ពាក់មី ហួសចិត្តនឹងអ្នកប្រើរូបខ្លួន ប្រកាសលក់ផ្ទះបន្ទាន់ និងស្នើសាធារណជន កុំគាំទ្រទង្វើរកសុីបែបនេះ

នាយ ពាក់មី ហួសចិត្តនឹងម្ចាស់គណនីហ្វេសប៊ុកមួយឈ្មោះ​ ទឹកចិត្ត បងប្រុស បន្ទាប់ពីបានប្រើប្រាស់រូបរបស់លោក ប្រកាសលក់ផ្ទះបន្ទាន់ ដើម្បីតែប្រយោជន៍ផ្ទាល់ខ្លួន ហើយបង្កការយល់ច្រឡំដល់មហាជនថែមទៀត។ ទន្ទឹមនេះ លោកក៏បានស្នើដល់សាធារណជន កុំគាំទ្រអ្នករកសុីបែបនេះឱ្យសោះ។

តាមរយៈសំណេរលើបណ្តាញទំនាក់ទំនងសង្គម រសៀលថ្ងៃទី១៦ ខែមករា នេះ នាយ ពាក់មី បានចែករំលែករូបភាពរបស់គណនីខាងលើ ដែលបានប្រើប្រាស់រូបរបស់លោកកាន់ពាក្យប្រកាស “លក់ផ្ទះ បន្ទាន់ ” រួមនិងផ្ទះមួយខ្នងនៅទីតាំង ភូមិត្រាំស្លឹកខាងត្បូង សង្កាត់កន្ទោប ខណ្ឌកំបូល ខណៈផ្ទះមួយខ្នងនោះ ពុំមែនផ្ទះរបស់លោកឡើយ។

តារាកំប្លែងរូបនេះ មានការហួសចិត្តជាខ្លាំងនឹងទង្វើខាងលើ ហើយថែមទាំងបានចែករំលែករូបភាពនោះ ភ្ជាប់ដោយខ្លឹមសារថា “រកសុីខ្លួនឯង​ បែរជាយករូបខ្ញុំមកផុសជាមួយ​ ធ្វេីឱ្យមានការយល់ច្រឡំ​ សូមបងប្អូនកុំគាំទ្រអ្នករកសុីបែបនេះ​” ។

ពាក់ព័ន្ធនឹងរឿងរ៉ាវនេះ មហាជនដែលជាអ្នកគាំទ្រលោក ក៏បានសម្តែងការមិនពេញចិត្តផងដែរ និងចាត់ទុកថា ជាយុទ្ធទីផ្សារដ៏អសីលធម៌ ក៏ព្រោះតែហ៊ានកើបប្រយោជន៍ ដោយការកេងចំណេញលើអ្នកដទៃ៕