ព័ត៌មានអន្ដរជាតិ

អ៊ីស្រាអែលអនុម័តកញ្ចប់ថវិកាដំបូងទិញយន្តហោះ F-៣៥ និង F-១៥ IA ពីអាមេរិក

បានផុស

២ ខែ មុន

នៅ

ថ្ងៃចន្ទ ៤ ឧសភា ២០២៦

ដោយ

អ៊ីស្រាអែលបានអនុម័តផែនការចុងក្រោយក្នុងការទិញយន្តហោះចម្បាំងដ៏ទំនើបរបស់សហរដ្ឋអាមេរិក គឺ ប្រភេទយន្តហោះចម្បាំង F-៣៥ និង F-១៥IA ពីក្រុមហ៊ុន Lockheed Martin និង Boeing ដោយប្រើប្រាស់កញ្ចប់សាច់ប្រាក់ពីផែនការ ១១៩ពាន់លានដុល្លារសម្រាប់រយៈពេល១០ឆ្នាំដើម្បីជំរុញវិស័យការពារជាតិ។ នេះបើយោងតាមក្រសួងការពារជាតិអ៊ីស្រាអែល ដោយស្រង់ដោយទីភ្នាក់ងារព័ត៌មាននានា។

យោងតាមភ្នាក់ងារសារព័ត៌មានរ៉យទ័រ ផ្សាយថ្ងៃទី០៣ ខែឧសភា ឆ្នាំ២០២៦ ក្រសួងការពារជាតិអ៊ីស្រាអែល បានឱ្យដឹងថា កិច្ចព្រមព្រៀងនេះត្រូវបានអនុម័តដោយគណៈកម្មាធិការរដ្ឋមន្ត្រីអ៊ីស្រាអែល ស្តីពីការផ្គត់ផ្គង់ក្នុងវិស័យការពារជាតិ ដែលជាជំហានដំបូងនៅក្នុងផែនការក្នុងវ័យការពារជាតិ១០ឆ្នាំ ដែលមានកញ្ចប់ទឹកប្រាក់ចំនួន ១១៩ ប៊ីលានដុល្លារអាមេរិក ដើម្បីជំរុញវិស័យយោធារបស់អ៊ីស្រាអែលនិងពង្រឹងការត្រៀមខ្លួនមុន១ទសវត្សរ៍ដ៏លំបាកមួយសម្រាប់សន្តិសុខអ៊ីស្រាអែល។

យន្តហោះចម្បាំងរបស់អ៊ីស្រាអែល F-35 ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិអ៊ីស្រាអែល បានបន្ថែមថា កងអនុសេនាធំថ្មីនឹងបម្រើជាមូលដ្ឋានគ្រឹះនៃការអភិវឌ្ឍកម្លាំងរយៈពេលវែងរបស់យោធា ដោយដោះស្រាយការគំរាមកំហែងក្នុងតំបន់និងរក្សាឧត្តមភាពផ្លូវអាកាសជាយុទ្ធសាស្ត្ររបស់អ៊ីស្រាអែល។

លោក Amir Baram អគ្គនាយកក្រសួងការពារជាតិថា៖ « រួមជាមួយនឹងតម្រូវការផ្គត់ផ្គង់បន្ទាន់ក្នុងសម័យសង្គ្រាម យើងមានកាតព្វកិច្ចធ្វើសកម្មភាពឥឡូវនេះ ដើម្បីធានាបាននូវឧត្តមភាពយោធារបស់អ៊ីស្រាអែល (IDF ) ក្នុងរយៈពេល១០ឆ្នាំ ចាប់ពីពេលនេះតទៅ»។

លោកបន្ថែមថា៖ « សង្គ្រាមថ្មីៗនេះជាមួយអ៊ីរ៉ង់បានពង្រឹងភាពសំខាន់នៃទំនាក់ទំនងយុទ្ធសាស្ត្ររវាងសហរដ្ឋអាមេរិកនិងអ៊ីស្រាអែល និងសារៈសំខាន់នៃអំណាចផ្លូវអាកាសទំនើប»។

គួរបញ្ជាក់ថា ក្រោមកិច្ចព្រមព្រៀងនេះ អ៊ីស្រាអែលនឹងទិញកងអនុសេនាធំ មានយន្តហោះចម្បាំង F-៣៥ ទីបួនពីក្រុមហ៊ុន Lockheed Martin និងកងអនុសេនាធំទីពីរនៃយន្តហោះចម្បាំង F-១៥IA ពីក្រុមហ៊ុន Boeing។

កាលពីខែធ្នូ ក្រុមហ៊ុន Boeing ត្រូវបានផ្តល់កិច្ចសន្យាចំនួន ៨.៦ប៊ីលានដុល្លារអាមេរិកសម្រាប់អ៊ីស្រាអែល រួមទាំងយន្តហោះ F-១៥IA ថ្មីចំនួន ២៥គ្រឿង និងជម្រើសសម្រាប់យន្តហោះបន្ថែមទៀតចំនួន២៥គ្រឿង៕

ប្រែសម្រួល៖ ណឺ មិនា