មេដឹកនាំកំពូល អ៊ីរ៉ង់ ប្រកាសជំហររឹងរូស មិនព្រមចុះចាញ់ដាច់ខាត

មេដឹកនាំកំពូលអ៊ីរ៉ង់ លោក Ayatollah Ali Khamenei កាលពីថ្ងៃសុក្រទី៩មករា បានប្រកាសពីជំហរផ្ទាល់ខ្លួនថា សាធារណរដ្ឋអ៊ីស្លាមនឹងមិនព្រមចុះចាញ់ដាច់ខាតចំពោះការតវ៉ា បន្ទាប់ពីការជួបជុំដ៏ធំបំផុតក្នុងរយៈពេលជិតពីរសប្តាហ៍ ដែលបង្កឡើងដោយកំហឹងជុំវិញការកើនឡើងនៃថ្លៃដើមរស់នៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម nst ហ្វូងមនុស្សដែលប្រឆាំងនឹងស្ថាប័នបព្វជិតបានដើរក្បួនឆ្លងកាត់ទីក្រុងធំៗកាលពីយប់ថ្ងៃព្រហស្បតិ៍ ដោយស្រែកពាក្យស្លោករួមថា «ស្លាប់ទៅមេដឹកនាំផ្តាច់ការ» ព្រមទាំងដុតបំផ្លាញអគារផ្លូវការជាច្រើនផងដែរ។

បាតុកម្មទាំងនេះតំណាងឲ្យបញ្ហាប្រឈមដ៏ធំបំផុតមួយចំពោះសាធារណរដ្ឋអ៊ីស្លាម ក្នុងរយៈពេលជាង៤ទសវត្សរ៍កន្លះនៃអត្ថិភាពរបស់ខ្លួន ដោយក្រុមបាតុករអំពាវនាវដោយបើកចំហ ឲ្យបញ្ចប់ការគ្រប់គ្រងតាមបែបសាសនា។

ជាការឆ្លើយតបវិញ មេដឹកនាំកំពូលអ៊ីរ៉ង់ លោក Khamenei បានប្រើសំឡេងប្រឆាំងនៅក្នុងមតិយោបល់ដំបូងរបស់ខ្លួនលើភាពចលាចល ដែលចាប់ផ្តើមកាលពីថ្ងៃទី ៣ ខែមករា ដោយហៅក្រុមបាតុករថាជា «ក្រុមបំផ្លាញ» និង «ភ្នាក់ងារភេរវកម្ម» នៅក្នុងសុន្ទរកថាមួយ ដែលចាក់ផ្សាយតាមទូរទស្សន៍រដ្ឋ។

លោកក៏បានចោទប្រកាន់ប្រធានាធិបតីអាមេរិក ដូណាល់ ត្រាំ ថា អ្នករៀបចំផែនការនៅពីក្រោយភាពវឹកវរនេះ ដោយដៃលោកត្រាំប្រឡាក់ឈាមជនជាតិអ៊ីរ៉ង់ជាងមួយពាន់នាក់ ដោយសំដៅទៅលើការប៉ះទង្គិចគ្នារវាងអ៊ីស្រាអែល និងអ៊ីរ៉ង់កាលពីខែមិថុនា ហើយសហរដ្ឋអាមេរិកបានគាំទ្រ និងចូលរួមជាមួយការវាយប្រហាររបស់ខ្លួន។

មេដឹកនាំកំពូលអ៊ីរ៉ង់មានប្រសាសន៍នៅក្នុងសុន្ទរកថាមួយទៀតទៅកាន់អ្នកគាំទ្រថា «យប់មិញនៅទីក្រុងតេអេរ៉ង់ ក្រុមអ្នកបំផ្លាញទ្រព្យសម្បត្តិបានមកបំផ្លាញអគារមួយដែលជារបស់ពួកគេ ដើម្បីផ្គាប់ចិត្តប្រធានាធិបតីអាមេរិក។ មនុស្សគ្រប់គ្នាដឹងថា សាធារណរដ្ឋអ៊ីស្លាមបានឡើងកាន់អំណាចដោយឈាមរបស់មនុស្សថ្លៃថ្នូររាប់រយរាប់ពាន់នាក់ វានឹងមិនថយក្រោយឬចុះចាញ់ដាច់ខាតនៅចំពោះមុខអ្នកបំផ្លាញទ្រព្យសម្បត្តិឡើយ»។

គួរជម្រាបថា ការជួបជុំគ្នានៅថ្ងៃព្រហស្បតិ៍នេះ គឺជាការប្រមូលផ្តុំដ៏ធំបំផុតនៅក្នុងប្រទេសអ៊ីរ៉ង់ ចាប់តាំងពីការតវ៉ាទូទាំងប្រទេសឆ្នាំ ២០២២-២០២៣ ដែលបង្កឡើងដោយការស្លាប់របស់ Mahsa Amini ដែលចាប់ខ្លួនពីបទរំលោភលើក្រមស្លៀកពាក់ដ៏តឹងរ៉ឹងរបស់ប្រទេស។

ក្រុមសិទ្ធិមនុស្សបានចោទប្រកាន់អាជ្ញាធរថា បានបាញ់ទៅលើក្រុមបាតុករនៅក្នុងភាពចលាចលបច្ចុប្បន្ន ដោយសម្លាប់មនុស្សរាប់សិបនាក់។ ទោះជាយ៉ាងណាក៏ដោយ វីដេអូចុងក្រោយបំផុតពីទីក្រុងតេអេរ៉ង់មិនបានបង្ហាញពីអន្តរាគមន៍របស់កម្លាំងសន្តិសុខទេ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោកត្រាំ ព្រមាន​«បាញ់​ប្រហារ» បើ​អ៊ីរ៉ង់​នៅតែ​បន្តសម្លាប់​បាតុករ