បវរកញ្ញាកម្ពុជា ឡូយ ច័ន្ទរស្មី មិនអាចចូល Top ណាមួយក្នុងការប្រកួត Miss International 2024

អ្នកនិយមតាមដានវិស័យបវរកញ្ញានៅកម្ពុជា បានបង្ហាញការចូលរួមសោកស្តាយ ខណ:ដែលបវរកញ្ញាតំណាងកម្ពុជាកញ្ញា ឡូយ ច័ន្ទរស្មី មិនអាចមានឱកាសបានចូលទៅដល់ក្នុង Top ណាមួយនៃការប្រកួត Miss international 2024 នៅប្រទេសជប៉ុនឡើយ ឯតំណែងម្ចាស់មកុដ គឺបានទៅលើបវរកញ្ញាតំណាងប្រទេសវៀតណាម។

ថ្វីត្បិតយ៉ាងនេះក៏ពិតមែន តែសម្រាប់កញ្ញា ឡូយ ច័ន្ទរស្មី ឃើញថា កញ្ញានៅតែរក្សាបានការគាំទ្រនិងលើកទឹកចិត្តពីសំណាក់ប្រជាជនកម្ពុជា បន្ទាប់ពីបវរកញ្ញារូបនេះ បាននាំយកវប្បធម៌និងឈុតតំណាងជាតិទៅបង្ហាញនៅលើឆាកអន្តរជាតិដើម្បីឲ្យពិភពលោកបានស្គាល់កាន់តែច្បាស់នូវអរិយធម៌-វប្បធម៌ខ្មែរ។

ជាមួយគ្នានេះ សម្រាប់អ្នកគាំទ្រមួយចំនួនទៀត នៅតែបន្តការលើកទឹកចិត្តនិងយល់ឃើញដែរថា ស្រីស្អាត ឡូយ ច័ន្ទរស្មី គឺនៅតែជា Miss តំណាងឲ្យកម្ពុជាដែលធ្វើបានល្អ បើទោះបីមិនអាចចូលទៅក្នុង Top ណាមួយក៏ពិតមែន ដោយលើកឡើងថា “ចូលរួមសោកស្ដាយកញ្ញា ឡូយ ច័ន្ទរស្មី ដែលនាងមិនអាចក្ដោបឱកាសចូល Top ណាមួយ នៅក្នុងកម្មវិធីប្រកួត Miss international 2024 នៅប្រទេសជប៉ុន សម្រាប់ការខិតខំប្រឹងប្រែងដើម្បីកម្ពុជា”។

សូមបញ្ជាក់ថា ការប្រកួត Miss International ឆ្នាំ២០២៤ ដែលធ្វើឡើងនៅប្រទេសជប៉ុននៅក្នុងបរិវេណ Tokyo Done City Hall ត្រូវបានបញ្ចប់ដោយជោគជ័យ ដោយរកឃើញម្ចាស់មកុដបានទៅលើបវរកញ្ញា​វៀតណាម គឺ​កញ្ញា​ Huynh Thi Thanh Thuy មានវ័យ២២ឆ្នាំ ៕ អត្ថបទ៖ ចាន់រ៉ា