ព័ត៌មានជាតិ

បើគ្មានការប្រែប្រួល ថៃនឹងដោះលែងយោធាកម្ពុជា១៨រូបនៅថ្ងៃទី១២វិច្ឆិកា ដែលឃុំខ្លួន១០៦ថ្ងៃ

បានផុស

៧ ខែ មុន

នៅ

ថ្ងៃព្រហស្បតិ៍ ៦ វិច្ឆិកា ២០២៥

ដោយ

សារព័ត៌មានរបស់ថៃបានចេញផ្សាយយ៉ាងទូលំទូលាយដោយដកស្រង់ប្រភពពីកងយោធពលភូមិន្ទថៃដែលអះអាងថា ភាគីថៃនឹងដោះលែងយោធាកម្ពុជាទាំង១៨រូបនៅថ្ងៃទី១២ខេវិច្ឆិកាឆ្នាំ២០២៥ តាមច្រកអន្តរជាតិព្រំដែនព្រំក្នុងខេត្តប៉ៃលិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើគ្មានអ្វីប្រែប្រួលទេ វានឹងមានរយៈពេល១០៦ថ្ងៃ ចាប់តាំងពីថ្ងៃចាប់ខ្លួនរហូតដល់ថ្ងៃដោះលែងទាហានកម្ពុជានៅថ្ងៃទី១២ខែវិច្ឆិកា ដូចជាការផ្សព្វផ្សាយរបស់យោធាថៃនៅថ្ងៃទី៦ខែវិច្ឆិកានេះ។ ទាហានកម្ពុជាចំនួន២០រូបត្រូវបានទាហានថៃចូលមកចាប់ខ្លួននៅច្រកអានសេះស្រុកជាប់ក្សាន្តខេត្តព្រះវិហារ ក្រោយបទឈប់បាញប្រកាសចូលជាធរមានជាច្រើនម៉ោងកាលពីយប់ថ្ងៃទី២៨ខែកក្កដា ហើយ នៅព្រឹកថ្ងៃទី២៩ នៅពេលដែលអនុវត្តបទឈប់បាញ់។

ក្រោយចាប់ខ្លួនទាហានទាំង២០រូប នៅថ្ងៃទី៤ខែសីហា ភាគីថៃបានដោះលែងយោធា២រូប ដោយមានអាការៈខុសប្រក្រតីមានធ្លាក់ខ្លួនពិការ និងវង្វេងស្មារតី ដែលប្រជាជនកម្ពុជាបានថ្កោលទោសទង្វើរបស់យោធាថៃប្រព្រឹត្តមកលើទាហានកម្ពុជា។

ចំពោះព័ត៌មានជុំវីញការដោះលែងទាហានកម្ពុជានៅថ្ងៃទី១២ខែវិច្ឆិកា សារព័ត៌មានថៃ Khaosod ជាភាសាអង់គ្លេសបានឱ្យដឹងថា យោធាថៃគ្រោងនឹងប្រគល់យោធារបស់កម្ពុជាទាំង១៨រូបមកឱ្យកម្ពុជាវិញ នៅថ្ងៃពុធទី១២ ខែវិច្ឆិកា ឆ្នាំ២០២៥។ ការដោះលែងនេះនឹងធ្វើឡើងនៅច្រកអន្តរជាតិ Ban Phak Kat ក្នុងខេត្តចាន់បូរី ភាគីខាងថៃ ប្រឈមនឹងច្រកអន្តរជាតិព្រំក្នុងខេត្តប៉ៃលិនប្រទេសកម្ពុជា។

សារព័ត៌មានថៃ The Nation ក៏បានផ្សព្វផ្សាយព័ត៌មានប្រហាក់ប្រហែលគ្នានេះ ជុំវិញការដោះលែងយោធាកម្ពុជាទាំង១៨រូបនៅថ្ងៃទី១២ខែវិច្ឆិកានោះ។

ការដោះលែងយោធាខ្មែរទាំង១៨រូប គឺស្ថិតក្នុងចំណោមលក្ខខណ្ឌមួយដែលបានបញ្ជាក់នៅក្នុងចំណុចទី៥ នៃសេចក្តីថ្លែងការណ៍រួមស្តីពីសន្តិភាពកម្ពុជា-ថៃ កាលពីថ្ងៃទី២៦ ខែតុលា ឆ្នាំ២០២៥ នៅទីក្រុងកូឡាឡាំពួ ប្រទេសម៉ាឡេស៊ី ដែលមានការចុះហត្ថលេខាដោយនាយករដ្ឋមន្ត្រីកម្ពុជា និងថៃ ក្រោយសាក្សីនៃប្រធានាធិបតីអាមេរិក និងនាយករដ្ឋមន្ត្រីម៉ាឡេស៊ី។

បើគ្មានអ្វីប្រែប្រួលក្រោមលេសថ្មីៗដែលភាគីថៃតែងតែប្រើដើម្បីព្យាយាមពន្យាពេលដោះលែងទាហានកម្ពុជាទេនោះ វានឹងមានរយៈពេល ១០៦ថ្ងៃដែលវីរកងទ័ពកម្ពុជាចំនួន១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ។

កន្លងមក ភាគីកម្ពុជាគ្រប់លំដាប់ថ្នាក់តែងធ្វើអន្តរាគមន៍នានាទាំងមធ្យោបាយការទូត តាមរយៈអង្គការអន្តរជាតិ និងប្រទេសជាមិត្ត ដើម្បីឱ្យភាគីថៃ ដោះលែងវីរៈកងទ័ពកម្ពុជាត្រឡប់មកវិញឱ្យបានឆាប់រហ័សជាទីបំផុត ដើម្បីឱ្យពួកគាត់អាចវិលត្រឡប់មកជួបជុំក្រុមគ្រួសាររបស់ពួកគាត់ និងប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ៕

រ៉ាន់ រើយ