​អនាគត​មេដឹកនាំ ប៊ុលហ្គារី អាចក្លាយជាអ្នកគាំទ្រថ្មី​របស់ រុស្ស៊ី នៅ​អឺរ៉ុប ជំនួសលោក Orban

ផ្អែកលើព្រឹត្តិការណ៍នយោបាយចុងក្រោយក្នុងខែមេសានេះ លោក Rumen Radev ដែលជាមេដឹកនាំគណបក្ស ប៊ុលហ្គារីជឿនលឿន (Progressive Bulgaria) និងជាអតីតប្រធានាធិបតីប៊ុលហ្គារី ពិតជាត្រូវបានគេមើលឃើញថា មានទំនាក់ទំនង និងនិន្នាការងាកទៅរករុស្ស៊ី ដែលធ្វើឲ្យអ្នកវិភាគ​មើល​ឃើញ​ថា​ លោកអាច​ជ្រើសរើស​​ដើរ​លើ​ផ្លូវ​​​របស់លោក Viktor Orban ដែលទើប​ធ្លាក់ឆ្នោត​នៅហុងគ្រី​ ក្នុងការប្រឆាំងនឹងការផ្ដល់ជំនួយដល់អ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែង នាពេលកន្លងមក លោក Radev បានប្រកាសយ៉ាងច្បាស់ថា លោកប្រឆាំងនឹងការបញ្ជូនអាវុធទៅឲ្យអ៊ុយក្រែន ដោយយល់ថា វានឹងធ្វើឲ្យសង្គ្រាមកាន់តែអូសបន្លាយពេល​កាន់តែ​យូរ​ និងប៉ះពាល់ដល់សន្តិសុខជាតិ​របស់​ប៊ុលហ្គារី។ លោក ថែមទាំងបានហៅមន្ត្រីដែលបញ្ជូនអាវុធទៅឲ្យ​ទីក្រុងកៀវថាណជា «អ្នកបង្កសង្គ្រាម» ទៀតផង។

យោងតាមទីភ្នាក់ងារសារព័ត៌មាន ecfr.eu លោក Radev ធ្លាប់បានបង្កឲ្យមានការភ្ញាក់ផ្អើលយ៉ាងខ្លាំងតាមរយៈការលើកឡើងថា តំបន់គ្រីមៀគឺជាកម្មសិទ្ធិរបស់រុស្ស៊ី (ទោះបីជាក្រោយមកលោកព្យាយាមសម្រាលសម្ដីខ្លះក៏ដោយ)។ លើសពីនេះទៀត លោកបានអំពាវនាវឲ្យមានការសន្ទនាឡើងវិញជាមួយរុស្ស៊ី និងជំរុញឲ្យអឺរ៉ុបងាកមកនាំចូលប្រេង និងហ្គាសពីរុស្ស៊ីវិញ ដើម្បីស្ថិរភាពសេដ្ឋកិច្ច និងថាមពល។

អ្នកវិភាគជាច្រើនចាត់ទុកលោកថាជា «សេះឈើ Trojan Horse» របស់រុស្ស៊ីនៅក្នុងសហភាពអឺរ៉ុប ជំនួសឲ្យលោក Orbán ដែលទើបតែចាញ់ឆ្នោតនៅហុងគ្រី។ លោក Radev ក៏ធ្លាប់បានសរសើរលោក Orbán ថា ជាមេដឹកនាំដែលមានការវាយតម្លៃត្រឹមត្រូវលើស្ថានការណ៍ភូមិសាស្ត្រនយោបាយ។

ទោះបីជាមានជំហរស្រដៀងគ្នាក៏ដោយ ក៏អ្នកជំនាញខ្លះយល់ថា លោក Radev អាចនឹងមិនហ៊ានធ្វើការរារាំងខ្លាំងក្លាដូចលោក Orbán ឡើយ ដោយសារប៊ុលហ្គារីជាប្រទេសក្រីក្រជាងគេ នៅក្នុង EU និងត្រូវការកញ្ចប់ថវិកាជំនួយពីអឺរ៉ុបជាចាំបាច់។ ផ្ទុយទៅវិញ លោកទំនងជានឹងដើរតាមគន្លងរបស់លោក Robert Fico (នាយករដ្ឋមន្ត្រីស្លូវ៉ាគី) គឺរិះគន់ EU ក្នុងស្រុក ប៉ុន្តែមិនប្រើសិទ្ធិវេតូរារាំងការសម្រេចចិត្តធំៗរបស់អឺរ៉ុបឡើយ។

ទោះជាយ៉ាងនេះក្ដី វិមានក្រឹមឡាំងធ្លាប់បានបង្ហាញការពេញចិត្តយ៉ាងខ្លាំងចំពោះជ័យជម្នះរបស់លោក Radev នៅក្នុងការបោះឆ្នោតសភាកាលពីថ្ងៃទី ១៩ ខែមេសា ឆ្នាំ ២០២៦។ អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់ថា រុស្ស៊ីស្វាគមន៍ចំពោះឆន្ទៈរបស់លោក Radev ក្នុងការដោះស្រាយបញ្ហាតាមរយៈការសន្ទនាប្រកបដោយភាពប្រាកដនិយម។

សរុបមក លោក Rumen Radev ពិតជាមានទំនាក់ទំនងល្អជាមួយរុស្ស៊ី និងមានជំហរប្រឆាំងការជួយអ៊ុយក្រែនយ៉ាងខ្លាំង។ ប៉ុន្តែ ឥទ្ធិពលរបស់លោកនៅក្នុង EU នឹងត្រូវរង់ចាំមើលថា តើលោកហ៊ានប្រើសិទ្ធិវេតូរារាំងជំនួយអ៊ុយក្រែនដូចលោក Orbán ធ្លាប់ធ្វើ ឬក៏គ្រាន់តែរិះគន់ដើម្បីយកចិត្តអ្នកបោះឆ្នោតក្នុងស្រុកតែប៉ុណ្ណោះ៕

អត្ថបទ៖ សាង ស្រីល័ក្ខ