អ្នកស្លាប់​ដោយសារ​បំណាក់ដី​នៅ​ឥណ្ឌូណេស៊ី​ កើន​ឡើង​ដល់​១៨​នាក់ ខណៈ​រាប់សិប​នាក់​ទៀត​កំពុង​បាត់ខ្លួន

ទីភ្នាក់ងារ​ព័ត៍មាន​រ៉យទ័រ​បាន​ចុះ​ផ្សាយ​នា​ថ្ងៃ​ទី​១៧​ខែ​វិច្ឆិកា​ឆ្នាំ​២០២៥​នេះ​ថា ការ​បាក់​ដី​ដែល​បង្ក​ឡើង​ដោយ​ភ្លៀង​ធ្លាក់​ខ្លាំង​នៅ​ក្នុង​តំបន់​​ចំនួន​ពីរ​នៃ​ខេត្ត​​​កោះ​ជ្វា​​កណ្ដាល​ របស់​​ប្រទេស​​ឥណ្ឌូណេស៊ី​ បាន​ឆក់​យក​ជីវិត​​មនុស្ស​យ៉ាងហោចណាស់​១៨នាក់ ខណៈ​រាប់សិប​នាក់​ទៀត​កំពុង​បាត់ខ្លួន​នៅ​ឡើយ។

យោងតាម​ទីភ្នាក់ងារ​កាត់បន្ថយ​គ្រោះមហន្តរាយ​ជាតិ (BNPB) បំណាក់​​ដី​ដ៏​ធំ​មួយ​នៅ​ក្នុង​ទីក្រុង Cilacap កាលពី​សប្តាហ៍​មុន បាន​កប់​ផ្ទះ​រាប់​សិប​ខ្នង​នៅ​ភូមិ Cibeunying ឲ្យ​ស្ថិត​នៅ​ក្រោម​ដី​ដែល​មាន​កម្រាស់​ពី​៣ទៅ៨ម៉ែត្រ ដែល​ធ្វើ​ឲ្យ​ក្រុម​អ្នក​ជួយ​សង្គ្រោះ​ជួប​ការ​លំបាក​​ខ្លាំង​ ក្នុង​ការ​រុក​រក​​ជនរងគ្រោះ​ដែល​ជាប់​នៅ​ក្រោម​ស្រទាប់​ភក់ និង​កម្ទេចកម្ទី​ដ៏​ជ្រៅ។

លោក M. Abdullah ប្រធាន​ផ្នែក​មូលដ្ឋាន​នៃ​ទីភ្នាក់ងារ​ស្វែងរក និង​ជួយសង្គ្រោះ បាន​និយាយ​ថា គ្រោះមហន្តរាយ​នៅ Cilacap បាន​ឆក់យក​ជីវិត​មនុស្ស​យ៉ាងហោចណាស់១៦នាក់ ខណៈ​មនុស្ស៧នាក់​នៅតែ​បាត់ខ្លួន​គិត​ត្រឹម​ព្រឹក​​ថ្ងៃចន្ទ​នេះ។ តាមរយៈ​វីដេអូ​ពី​ទូរទស្សន៍ KompasTV បាន​បង្ហាញ​ថា ម៉ាស៊ីន​អេស្កាវ៉ាទ័រ​ត្រូវ​បាន​ដាក់​ពង្រាយ​ដើម្បី​ជីក​កកាយ​ឆ្លងកាត់ផ្ទៃ​​ដី​​ដ៏​ក្រាស់ឃ្មឹក។

BNPB បាន​​ឲ្យ​ដឹង​​ថា ក្នុង​ឧបទ្ទវហេតុ​ដាច់ដោយឡែក​មួយ មនុស្ស២នាក់​បាន​ស្លាប់ និង២៧​នាក់​ត្រូវ​បាន​រាយការណ៍​ថា​បាត់ខ្លួន បន្ទាប់ពី​ការ​បាក់​ដី​បាន​វាយប្រហារ​ស្រុក Banjarnegara កាលពី​ថ្ងៃសៅរ៍។ ការ​បាក់​ដី​​នេះ​​បាន​បំផ្លាញ​ផ្ទះ​ប្រហែល៣០ខ្នង និង​តំបន់​កសិកម្ម​មួយ​ចំនួន។

ទីភ្នាក់ងារ​ឧតុនិយម​របស់​ឥណ្ឌូណេស៊ី ​បាន​ព្រមាន​ថា រដូវវស្សា​​​បាន​ចាប់ផ្តើម​ក្នុង​ខែ​កញ្ញា ហើយ​ត្រូវ​បាន​គេ​រំពឹង​ថា​នឹង​បន្ត​រហូតដល់​ខែ​មេសា​ឆ្នាំ​ក្រោយ ដែល​បង្កើន​ហានិភ័យ​នៃ​ភ្លៀង​ធ្លាក់​ខ្លាំង ទឹកជំនន់​ភ្លាមៗ និង​បំណាក់​ដីបន្ថែម​ទៀត៕

ប្រែសម្រួល៖ ឈាង