ភាពយន្តរឿង «ត្រកូលអ្នកដុតខ្មោច» ជាប់ជារឿងលក់ដាច់ជាងគេលើ APP Angkor DC ក្នុងខែនេះ

លោក លៀក លីដា ម្ចាស់ផលិតកម្ម LD នៅព្រឹកថ្ងៃពុធនេះ បានប្រកាសពីរឿងដែលលក់ដាច់ជាងគេសម្រាប់ខែតុលា ដោយបញ្ជាក់ថា ភាពយន្តរឿង «ត្រកូលអ្នកដុតខ្មោច» ដែលជាការដឹកនាំសម្តែងដោយ Beng Chhon (ហៅ ពូត្រូល) រួមសហការជាមួយ Mediaload Pictures នោះ ជាប់ជារឿងលក់ដាច់ជាងគេលើ APP Angkor DC ។

ភាពយន្តនេះ ជាស្នាដៃផលិតរបស់ The Troll Cambodia (TTC) ដឹកនាំដោយពូត្រូល និងសម្តែងដោយក្រុមសម្តែងដ៏មានប្រជាប្រិយលើបណ្តាញសង្គម You Tube របស់លោកផ្ទាល់ និងត្រូវបានយកមកចាក់បញ្ចាំងតាមរោងភាពយន្តកាលពីអំឡុងខែសីហាកន្លងទៅ ក្រោមការវិនិយោគរបស់លោក អុិន វិចិត្រ ចាងហ្វាងផលិតកម្ម Mediaload Pictures ។

គួរឱ្យដឹងដែរថា ភាពយន្តរឿង «ត្រកូលអ្នកដុតខ្មោច» បានជាប់កំណត់ត្រាជារឿងដែលមានទស្សនិកជនគាំទ្រ និងទទួលបានការកក់សំបុត្រទស្សនាមុនថ្ងៃចាក់បញ្ចាំងច្រើនជាងគេបំផុតក្នុងឆ្នាំនេះ។ នេះបើតាមការបញ្ជាក់របស់ Mediaload Picture កាលពីថ្ងៃទី១៤ ខែសីហា ឆ្នាំ២០២៥។

ចំណែកឯចំណូល ២០% ពីការលក់សំបុត្រចូលទស្សនារឿងនេះវិញ ក៏ត្រូវបានប្រកាសថាបរិច្ចាគជូនវីរកងទ័ពជួរមុខកម្ពុជាផងដែរ។