ជីវិតកម្សាន្ដ

ឌីជេ ក្តិប ស្តាយក្រោយដែលមិនទាន់បានបំពេញបំណងមួយឲ្យតារារ៉េប Ruthko

បានផុស

៥ ខែ មុន

នៅ

ថ្ងៃពុធ ៨ មករា ២០២៥

ដោយ

តារាចម្រៀងរ៉េបរៀមច្បង លោក ចាន់ សំណាង ហៅ ឌីជេ ក្តិប បង្ហាញអារម្មណ៍សោកស្ដាយ និងសុំទោសដល់វិញ្ញាណក្ខន្ធតារារ៉េប Ruthko ដែលខ្លួនមិនទាន់បានបំពេញបំណងរឿងមួយឲ្យផង ក៏ស្រាប់តែ Ruthko បានស្លាប់បាត់បង់ជីវិតទៅចោលទាំងអាល័យបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាកដណាស់នៅព្រឹកថ្ងៃទី ៨ ខែមករា ឆ្នាំ ២០២៥ នេះ សពរបស់តារាចម្រៀងរ៉េបល្បីឈ្មោះ លោក RuthKo ត្រូវបានរៀបចំពិធីបូជាតាមប្រពៃណីហើយ ដោយបន្សល់ទុកនូវក្តីសោកសង្រេង និងភាពសោកសៅក្រៀមក្រំបំផុតសម្រាប់ក្រុមគ្រួសារ មិត្តភ័ក្ដិ សិល្បករ-សិល្បការិនី ព្រមទាំងអ្នកគាំទ្ររបស់លោកជាច្រើនទៀត។

ដោយឡែកសម្រាប់ ឌីជេ ក្តិប ដែលជារៀមច្បងសិល្បៈ ក្រៅពីការសម្តែងអារម្មណ៍សោកស្ដាយ លោកក៏បានរៀបរាប់ថា «បើមានឱកាស បងនឹងបំពេញក្តីបំណង ១ នោះ របស់ប្អូន ជូនប្អូន ទោះបីជាប្អូនមិននៅ ក៏សំឡេងរបស់ប្អូននៅមានជាមួយបងជានិច្ច»។

តារាចម្រៀងរូបនេះបញ្ជាក់ទៀតថា «សុំទោសដែលបងមិនបានបំពេញបំណងប្អូនភ្លាមៗ ពេលដែលប្អូនស្នើសុំ (ទើបធ្វើឲ្យក្នុងពេលនេះបងមានអារម្មណ៍ស្ដាយក្រោយ)»។ ដំណឹង នៃការស្លាប់របស់តារារ៉េប លោក ដាវិឌឬទ្ធីរុទ្រ ហៅ RuthKo បានធ្វើឲ្យអ្នកសិល្បៈរួមអាជីព និងអ្នកគាំទ្រជាច្រើន សម្តែងក្តីស្លុតចិត្ត និងសោកស្ដាយជាខ្លាំងចំពោះការបាត់បង់ធនធានអ្នកសិល្បៈផ្នែកវិស័យចម្រៀងរ៉េបរូបនេះ។

តារាចម្រៀងរ៉េប Ruthko បានស្លាប់បាត់បង់ជីវិតភ្លាមៗ បន្ទាប់ពីបានជួបគ្រោះថ្នាក់ចរាចរណ៍ដ៏រន្ធត់រវាងម៉ូតូ និងរថយន្ត ខណៈរថយន្ដ Lexus RX 330 ពាក់ស្លាកលេខ ខ.ម 09.2-4771 បើកឆ្លងផ្លូវបុកមួយទំហឹងលើបណ្តោយផ្លូវ ៦០ ម៉ែត្រ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ កាលពីវេលាម៉ោង ១ និង ២៥ នាទី រំលងអធ្រាត្រ ឈានចូលថ្ងៃទី ៦ ខែមករា ឆ្នាំ ២០២៥៕

អត្ថបទ ៖ ចាន់រ៉ា