សមាជិកសភារុស្ស៊ី ប្រាប់ឲ្យពូទីន បាញ់នុយក្លេអ៊ែរ ​សងសឹកអាមេរិក ដែលរឹបអូសនាវាដឹកប្រេង

ក្រោយការរឹបអូសនាវាដឹកប្រេងរុស្ស៊ី ដោយអាមេរិកដែលមានទាំងការប្រកាសចូលដៃពីចក្រភពអង់គ្លេសផងនោះ ធ្វើឲ្យកម្តៅស្ថានការណ៍ពិភពលោកកាន់តែក្តៅ ដល់ថ្នាក់ពេលនេះ មានទាំងការជំរុញឲ្យមេដឹកនាំវិមានក្រឹមឡាំង វ្ល៉ាឌីមៀរ ពូទីន ឆ្លើយតបដោយអាវុធនុយក្លេអ៊ែរទៀតផង។

ការព្រមានប្រើពាក្យខ្លាំងៗនេះគឺចេញពីមាត់សមាជិកសភា Alexei Zhuravlev ដែលជំរុញឲ្យលោកពូទីន បាញ់មីស៊ីលនុយក្លេអ៊ែរពន្លិចនាវាឆ្មាំអាមេរិកនិងអង់គ្លេសវិញទៅ ដើម្បីសងសឹក។

តាមការផ្សាយរបស់ Daily Star កាលពីថ្ងៃសុក្រទី៩ខែមករាឆ្នាំ២០២៦ លោក Zhuravlev ប្រតិកម្មទាំងកំហឹងថា៖ «ច្បាស់ណាស់ វាគឺជាអំពើចោរកម្មដ៏កំរោល ដែលជាការរឹបអូសយកនាវាស៊ីវិលដោយកម្លាំងប្រដាប់អាវុធនៃកងទ័ពជើងទឹកអាមេរិក។ និយាយទៅ វាគឺដូចនឹងការរំលោភបំពានលើទឹកដីរុស្ស៊ីអញ្ចឹងដែរ ព្រោះតែនាវាដឹកប្រេងនេះ កំពុងធ្វើដំណើរក្រោមទង់ជាតិរបស់យើង។ គ្មានអ្វីត្រូវសង្ស័យឡើយ ការឆ្លើយតបត្រូវតែម៉ឺងម៉ាត់និងរហ័សបំផុត ហើយក្នុងករណីបែបនេះ គោលការណ៍យោធារបស់យើង អាចអនុញ្ញាតឲ្យប្រើប្រាស់អាវុធនុយក្លេអ៊ែរបាន»។

ចំណែកសមាជិកសភាម្នាក់ទៀត គឺលោក Andrey Gurulev ក៏ព្រមានខ្លាំងៗដែរថា៖ «គ្មានអ្វីអាចមករារាំងយើង មិនឲ្យដាក់ទណ្ឌកម្មលើគ្រប់នាវា ដែលសំដៅទៅកាន់កំពង់ផែសមុទ្រខ្មៅ ដូចជា Odesa និង Mykolaiv នោះទេ។ យើងអាចបញ្ឈប់ ត្រួតពិនិត្យ ហើយតាមពិតទៅ គឺថែមទាំងអាចបាញ់ពន្លិចពួកគេចោលទៀតផង ប្រសិនបើមានចំណុចណាមួយដែលយើងមិនពេញចិត្ត»។

ទន្ទឹមនោះ មេទ័ពបម្រុងរូបនេះបានជំរុញឲ្យលោកពូទីន ប្រើប្រាស់ប្រព័ន្ធមីស៊ីលដែលអាចបំពាក់ក្បាលគ្រាប់នុយក្លេអ៊ែរ ដូចជាប្រភេទ Oreshnik ដើម្បីវាយប្រហារលើទីតាំងផលិតមីស៊ីលរបស់ប្លុកលោកខាងលិច។

សូមជម្រាបជាថ្មី បើយោងតាមសេចក្តីប្រកាសរបស់មន្ទីរបញ្ចកោណ, នាវាដឹកប្រេង Marinera ឬមានឈ្មោះពីមុនថា Bella 1 ត្រូវបានរឹបអូសនៅក្នុងដែនទឹកក្បែរប្រទេសស្កុតឡែន ព្រោះវាបានបំពានទៅនឹងទណ្ឌកម្មរបស់សហរដ្ឋអាមេរិក។ អាមេរិក បានរឹបអូសនាវានោះ ព្រោះតែវាព្យាយាមគេចពីទណ្ឌកម្ម ហើយដឹកប្រេងឆ្ពោះទៅកាន់ប្រទេសរុស្ស៊ី។

ទោះបីជាយ៉ាងណាក៏ដោយ ទីក្រុងមូស្គូបានប្រតិកម្មទៅរឿងនេះម្តងរួចមកហើយ ដោយបញ្ជាក់ថា នាវាទទួលបានលិខិតអនុញ្ញាតបណ្ដោះអាសន្នឲ្យដោតទង់ជាតិរុស្ស៊ី កាលពីថ្ងៃទី ២៤ ខែធ្នូ។ ជាក់ស្តែង សហរដ្ឋអាមេរិក បានរំលោភលើអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ដែលធានានូវសេរីភាពនៃការធ្វើនាវាចរណ៍នៅក្នុងដែនទឹកអន្តរជាតិ៕

អត្ថបទ៖ សុខ សុវណ្ណ