មិនមែនតែឯង! សូម្បីសមាជិកគ្រួសាររបស់លោកស្រី Angkana ក៏ត្រូវគេគំរាមដែរ

សមាជិកព្រឹទ្ធសភាថៃ Angkana Neelapaijit កាន់តែគ្មានសុវត្ថិភាពហើយ បន្ទាប់ពីមានអ្នកគំរាមគ្រួសារលោកស្រី ព្រោះតែការទម្លាយរឿងពិតជុំវិញបញ្ហាជម្លោះព្រំដែនកម្ពុជា-ថៃ។ នេះបើតាមការផ្សាយរបស់ Amarin កាលពីថ្ងៃព្រហស្បតិ៍ទី១៦ខែតុលាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈ Facebook គណនីមួយបាន Chat ទៅសមាជិកគ្រួសាររបស់លោកស្រីថា «ប៉ា! សូមថែរក្សាកូនរបស់អ្នកផង កូនរបស់ប៉ាជាជនជាតិថៃ មានបេះដូងខ្មែរ ដោយក្តីបារម្ភពីបេះដូងអ្នកកាន់សាសនាដូចគ្នា»។

គណនីនោះក៏បានចែករំលែកវីដេអូឃ្លីបរបស់លោកស្រី Angkana ផងដែរ ដោយសរសេរ Caption ថា «ខ្ញុំមិនស្អប់ជនជាតិកម្ពុជាទេ ប៉ុន្តែខ្ញុំស្អប់អ្នក»។

មុននេះ លោកស្រី Angkana ក៏រងការគំរាមសម្លាប់ដែរ ដោយសារតែភាពស្មោះត្រង់និងការហ៊ាននិយាយពាក្យពិត ពាក់ព័ន្ធជម្លោះព្រំដែន។

លោកស្រីបានទទួលសារគំរាមសម្លាប់និងការវាយប្រហារយ៉ាងខ្លាំងតាមបណ្តាញអ៊ីនធឺណិត ក្រោយ ហ៊ានចេញមុខនិយាយការពិតថា រដ្ឋាភិបាលទីក្រុងបាងកក កំពុងរំលោភសិទ្ធិមនុស្សជុំវិញករណី Kan Jom Phalang ដឹកនាំការចាក់សំឡេងខ្មោចបន្លាចពលរដ្ឋខ្មែរ និងការទទួលស្គាល់ថា ថៃជាអ្នកវាយប្រហារកម្ពុជាមុន ថែមទាំងប្រើយន្តហោះចម្បាំង F-16 ទៀតផង។

ក្រោយការបង្ហោះ Facebook ជាបន្តបន្ទាប់ លោកស្រីក៏ក្លាយជាគោលដៅនៃការវាយប្រហារតាមអ៊ីនធឺណិត ការយាយីនិងឈានដល់ការគំរាមកំហែងដល់អាយុជីវិតទៀតផង។

មានមនុស្សមួយចំនួនបានបំភ្លៃសាររបស់លោកស្រី ដោយចោទប្រកាន់ថា លោកស្រី «កំពុងកាន់ជើងកម្ពុជា» ឬ »«មិនស្នេហាជាតិ» ថែមទាំងបង្កាច់បង្ខូច និងតិះដៀលដល់ការងាររបស់លោកស្រីជាអ្នកការពារសិទ្ធមនុស្សទៀតផង។

យ៉ាងណាដោយសារតែក្តីបារម្ភខ្លាំងចំពោះសុវត្ថិភាពរបស់ Angkana, អ្នករាយការណ៍ពិសេស UN លោកស្រី Mary Lawler ក៏ចេញសេចក្តីថ្លែងការណ៍ថា «ខ្ញុំព្រួយចិត្តណាស់ ចំពោះរបាយការណ៍អំពីការគំរាមសម្លាប់និងការវាយប្រហារតាមអ៊ីនធឺណិតប្រឆាំងនឹងលោកស្រី Angkana Neelapaijit ដែលជាសមាជិកព្រឹទ្ធសភា, ជាអតីតស្នងការសិទ្ធិមនុស្សជាតិ និងជាសមាជិកនៃគណៈកម្មាធិការសិទ្ធិមនុស្សអង្គការសហប្រជាជាតិ។ ការការពារសេចក្តីពិត យុត្តិធម៌និងសេចក្តីថ្លៃថ្នូររបស់មនុស្ស គឺមិនមែនជាបទឧក្រិដ្ឋទេ។ លោកស្រីត្រូវតែទទួលបានការការពារ មិនមែនការថ្កោលទោសឡើយ»៕

អត្ថបទ៖ សុខ សុវណ្ណ

ចុចអាន៖ សមាជិកព្រឹទ្ធសភាថៃ រងការគំរាមសម្លាប់ ក្រោយហ៊ាននិយាយរឿងពិត ជុំវិញជម្លោះព្រំដែនកម្ពុជា-ថៃ