ជីវិតកម្សាន្ដ

តារាកំប្លែង ខ្ញុង បញ្ជាក់អាការជំងឺ ក្រោយអ្នកគាំទ្រព្រួយបារម្ភ

បានផុស

៤ ម៉ោង មុន

នៅ

ថ្ងៃចន្ទ ១៥ ឧសភា ២០២៣

ដោយ

តារាកំប្លែងអ្នកនាង ស្រេង សុកាន់ដា ហៅ ខ្ញុង បានធ្វើឲ្យមហាជន និងអ្នកគាំទ្រ បង្ហាញការព្រួយបារម្ភ បន្ទាប់ពីដឹងថានាងបានធ្លាក់ខ្លួនឈឺដោយសារការពុលអាហារធ្ងន់ធ្ងរ។ ជាមួយគ្នានេះ ក៏មានអ្នកគាំទ្រមួយចំនួនបានសួរសុខទុក្ខតារាស្រីរូបនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាកដណាស់បើតាមការកត់សម្គាល់ តារាកំប្លែងស្រីសម្ដីចាក់ទឹកមិនលេច អ្នកនាង ស្រេង សុកាន់ដា ហៅខ្ញុង សម្រាប់ជីវិតរបស់នាងនាពេលបច្ចុប្បន្ន ហាក់ជួបរឿងរ៉ាវចាក់ស្រេះជាច្រើននៅក្នុងវិថីជីវិត ពោលគឺចាប់តាំងពីទម្លាយបំណុលជាងកន្លះលានដុល្លារមកម្ល៉េះ។ ចាប់អារម្មណ៍នៅដើមខែឧសភា ឆ្នាំ ២០២៣ នេះ អ្នកនាង ខ្ញុង ក៏ទើបជួបរឿងស៊យផ្ទួនៗគ្នា ចំនួន ២ ដង មកហើយដែរ។

ដោយឡែកកាលពីថ្មីៗនេះ តារាកំប្លែង ខ្ញុង បានធ្វើឲ្យអ្នកគាំទ្រសម្ដែងការបារម្ភចំពោះបញ្ហាសុខភាពរបស់នាង បន្ទាប់ពីដឹងថា ខ្ញុង មានអាការឈឺធ្ងន់។ ឆ្លើយតបការព្រួយបារម្ភនេះ អ្នកនាង ខ្ញុង បានចេញមកបញ្ជាក់ថា នាងបានធូរវិញហើយ ហើយពុលលើកនេះគឺធ្ងន់ធ្ងរណាស់ ដល់ថ្នាក់ធ្វើឲ្យនាងភ័យមិនស្ទើរឡើយ។

អ្នកនាង ខ្ញុង បាននិយាយថា «រាងធូរបន្តិចហើយ ល្ងាចអាចឡាយលក់វិញបានហើយបងប្អូន កុំចេះតែឃ្លានតាមចង់ (ពុលបន្លែឆៅ) លក្ខណៈទ្រង់ទ្រាយធំ អត់ដែលទេ លើកទីមួយហើយ ភ័យណាស់បងប្អូនអើយ ខ្លាចទៅចោលលុយគេ នៅជំពាក់គេច្រើនណាស់»។

គួររម្លឹកដែរថា អ្នកនាង ស្រេង សុកាន់ដា ហៅ ខ្ញុង កន្លងទៅបានលង់ខ្លួនក្នុងបំណុលខ្ទង់កន្លះលានដុល្លារអាមេរិក កាលពីថ្មីៗកន្លងមកនេះនាងទើបតែបានប្រកាសបង្ហាញនូវក្តីសង្ឃឹមរបស់ខ្លួនថា ក្នុងឆ្នាំនេះនាងនឹងដោះស្រាយរួចរាល់គ្រប់បញ្ហាដែលកំពុងកើតមានឡើង។

ការប្រកាសពីក្តីសង្ឃឹមរបស់តារាកំប្លែង ខ្ញុង នេះ បានធ្វើឲ្យអ្នកគាំទ្រយល់ឃើញថា ស្រីខ្ញុង បានបង្ហាញផ្លូវអាចដោះស្រាយនូវរឿងរ៉ាវដែលចាក់ស្រេះកន្លងមកតាមរយៈការដោះបំណុល និងចាប់យកការសាងជីវិតជាថ្មីឡើងវិញជាមួយក្តីសង្ឃឹមរបស់នាង និងក្រុមគ្រួសារ។ បញ្ហានេះដែរ ក៏បានធ្វើឲ្យមហាជនសម្ដែងការអបអរចំពោះនាងផងដែរ៕

អត្ថបទ ៖ ចាន់រ៉ា