ព័ត៌មានអន្ដរជាតិ

ជំហានថ្មីនៃសង្គ្រាមបច្ចេកវិទ្យា៖ អាមេរិកដាក់ Alibaba, Baidu, BYD និង Nio ក្នុង «បញ្ជីក្រុមហ៊ុនយោធាចិន»

បានផុស

៣២ វិនាទី មុន

នៅ

ថ្ងៃអង្គារ ៩ មិថុនា ២០២៦

ដោយ

ក្នុងជំហានថ្មីនៃសង្រ្គាមបច្ចេកវិទ្យា សហរដ្ឋអាមេរិកបានដាក់បញ្ចូលក្រុមហ៊ុនពាណិជ្ជកម្មអេឡិចត្រូនិកយក្សចិន Alibaba ក្រុមហ៊ុនអ៊ិនធឺរណិត Baidu ក្រុមហ៊ុនផលិតរថយន្តអគ្គិសនី BYD និង Nio និងក្រុមហ៊ុនបច្ចេកវិទ្យាជាច្រើនទៀត ទៅក្នុង «បញ្ជីក្រុមហ៊ុនយោធាចិន» របស់មន្ទីរបញ្ចកោណ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ជីរាយនាមក្រុមហ៊ុនថ្មី ដែលជំនួសឱ្យបញ្ចីចាស់ចេញផ្សាយនៅដើមឆ្នាំ ២០២៥ ត្រូវបានដាក់ចេញកាលពីថ្ងៃចន្ទ ពោលគឺតិចជាង ១ ខែ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានជួបជាមួយប្រធានាធិបតីចិន លោក ស៊ី ជីនពីង នៅទីក្រុងប៉េកាំង កាលពីខែមុន ដែលកាលនោះ មេដឹកនាំទាំង២ បានព្រមគ្នារក្សាបទឈប់បាញ់សង្គ្រាមពាណិជ្ជកម្មរវាងប្រទេសទាំងសងខាង។

ការកំណត់ថ្មីរបស់មន្ទីរបញ្ចកោណ ក៏រួមបញ្ចូលទាំងក្រុមហ៊ុនផលិតបន្ទះឈីបអង្គចងចាំ CXMT និង YMTC ក្រុមហ៊ុនបច្ចេកវិទ្យាជីវសាស្ត្រ WuXi AppTec ក្រុមហ៊ុនមនុស្សយន្ត RoboSense និង Unitree ក៏ដូចជាក្រុមហ៊ុនបច្ចេកវិទ្យាចិនជាច្រើនទៀតផងដែរ។ ការបោះជំហានបែបនេះ ឆ្លុះបញ្ចាំងពីការព្រួយបារម្ភកាន់តែខ្លាំងឡើងរបស់អាមេរិកលើយុទ្ធសាស្ត្របញ្ចូលគ្នារវាងយោធា-ស៊ីវិលរបស់ចិន និងកិច្ចខិតខំប្រឹងប្រែងមហាអំណាចអាស៊ីមួយនេះក្នុងការពង្រឹងសមត្ថភាពបច្ចេកវិទ្យា និងឧស្សាហកម្មរបស់ខ្លួន។

ក្រុមហ៊ុននៅក្នុង «បញ្ជីក្រុមហ៊ុនយោធាចិន» មិនស្ថិតនៅក្រោមទណ្ឌកម្មដោយផ្ទាល់ទេ ប៉ុន្តែច្បាប់អាមេរិកហាមឃាត់ក្រសួងការពារជាតិរបស់ខ្លួនពីការចុះកិច្ចសន្យាផ្សេងៗជាមួយក្រុមហ៊ុនទាំងនោះ ហើយចាប់ពីឆ្នាំ ២០២៧ តទៅ មន្ទីរបញ្ចកោណក៏រងការហាមឃាត់មិនឱ្យទិញផលិតផល ឬសេវាកម្មរបស់ក្រុមហ៊ុនទាំងនោះ តាមរយៈភាគីទី៣ផងដែរ។

ក្រុមហ៊ុន Alibaba, Baidu និង WuXi AppTec បានច្រានចោលការកំណត់របស់អាមេរិក ដោយហៅវាថាគ្មានមូលដ្ឋាន និងមិនត្រឹមត្រូវ ខណៈបានលើកឡើងថា ពួកគេនឹងបន្តជម្រើសផ្លូវច្បាប់ដើម្បីជំទាស់នឹងការសម្រេចចិត្តនោះ។ ស្ថានទូតចិនប្រចាំទីក្រុងវ៉ាស៊ីនតោនឯណោះវិញ ក៏បានរិះគន់ការកំណត់របស់មន្ទីរបញ្ចកោណនផងដែរ ដោយចោទប្រកាន់សហរដ្ឋអាមេរិកថាបានដាក់គោលដៅលើក្រុមហ៊ុនចិនដោយអយុត្តិធម៌។

ប៉ុន្តែគួរកត់សម្គាល់ថា ក្រុមហ៊ុនចិនមួយចំនួនត្រូវបានដកចេញពីបញ្ជី រួមទាំងអង្គភាព ២ ដែលមានទំនាក់ទំនងជាមួយក្រុមហ៊ុនផលិតប្រេងរដ្ឋចិន CNOOC ទោះបីជាក្រុមហ៊ុនបុត្រសម្ព័ន្ធ CNOOC មួយផ្សេងទៀត ត្រូវបានដាក់បញ្ចូលទៅក្នុងបញ្ជីក៏ដោយ។

មន្ទីរបញ្ចកោណបាននិយាយថា ក្រុមហ៊ុនដែលបានដាក់ចូលបញ្ជីមានលក្ខណៈសម្បត្តិគ្រប់គ្រាន់ក្នុងការកំណត់ជា «ក្រុមហ៊ុនយោធាចិន» ដែលប្រតិបត្តិការនៅសហរដ្ឋអាមេរិក ប៉ុន្តែពួកគេអាចដាក់ញត្តិស្នើសុំដកខ្លួនចេញពីបញ្ជី។

អ្នកវិភាគនិយាយថា ការបន្ថែមក្រុមហ៊ុនចិនទៅក្នុងបញ្ជី កំពុងបង្ហាញថា អាមេរិកកាន់តែមើលឃើញថា វិស័យបច្ចេកវិទ្យាទាំងមូលរបស់ចិនគឺជាគូប្រកួតប្រជែងជាយុទ្ធសាស្ត្រ ជាជាងចាត់ទុកក្រុមហ៊ុនចិននីមួយៗជាករណីដាច់ដោយឡែក៕

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា