ជីវិតកម្សាន្ដ

ភាពយន្តរឿង «រាជិនីសំឡេងមាស» ល្ខោនតន្ត្រីខ្មែរដំបូងនឹងលេចរូបរាងឆាប់ៗ

បានផុស

២ years មុន

នៅ

ថ្ងៃសៅរ៍ ៩ មីនា ២០២៤

ដោយ

ល្ខោនតន្ត្រីរសជាតិថ្មីដែលដឹកនាំផលិតរៀបរាប់ពីវិថីសិល្បៈ និងស្នាដៃច្រើនរាប់មិនអស់របស់វីរសិល្បករ សិល្បការិនី ២រូប គឺអធិរាជសំឡេងមាស ស៊ីន ស៊ីសាមុត និងរាជិនីសំឡេងរៃមាសកណ្ដឹង រស់ សេរីសុទ្ធា កំពុងស្ថិតក្នុងដំណាក់កាលផលិត និងត្រៀមបង្ហាញទស្សនីយភាពអស្ចារ្យតាមរយៈការសម្ដែងលើឆាក នៅអំឡុងខែ មិថុនា ពាក់កណ្ដាលឆ្នាំនេះ។ នេះជាស្នាដៃ ល្ខោនតន្ត្រីដំបូងបំផុតរបស់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបនឹងសំណួរអ្នកសារព័ត៌មាន លោក សុខ វិសាល ផលិតករនៃគម្រោងល្ខោនតន្ត្រីអធិរាជសំឡេងមាស លោកថា៖ “ជាក្ដីគោរពនិងរម្លឹកដល់វីរសិល្បករយើង យើងសម្រេចយកថ្ងៃ ០៨ មីនា ទិវានារីអន្តរជាតិនេះជាថ្ងៃប្រកាសពីគម្រោងដំណើរការផលិតល្ខោននេះ ជាពិសេសដល់លោកស្រីរស់ សេរីសុទ្ធា ហើយខ្ញុំជឿថា ល្ខោនតន្ត្រីនេះនឹងជា ទស្សនីយភាពដែលយើងគ្រប់គ្នាគួរទស្សនា និងទទួលបទពិសោធន៍ថ្មី”។

ហែលឆ្លងបទពិសោធន៍ច្រើនឆ្នាំក្នុងនាមជាផលិតករ និងទទួលឱកាសចូលរួមផលិតក្ដី តែលោក សុខ វិសាល ទទួលស្គាល់ និងបញ្ជាក់ថា ការផលិតល្ខោននេះ ជាគម្រោងផលិតទី១ ហើយ ព្រោះលោកធ្លាប់តែផលិតកុន មិនមែនល្ខោន។ លោកបន្តថា៖ “នេះជាបោះជំហាន ឈានទៅចាប់ផ្ដើមផលិត បង្កើតសមិទ្ធផលដែលឆ្លុះបញ្ចាំង និងមានសារៈសំខាន់ណាស់ចំពោះសិល្បៈវប្បធម៌ខ្មែរ។”

“រាជិនីសំឡេងមាស” កើតចេញពីសេចក្ដីស្រឡាញ់ ស្ងើចសរសើរ ពីសមត្ថភាពរបស់កំពូលវីរសិល្បករជំនាន់ទសវត្សទី ៦០-៧០ របស់ផលិតករអាមេរិកលោក Gregory Cahill។ គំនិតដើមនៃ “រាជិនីសំឡេងមាស” ដែលរៀបរាប់ពីជីវិតពិតនិងវិថីសិល្បៈរបស់អធិរាជសំឡេងមាស ស៊ីន ស៊ីសាមុត និងលោកស្រី រស់ សេរីសុទ្ធា គឺលោកចាប់ផ្ដើមសរសេរ សាច់រឿងផលិតជាភាពយន្ត ឬល្ខោនទៅហើយតាំងពីឆ្នាំ ២០០៥ តែដោយសារកត្តាដើមទុនផលិតខ្វះខាតទើបលោកប្ដូរទិសដៅទៅចងក្រងសរសេរជាសៀវភៅដែលមានរូបភាពជំនួសវិញ។

សុខ វិសាល មិនមែនជាផលិតករតែមួយរូបផលិតល្ខោនតន្ត្រីរាជនីសំឡេងមាសទេ តែនឹងរួមគ្នាជាមួយផលិតករចាស់វស្សាបទពិសោធន៍ទាំងក្នុងនិងក្រៅ ស្រុក សួង សុភ័ក្រ ដែលនឹងចាប់ដៃគ្នាសម្រេច វណ្ណកម្មនេះឡើងនាពេលខាងមុខ។

“នេះជាថ្ងៃចាប់ផ្ដើមបន្ទាប់ពី១ឆ្នាំ នៃសៀវភៅរចនា ទៅផលិតជាល្ខោនតន្ត្រី។ ខ្ញុំរំភើបណាស់”។ នេះជាលើកឡើងរបស់សហផលិតករ សួង សុភ័ក្រ។