ជីវិតកម្សាន្ដ

នាដការី សុគា គឹមលាង ចាត់ទុកទង្វើអ្នកស្នងរូបព្រះនាងឥន្ទ្រទេវីជាការបំភ្លៃបំផ្លិចបំផ្លាញវប្បធម៌

បានផុស

២ years មុន

នៅ

ថ្ងៃសុក្រ ១២ មករា ២០២៤

ដោយ

សិល្បការិនីដ៏ឆ្នើម(នាដការី) កញ្ញា សុគា គឹមលាង ហៅ កូនអាន់ បានចេញមកបញ្ចេញទស្សនៈដោយចាត់ទុកថាទង្វើអ្នកស្នងរូបព្រះនាងឥន្ទ្រទេវីជាការបំភ្លៃបំផ្លិចបំផ្លាញវប្បធម៌អរិយធម៌ខ្មែរ ខណៈនាងជឿថាព្រះនាងមិនចូលសណ្ឋិតក្នុងរូបអ្នកស្នងណាងាយៗ ទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់ស្រីស្អាត សុគា គឹមលាង ក្រោយពេលថ្មីៗ នេះ ផ្ទុះនូវរឿងរ៉ាវស្ត្រីលក់អនឡាញដែលតាំងខ្លួនជាអ្នកស្នងរូបព្រះនាងឥន្ទ្រទេវីពុំទាន់មានភាពស្ងប់ស្ងាត់នៅឡើយ ខណៈមហាជនមួយចំនួនធំក៏កំពុងរង់ចាំតាមដានមើលចំណាត់ការក្រសួងវប្បធម៌លើករណីនេះ។

នាដការី សុគា គឹមលាង បានលើកឡើងតាមរយៈការបង្ហោះខ្លឹមសារថា «ក្នុងនាមខ្ញុំជានាដការីរបាំបុរាណម្នាក់ ពិតជាមានកិត្តិយសពេលដែលអ្នកគ្រូ លោកគ្រូ និងថ្នាក់ដឹកនាំផ្តល់ឱកាសឲ្យនាងខ្ញុំគ្រងនូវសម្លៀកបំពាក់តំណាង នៃទ្រង់«ព្រះនាងជ័យរាជទេវី និងព្រះនាងឥន្ទ្រទេវី» សម្រាប់សម្តែងនូវចម្រៀងរបាំវរក្សត្រីយ៍ ក្នុងកម្មវិធីរបស់ថ្នាក់ដឹកនាំប្រទេស ខ្ញុំសែនគោរព ប្រណិប័តន៍រៀបឥរិយាបថ រៀបឫករៀបពៀរ ស្មិងស្មាធិ៍អារម្មណ៍ សមជាម្ចាស់ក្សត្រីប្រចាំព្រះមហានគរ»។

នាងបានបន្តថា «ពេលខ្ញុំសម្តែងរបាំជាតួអង្គតំណាងព្រះនាងម្តងៗ ខ្ញុំតែងរៀបបាយសីថ្វាយព្រះអង្គ ដើម្បីសុំសេចក្តីសុខ និងរំលឹកគុណគ្រូចាស់ព្រឹទ្ធាចារ្យដែលបានបង្ហាត់បង្រៀនពីសាលាមធ្យមវិចិត្រសិល្បៈ នៃក្រសួងវប្បធម៌ និងវិចិត្រសិល្បៈ ដូច្នេះគឺត្រឹមតែស្លៀកសម្លៀកបំពាក់ ហើយសម្តែងរបាំជាតួអង្គតំណាងព្រះនាងគឺពិតជាអស្ចារ្យលើសលប់ពេកហើយសម្រាប់ខ្ញុំ»។

កញ្ញា សុគា គឹមលាង បញ្ជាក់បន្ថែមថា នាងជឿជាក់ថាព្រះនាងមិនចូលសណ្ឋិតក្នុងរូបអ្នកស្នងណាដោយងាយៗ ទេ ព្រោះទ្រង់មានឫទ្ធិបារមីខ្លាំងណាស់ ដូច្នេះសូមកុំតាំងខ្លួនជាព្រះនាងឲ្យសោះ បើមិនបានជួយថែរក្សា ក៏កុំបំភ្លៃ បំផ្លិចបំផ្លាញវប្បធម៌ និងអរិយធម៌ដែលជាតិសាសន៍នានាគោរព និងឲ្យតម្លៃ។

ប្រាកដណាស់សិល្បការិនីដ៏ឆ្នើម ឬ នាដការីកញ្ញា សុគា គឹមលាង ហៅ កូនអាន់ កន្លងមក ត្រូវបានទស្សនិកជនដឹងថា នាងតែងមានភាពលេចធ្លោលើសកម្មភាពផ្សព្វផ្សាយវប្បធម៌សិល្បៈខ្មែរ។ តួយ៉ាងថ្មីៗ នេះ សុគា គឹមលាង ក៏បានចេញមុខប្ដេជ្ញាចូលរួមផ្សព្វផ្សាយវប្បធម៌អរិយធម៌កេរ្តិ៍មរតកដូនតាខ្មែរមិនអាចឲ្យស្លាប់ទេ៕

អត្ថបទ ៖ ចាន់រ៉ា