អ៊ីរ៉ង់ បញ្ជាក់​ច្បាស់ៗ​ថា ច្រក​ Hormuz ​​បើកវិញ​អត់​​​បាន​​​ទេ ព្រោះអាមេរិក​និងអ៊ីស្រាអែល​ រំលោភ​បទ​ឈប់​បាញ់

ដើម្បីជម្រះមន្ទិលសង្ស័យអំពីការបើក-បិទច្រកសមុទ្រ Hormuz, ឥឡូវ ភាគីអ៊ីរង់បានបញ្ជាក់យ៉ាងច្បាស់ថា ​ច្រកនេះមិនអាចបើកបានទេ ព្រោះតែការរំលោភបទឈប់បាញ់ពីសំណាក់អាមេរិកនិងអ៊ីស្រាអែល។

ច្រកសមុទ្រយុទ្ធសាស្ត្រនេះ គឺជាចំណុចស្នូលមួយត្រូវបានដាក់បញ្ចូលក្នុងលក្ខខណ្ឌនៃបទឈប់បាញ់និងកិច្ចចរចាសន្តិភាពរវាងអាមេរិកនិងអ៊ីរ៉ង់ កាលពីសប្តាហ៍មុន។

ទោះបីជាយ៉ាងណាក៏ដោយ ស្ថានការណ៍បានប្រែប្រួលនៅពេលសហរដ្ឋអាមេរិក ដាក់ការបិទខ្ទប់ផ្លូវទឹករបស់ទីក្រុងតេហេរ៉ង់ និងរឹបយកកប៉ាល់ដឹកទំនិញអ៊ីរ៉ង់នៅឈូងសមុទ្រអូម៉ង់ បង្ខំឲ្យអ៊ីរ៉ង់សងសឹកវិញ ដោយបញ្ជូនដ្រូនទៅវាយប្រហារនាវាចម្បាំងអាមេរិក។

ឥឡូវ ប្រធានរដ្ឋសភាអ៊ីរ៉ង់និងជាប្រមុខដឹកនាំគណៈប្រតិភូចរចាអ៊ីរ៉ង់លោក Mohammad Bagher Ghalibaf បានបង្ហោះសារលើបណ្តាញសង្គម X កាលពីថ្ងៃពុធទី២២ខែមេសាឆ្នាំ២០២៦ ដោយបញ្ជាក់ច្បាស់ៗជុំរិញរឿងច្រក Hormuz។

សារព័ត៌មាន BBC បានដកស្រង់សំណេររបស់លោក Ghalibaf ដែលសរសេរថា៖ «មិនអាចទៅរួចឡើយដែលច្រក Hormuz ត្រូវបើកឡើងវិញ ដោយសារតែការរំលោភបំពានយ៉ាងច្បាស់ក្រឡែតលើបទឈប់បាញ់ពីសំណាក់សហរដ្ឋអាមេរិកនិងអ៊ីស្រាអែល។ ការរំលោភបំពានទាំងនោះ រួមមានការបិទខ្ទប់ផ្លូវទឹកដោយកងទ័ពជើងទឹកអាមេរិកទៅលើកំពង់ផែរបស់អ៊ីរ៉ង់និងសកម្មភាពញុះញង់ឲ្យមានសង្រ្គាមដោយប្រទេសអ៊ីស្រាអែលនៅលើគ្រប់សមរភូមិ»។

ការប្រកាសនេះកើតឡើងបន្ទាប់ពី កងឆ្មាំបដិវត្តឥស្លាម (IRGC) បាញ់ប្រហារលើកប៉ាល់ដឹកកុងតឺន័រជាបន្តបន្ទាប់នៅច្រកសមុទ្រ Hormuz ដោយគិតត្រឹមមួយថ្ងៃពុធទី២២ខែមេសា មានកប៉ាល់រងគ្រោះដោយគ្រាប់កាំភ្លើងអ៊ីរ៉ង់ ដល់ទៅ៣គ្រឿង។

តាមទិន្នន័យចងក្រងដោយភ្នាក់ងារតាមដានប្រតិបត្តិការពាណិជ្ជកម្មដែនសមុទ្ររបស់ចក្រភពអង់គ្លេស ហៅកាត់ UKMTO, ក្នុងចំណោមកប៉ាល់ទាំង៣នោះ មាន២គ្រឿងជារបស់ប្រទេសលីបេរីយ៉ា និងមួយគ្រឿងរបស់ ប៉ាណាម៉ា៕

អត្ថបទ៖ សុខ សុវណ្ណ