ចិន​និង​អង់គ្លេស​​​ចាប់ដៃគ្នា​ ចំពេល​អ្នកទាំងពីរ​​មានអរិភាព​ជាមួយសហរដ្ឋអាមេរិក​​​​​​

​​ក្រសួង​ការ​ប​រទេសចិន បាន​​​បញ្ចេញ​ខ្លឹម​សារ​​​នៃ​ជំនួប​​​រវាង​ប្រមុខ​រដ្ឋចិន ​​និង​​នាយករដ្ឋមន្ត្រី​អង់គ្លេស ដែល​ភាគី​ទាំងពីរ​បាន​​ពិភាក្សា​​​​សង្កត់​ធ្ងន់​លើ​​សណ្តាប់ធ្នាប់​ពីភពលោក និងច្បាប់អន្តរជាតិដែល​មានស្រាប់ ​បន្ទាប់​ពី​​​​ប្រធានាធិបតី​​​​​​សហរដ្ឋអាមេរិក លោក ដូណាល់ ត្រាំ ​បង្កើត​​អង្គការអន្តរជាតិថ្មីមួយ​ដែលនឹងដើរតួនាទី​​យ៉ាងសំខាន់​ក្នុងអន្តរជាតិ​។​

​​ក្រោយ​ជំនួប​​រវា​ង​ប្រធានាធិបតីចិន លោក ស៊ី ជីនពីង និង​​នាយក​រដ្ឋមន្ត្រី​អង់គ្លេស លោក Keir Starmer នៅទីក្រុង​ប៉េកាំង​ លោកស្រី ម៉ៅ នីង ​(Mao Ning) អ្នកនាំ​​ពាក្យ​​ក្រសួងការប​រទេសចិន បាន​បង្ហោះសារ​លើ​បណ្តាញ​សង្គមហ្វេសប៊ុក​ ថា ប្រធានាធិបតី ស៊ី ជីនពីង បានចង្អុលបង្ហាញនៅក្នុងជំនួបជាមួយលោក Keir Starmer នាយករដ្ឋមន្ត្រីចក្រភពអង់គ្លេសថា លទ្ធិឯកតោភាគីនិយម លទ្ធិការពារនិយម និងនយោបាយប្រើអំណាចកំពុងរីករាលដាលយ៉ាង​កម្រោល​​។

​តាមខ្លឹមសារ​ដែល​បង្ហោះ​​ដោយ​អ្នក​នាំពាក្យ ​សណ្តាប់ធ្នាប់អន្តរជាតិកំពុងស្ថិតនៅក្រោមសម្ពាធយ៉ាងខ្លាំង។ ជាមួយ​គ្នា​នោះ ច្បាប់អន្តរជាតិអាចមានប្រសិទ្ធភាពពិតប្រាកដបាន លុះត្រាតែប្រទេសទាំងអស់គោរពតាម។

​​​លោកស្រី ម៉ៅ នីង បាន​​​​​សរសេរថា៖«​ជាពិសេស ប្រទេសធំៗគួរតែធ្វើជាគំរូ បើមិនដូច្នោះទេ ពិភពលោកនឹងវិលត្រឡប់ទៅរកច្បាប់ព្រៃវិញ»​។

​​នៅ​ក្នុងខឹមសារ​ដដែល​នោះ ទាំង​ភាគី​ចិន​និង​​អង់គ្លេស​​​គាំទ្រ​​ពាណិជ្ជកម្ម​​​សេរី​និង​ពហុភាគី ដោយ​បញ្ជាក់​ថា៖«យើងគួរតែតស៊ូមតិរួមគ្នា និងអនុវត្តពហុភាគីនិយមពិតប្រាកដ ធ្វើឱ្យប្រព័ន្ធ​អភិបាលកិច្ច​សកលលោកកាន់តែយុត្តិធម៌ និងសមធម៌ ​និង​ធ្វើការ​​​​ស្ថាបនា​​​​ពិភពលោក​ពហុប៉ូលមួយដ៏ស្មើភាព និងមានសណ្តាប់ធ្នាប់ ព្រមទាំងសកលភាវូបនីយកម្មដែលផ្តល់ផលប្រយោជន៍ជាសកល និងសេដ្ឋកិច្ច​​​​​បរិយាបន្ន»។

​​មហាអំណាច​ចិន​​និង​​អង់គ្លេស​​ដែល​ជាសមាជិក​​អចិន្ត្រៃយ៍​​​​នៃក្រុម​ប្រឹក្សា​សន្តិសុខ​​​អង្គការ​សហប្រជាជាតិ បាន​​ច្រាន​ចោល​​ការ​ចូល​ជាសមាជិក​​​​ស្ថាបនិក​នៃ​ក្រុមប្រឹក្សា​​សន្តិភាព​ (Board of Peace) ​ដែលផ្តួច​ផ្តើម​ដោយ​សហរដ្ឋអាមេរិក។ មិនត្រឹមតែ​ប៉ុណ្ណោះ​ប្រទេសនៅតំបន់អឺរ៉ុប​ភាគច្រើន​​មិនដើរតាមសហរដ្ឋអាមេរិក ដោយ​ពួកគេ​យល់​​ថា សហរដ្ឋអាមេរិក​​កំពុង​ប្រើប្រាស់​អំណាច​​ខ្លាំង​ជ្រុល​ហួស​ហេតុ​និង​ជាន់ឈ្លី​​ច្បាប់អន្តរជាតិ​ មើលស្រាល​​ស្ថាប័ន​អង្គការសហប្រជាជាតិ​ជាដើម៕​

​រហូត​មក​ដល់​ពេលនេះ ​ប្រទេសជាង​២០​បាន​ចូល​រួម​ជាមួយ​សហរដ្ឋអាមេរិកក្នុងការ​ដំណើរការ​​​​​​«ក្រុមប្រឹក្សា​សន្តិភាព»​ ហើយ​ប្រទេសភាគច្រើន​​ចេញ​ពីអាស៊ីកណ្តាល​ អាស៊ី​អាគ្នេយ៍ អាមេរិកឡាទីន និង​​​សមាជិក​អង្គការ​ណាតូ​ខ្លះ។ ប្រទេសទាំងនោះ​មានៈ ប្រអាហ្សង់ទីន អាល់បានី អាមេនី អាស៊ែបៃហ្សង់ បារ៉ែន បេឡារុស ប៊ុលហ្គារី កម្ពុជា អេហ្ស៊ីប ហុងគ្រី ឥណ្ឌូណេស៊ី ហ្ស៊កដានី កាហ្សាក់ស្ថាន កូសូវ៉ូ ម៉ារ៉ុក ម៉ុងហ្គោលី ​ប៉ាគីស្ថាន ប៉ារ៉ាហ្គាយ កាតា​​ អារ៉ាប៊ីសាអូឌីត តួកគី​ អារ៉ាប់រួម អ៊ូបេគីស្ថាន និង​វៀតណា​ម ។យោងតាម english.mathrubhumi.com​៕​​

រ៉ាន់ រើយ​