ឧទ្ធម្ភាគចក្រវាយប្រហារ របស់កងទ័ពអាមេរិក ធ្លាក់ក្បែរច្រក Hormuz ទាំងមិនដឹង មូលហេតុ

ឧទ្ធម្ភាគចក្រវាយប្រហារមួយគ្រឿងរបស់កងទ័ពអាមេរិក បានធ្លាក់ទាំងមិនដឹងមូលហេតុ ក្បែរច្រកសមុទ្រ Hormuz ប៉ុន្តែប្រមុខសេតវិមាន ដូណាល់ ត្រាំ បញ្ជាក់ថា អាកាសយានិក ២នាក់ មិនមានរបួសអ្វីទេ។

តាមការផ្សាយរបស់ APនៅថ្ងៃអង្គារ ទី៩ ខែមិថុនា ឆ្នាំ២០២៦ ឧទ្ធម្ភាគចក្រនោះ ជាប្រភេទ Apache ដែលជាយានយុទ្ធសាស្ត្រដ៏សំខាន់ សម្រាប់យោធាអាមេរិក ក្នុងការអនុវត្តវិធានការបិទខ្ទប់លើផ្លូវជញ្ជូនប្រេងឆៅ និងនាវាដឹកប្រេងរបស់អ៊ីរ៉ង់ ក្នុងគោលបំណងដាក់សម្ពាធឲ្យទីក្រុង តេហេរ៉ង់ ឈានទៅរកការព្រមព្រៀងគ្នា។

ជុំវិញហេតុការណ៍នេះ មានការសន្និដ្ឋានថា ឧទ្ធម្ភាគចក្រ Apache អាចត្រូវគ្រាប់របស់អ៊ីរ៉ង់ ប៉ុន្តែបញ្ជាការកណ្តាលអាមេរិក និងក្រសួងសង្គ្រាម សុទ្ធតែមិនទាន់ចេញមុខ បកស្រាយអ្វីឡើយ។

ហេតុការណ៍នេះកើតឡើង ស្របពេលស្ថានការណ៍ក្នុងតំបន់មជ្ឈិមបូព៌ា នៅតែតានតឹង ជាពិសេសច្រក Hormuz ដ្បិតអាមេរិក និងអ៊ីរ៉ង់ រៀងបន្ថយដៃប្រយុទ្ធគ្នា បន្តិចក៏ដោយ។

ម្យ៉ាង វាក៏កើតឡើងផងដែរ បន្ទាប់ពីអាមេរិក-អ៊ីរ៉ង់ បាញ់តដៃគ្នា មួយប្រាវ នៅឈូងសមុទ្រពែរ្ស កាលពីចុងសប្តាហ៍។

Apache គឺជាឧទ្ធម្ភាគចក្រវាយប្រហារធុនធ្ងន់ ដ៏មានឥទ្ធិពលបំផុតរបស់កងទ័ពអាមេរិក ដែលត្រូវបានបង្កើតឡើងដំបូងដោយក្រុមហ៊ុន Hughes Helicopters មុនពេល ត្រូវទិញបន្តដោយក្រុមហ៊ុន McDonnell Douglas ហើយបច្ចុប្បន្ន ផលិតដោយក្រុមហ៊ុន Boeing Defense, Space & Security។

វាប្រើប្រាស់ម៉ាស៊ីនប្រភេទ Turboshaft ចំនួន ២ គ្រឿង, អាចហោះហើរបានល្បឿនប្រហែល ២៩៣ ទៅ ៣០០ គីឡូម៉ែត្រក្នុងមួយម៉ោង ជាមួយចម្ងាយប្រតិបត្តិការ ប្រហែល ៤៨០ គីឡូម៉ែត្រ៕

អត្ថបទ៖ សុខ សុវណ្ណ