សិល្បៈទស្សនីយភាព ល្ខោនបាមោជ្ជទ័យ រឿង “កុលាបប៉ៃលិន” នឹងរៀបចំសម្តែងម្តងទៀត ខែក្រោយនេះ

សិល្បៈទស្សនីយភាព ល្ខោនបាមោជ្ជទ័យ រឿង “កុលាបប៉ៃលិន” នឹងរៀបចំសម្តែងជាថ្មីម្តងទៀត អំឡុងពាក់កណ្តាលខែក្រោយនេះ រយៈពេល៣ថ្ងៃ នៅសាលសន្និសីទចតម្មុខ។ នេះបើតាមការប្រកាសឱ្យដឹង ពីនាយកដ្ឋានសិល្បៈទស្សនីយភាព នារសៀលថ្ងៃទី៣០ ខែមករានេះ។

ការប្រកាសនេះ គឺក្រោយជោគជ័យក្នុងការរៀបចំសិល្បៈទស្សនីយភាពល្ខោនបាមោជ្ជទ័យ រឿងកុលាបបៃលិន យ៉ាងភ្លូកទឹកភ្លូកដី និងដោយមានសំណូមពរច្រើនពីមហាជនដែលមិនទាន់បានទស្សនា។ អាស្រ័យហេតុនេះ នាយកដ្ឋានសិល្បៈទស្សនីយភាព សម្រេចថានឹងរៀបចំការសម្តែងជាថ្មីម្តងទៀត រយៈពេល៣ថ្ងៃពេញ ចាប់ពីថ្ងៃទី១៤​ ដល់ ថ្ងៃទី១៦ ខែកុម្ភៈ ឆ្នាំ២០២៥ ខាងមុខនេះ ដោយនឹងសម្តែងជូនទស្សនានាវេលាម៉ោង ៥:៣០ល្ងាច ដដែល។

សូមជម្រាបថា «ល្ខោនបាមោជ្ជទ័យ» ជាទម្រង់សិល្បៈបុរាណខ្មែរបែបកម្សាន្ត ដែលបូករួមទាំងការសម្តែង និងការច្រៀង តាមរយៈបទភ្លេងរាប់រយបទ តាមទម្រង់ខ្មែរលាយបច្ចឹមប្រទេស ដែលបាត់វត្តមាន ៣៧ឆ្នាំទៅហើយលើឆាកសម្តែង និងមានបទចម្រៀងសរុបប្រមាណជាជាង ៥០០បទ ។

យ៉ាងណា ក្រោយបាត់វត្តមានជិត ៤០ឆ្នាំ លើឆាកសម្តែង លោកគ្រូអ្នកគ្រូដែលជាសាស្ត្រាចារ្យជំនាញ ក៏បានចងក្រងឱ្យរស់រានឡើងវិញតាមរយៈស្នាដៃរឿង “កុលាបប៉ៃលិន” ដោយមានការចូលរួមពីសំណាក់លោកគ្រូអ្នកគ្រូ និងសិល្បករសិល្បការិនីទម្រង់សិល្បៈបុរាណជាច្រើនរូបទៀត។

បើតាមការបញ្ជាក់ ទម្រាំចេញជារូបរាង «ល្ខោនបាមោជ្ជទ័យ» មួយរឿងនេះឡើងបាន គឺមានការរួមបញ្ចូលអ្នកសិល្បៈបុរាណច្រើនទម្រង់ ទាំងអ្នកល្ខោននិយាយ អ្នកល្ខោនបាសាក់ យីកេ អ្នករបាំ ក៏ដូជាគ្រូភ្លេងជាច្រើនរូប ដើម្បីញុាំងឱ្យទម្រង់សិល្បៈបុរាណមួយនេះមានភាពរស់រវើក។ ខណៈការសម្តែងដែលរៀបចំឡើងកាលពីថ្ងៃ២៣-២៦ មករា កន្លងទៅ គឺពិតជាទទួលបានការគាំទ្រយ៉ាងផុសផុល ដោយត្រឹមតែប៉ុន្មានម៉ោងប៉ុណ្ណោះ សំបុត្រទស្សនាសិល្បៈទស្សនីយភាព «ល្ខោនបាមោជ្ជទ័យ» រឿង”កុលាបប៉ៃលិន” ទាំង៤ថ្ងៃ លក់អស់គ្មានសល់។

ដោយឡែក សម្រាប់ព័ត៌មានលម្អិតទាក់ទងនឹងការរៀបចំសម្តែងសិល្បៈទស្សនីយភាពនេះ សូមទំនាក់ទំនងទៅកាន់ទូរស័ព្ទ និងតេលេក្រាមខាងក្រោម៖
-ប្រព័ន្ធស្មាត 081 336 182​ – https://t.me/DPA_01
-ប្រព័ន្ធ សេលកាត 061 335 182 – https://t.me/dpa2222
-ប្រព័ន្ធមិត្តហ្វូន 097 335 3310 – https://t.me/dpa3333

អត្ថបទ៖ សុធាវី