចឹមមើលថែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការពិតណាស់ បន្ទាប់ពីស្ពាយឈ្មោះជាស្ត្រីមេម៉ាយ អតីតតារាស្រីរូបនេះ មិនដែលត្អូញត្អែរស្រែករកជំនួយចិញ្ចឹមកូនស្រីទេ។ ប៉ុន្តែថ្មីៗនេះបានធ្វើឲ្យមានការភ្ញាក់ផ្អើល ខណៈអតីតតារាសម្ដែងអ្នកនាង ចាន់ សុផានី បានចេញមុខប្រកាសជាសាធារណៈសុំជំនួយពីអតីតស្វាមីក្នុងពេលដែលនាងកំពុងជួបការលំបាកខ្លាំងលើផ្នែកជីវភាពនាពេលបច្ចុប្បន្ននេះ។

យ៉ាងណាមិញទោះបីមានការប្រកាសស្វែងរកជំនួយពីស្វាមីពិតមែន តែរហូតមកទល់ពេលនេះ ពុំទាន់មានការឆ្លើយតបពីសំណាក់លោក ហ្សូណូ ដែលជាស្វាមី និងជាឪពុកនោះទេ។ ទង្វើនេះបានធ្វើឲ្យអ្នកនាង ចាន់ សុផានី កើតក្ដីមិនសុខចិត្ត ក៏ចេញមកបើកកកាយជាថ្មីពាក់ព័ន្ធរឿងរ៉ាវរបស់ស្វាមីរូបនេះ។ អ្នកនាងបានរៀបរាប់ថា «ស្រែកថាខ្លួនឯងចិត្តត្រជាក់ ខ្លួនឯងស្មោះត្រង់ ខ្លួនឯងមាសទឹកដប់ និងឲ្យតម្លៃគេណាស់ ភស្តុតាងក៏មាន ម្ដេចមានភស្តុតាងត្រង់ព្រួតគ្នាជេរដៀលខ្ញុំថាអ្នកឯងនឹងយកខ្ញុំជិតដប់ឆ្នាំអត់មានអ្វីនឹងមែន? នឹងឲ្យតម្លៃខ្ញុំមែន?»។

អ្នកនាង ចាន់ សុផានី បាននិយាយបន្តថា «នែ ខ្ញុំនេះបានហៅថាឲ្យតម្លៃ ព្រោះថាតាំងពីក្បាលអ្នកឯងឡើងមកនៅជាមួយខ្ញុំនឹងមានតែក្តបីទេ យល់? តែខ្ញុំមិនដែលនិយាយទេ ចិត្តត្រជាក់ អ្នកឯងនឹងគ្រាន់ជាអាងចំពោះអ្នកមិនដឹងទេ តែអ្នកឯងបានគំរាមប្ដឹងកូនខ្ញុំរួចហើយ មាសទឹកដប់អ្នកឯងសម្រាប់ពេលនេះបង្កើតកូនមកគ្មានភាពទទួលខុសត្រូវ រត់ទៅសម្ងំសុខតែឯង ហើយថាខ្លួនឯងមាសទឹកដប់ ខ្លួនឯងនឹងស្មោះត្រង់ សូម្បីប្រពន្ធកូនខ្លួនឯងដេកឱបនឹងទ្រូងក៏ក្បត់ ហើយឲ្យតម្លៃគេណាស់ បណ្ដោយឲ្យកូនវេទនា»។

អ្នកនាង ចាន់ សុផានី បន្តថា «អញ្ចឹងមែនក្នុងពេលអ្នកឯងព្យាយាមយកឥទ្ធិពល អ្នកឯងមកអួតសម្ញែងកូន ហើយប្រាប់កូនថា កុំឲ្យច្រណែននឹងភាពមានបានរបស់អ្នកឯង ខ្ញុំមើលថែកូនដប់ឆ្នាំនឹងកញ្ជើធ្លុះមែន បើមានចិត្តត្រជាក់មែននោះយកសតិខ្លួនឯងមកប្រើផង កុំត្រចៀកសពេក សូម្បីតែឆ្កែក៏វាចេះមើលថែកូនវាដែរ ហើយសូម្បីតែម៉ែរបស់លោកឯងនឹងក៏ចេះមើលថែលោកឯងឲ្យចោលកូនដែលជាឈាមរបស់លោកឯងដែរ។ អញ្ចឹងក្នុងនាមលោកឯងជាកូនប្រុសមានស្មារតីឡើងមិនមែនទៅសម្ដែងធ្វើស្រឡាញ់កូនគេដូចកម្សត់ណាស់នោះទេ កូនស្រីលោកឯងក៏រង់ចាំការស្រឡាញ់ពីលោកឯងដែរ ហើយកុំអាងលេសថាមានម្តាយកូនហាមមិនឲ្យជួប សូមទោសណាមិនដែលហាមសូម្បីតែម្ដង មានតែត្រេកអរជំនួសកូន បើអញ្ចឹងមែននោះ។ ចំណាំកុំឲ្យស្រីលោកឯងមកពាក់ព័ន្ធក្នុងរឿងនេះ ព្រោះនេះជារឿងលោកឯង និងកូនអ្នកឯង»។

គួររម្លឹកដែរថា អ្នកនាង ចាន់ សុផានី ថ្មីៗនេះ បានទម្លាយអារម្មណ៍លំបាកនៅលើបណ្ដាញសង្គមឲ្យ មហាជនបានដឹងថា បច្ចុប្បន្ននាងកំពុងតែជួបការលំបាក និងខ្វះខាត។ ក្នុងនោះដែរ កូនស្រីអ្នកនាងកំពុងប្រឈមនឹងជំងឺបាក់ទឹកចិត្ត ហើយចង់ជួបមុខឪពុក គឺតារាប្រុសលោក ហ្សូណូ ប៉ុន្តែមិនអាចឲ្យពួកគេទំនាក់ទំនងបានទេ៕

អត្ថបទ ៖ ចាន់រ៉ា