ព័ត៌មានអន្ដរជាតិ

មន្ទីរពេទ្យកាស៊ីណូដំបូងគេលើលោក បើកដំណើរការនៅ ម៉ាកាវ

បានផុស

៨ ខែ មុន

នៅ

ថ្ងៃពុធ ៨ តុលា ២០២៥

ដោយ

ទីក្រុង ម៉ាកាវ នៃប្រទេសចិនត្រូវបានគេប្រៀបប្រដូចទៅនឹង Las Vegas របស់សហរដ្ឋអាមេរិក ដោយសារតែភាពស៊ីវិល័យនិងជាមជ្ឈមណ្ឌលលេងល្បែងដ៏ធំបំផុតមួយនៅលើពិភពលោក ហើយអ្វីដែលកាន់តែអស្ចារ្យនាពេលនេះ ម៉ាកាវបានសាងកេរ្តិ៍ឈ្មោះល្បីល្បាញថែមមួយកម្រិតទៀត តាមរយៈការបើកដំណើរការមន្ទីរពេទ្យកាស៊ីណូដំបូងគេលើលោក។

កាស៊ីណូ Studio City (រូបថត៖ Melco Resorts)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ BBC នៅថ្ងៃពុធទី៨ខែតុលាឆ្នាំ២០២៥, មន្ទីរពេទ្យ iRad មានទំហំ ១ ៤០០ម៉ែត្រការ៉េ ស្ថិតនៅជាន់ទី២នៃកាស៊ីណូ Studio City ដែលគ្រប់គ្រងដោយក្រុមហ៊ុន Melco Resorts។

មន្ទីរពេទ្យនេះសាងសង់ឡើងក្រោមភាពជាដៃគូរវាងក្រុមហ៊ុន Melco និង iRad Medical Holding ដែលជាអ្នកផ្តល់សេវារោគវិនិច្ឆ័យឈានមុខមានមូលដ្ឋាននៅទីក្រុងហុងកុង។

វាគឺជាមន្ទីរពេទ្យទី១លើលោក ដែលត្រូវបានរួមបញ្ចូលទៅក្នុងកាស៊ីណូ ហើយវាផ្តល់ជូននូវសេវាកម្មវិនិច្ឆ័យរោគកម្រិតខ្ពស់ដូចជាការស្កែន MRI និងការស្កែន CT ជាដើម។ វាក៏បំពាក់នូវឧបករណ៍ថតកាំរស្មី X និង Ultrasound ផងដែរ។

លើសពីនេះ មន្ទីរពេទ្យថែមទាំងមានបន្ទប់វះកាត់ ការិយាល័យវេជ្ជបណ្ឌិត មន្ទីរពិសោធន៍ និងផ្នែកផ្សេងៗទៀតផង។ ដូច្នេះបានន័យថា ទេសចរអាចមកទីនេះ ដើម្បីមើលជំងឺក៏បាន ឬលេងល្បែងក៏បាន។

ក្រុមហ៊ុន Melco Resorts បាននិយាយក្នុងសេចក្តីថ្លែងការណ៍មួយថា គំនិតច្នៃបង្កើតនេះ គឺមានគោលបំណងទាក់ទាញភ្ញៀវទេសចរក្នុងតំបន់និងបរទេស ដោយលើកទឹកចិត្តឲ្យមានការស្នាក់នៅបានយូរ និងការចំណាយខ្ពស់នៅក្នុងកាស៊ីណូនិងទីក្រុងនេះ។

លោក Dennis Tam ប្រធានកិត្តិយសមន្ទីរពេទ្យ iRad លើកឡើងថា ម៉ាកាវ ដែលទាក់ទាញភ្ញៀវទេសចរជិត៤០លាននាក់ក្នុងមួយឆ្នាំៗ តែងផ្តល់ឱកាសដែលមិនអាចប្រៀបផ្ទឹមបាន ដើម្បីក្លាយជាគោលដៅនាំមុខគេសម្រាប់ទេសចរណ៍វេជ្ជសាស្រ្ត។ គម្រោងមន្ទីរពេទ្យនេះ គឺសមនឹងផែនការធ្វើពិពិធកម្មសេដ្ឋកិច្ចរបស់ម៉ាកាវ។

សូមជម្រាបថា កេរ្តិ៍ឈ្មោះម៉ាកាវ ចាប់ផ្តើមល្បីរន្ទឺនៅដើមទសវត្សរ៍ឆ្នាំ២០០០ ពេលដែលអាជ្ញាធរបើកទីផ្សារល្បែង ដល់ប្រតិបត្តិករកាស៊ីណូទូទាំងពិភពលោក។ ចាប់តាំងពីពេលនោះមក វាបានវ៉ាដាច់ Las Vegas ក្នុងការរកប្រាក់ចំណូលពីការលេងល្បែង ហើយ ម៉ាកាវ ក៏តស៊ូពង្រីកសេដ្ឋកិច្ចរបស់ខ្លួនលើសពីការកម្សាន្ត។

ដូចនេះ គោលដៅចម្បងរបស់មន្ទីរពេទ្យ iRad គឺផ្តោតលើទេសចរដែលចំណាយខ្ពស់ ជាពិសេសអ្នកមកពីចិនដីគោក និងអាស៊ីអាគ្នេយ៍៕

អត្ថបទ៖ សុខ សុវណ្ណ

ចុចអាន៖ ចិន ប្រកាសធ្វើសមយុទ្ធយោធាថ្មីជាមួយហុងកុង និងម៉ាកាវ នៅសមុទ្រខាងត្បូង