សារធាតុជ្រលក់ពណ៌ និងលោហៈធាតុធ្ងន់ ក្នុង​ផ្លែទុរេន ធ្វើឲ្យខូចតម្រងនោម និងបង្កមហារីក

អ្នកជំនាញផ្នែកសុខភាព និងសុវត្ថិភាពចំណីអាហារ របស់​អង្គការ​សុខភាព​ពិភពលោក បាន​ព្រមាន​អំពីវត្តមានសារធាតុគីមីគ្រោះថ្នាក់ពីរប្រភេទ គឺ Auramine O និង Cadmium ដែលត្រូវបានរកឃើញ នៅក្នុងផ្លែទុរេនមួយចំនួន។ ការប្រើប្រាស់សារធាតុទាំងនេះលើសកម្រិត មិនត្រឹមតែជាការរំលោភច្បាប់សុវត្ថិភាពចំណីអាហារប៉ុណ្ណោះទេ ប៉ុន្តែវាក៏ជាឃាតករលាក់មុខ ដែលកំពុងយាយីសុខភាពអ្នកបរិភោគយ៉ាងធ្ងន់ធ្ងរផងដែរ។

តើអ្វីទៅជា Auramine O និង Cadmium?

Auramine O គឺជាល័ក្ខពណ៌លឿងម្យ៉ាង ដែលគេប្រើប្រាស់ក្នុងឧស្សាហកម្មវាយនភណ្ឌ និងការធ្វើក្រដាស។ ជាអកុសល អាជីវករខិលខូចមួយចំនួន បានយកវាមកជ្រលក់លើសម្បកទុរេន ដើម្បីឲ្យ​ផ្លែឈើនេះមើលទៅមានពណ៌លឿងស្រស់ល្អគួរឲ្យ​ចង់ញ៉ាំ ទោះបីជាវាជិតខូច ឬខ្ចីក៏ដោយ។ ដោយឡែក Cadmium គឺជាលោហៈធាតុធ្ងន់ ដែលអាចមាននៅក្នុងដី ឬជីកសិកម្ម ហើយវាអាចជ្រាបចូលទៅក្នុងសាច់ទុរេន តាមរយៈការស្រូបយករបស់ដើមទុរេន។

ហានិភ័យសុខភាពគួរឲ្យ​ព្រួយបារម្ភ

យោងតាមការចុះផ្សាយរបស់ទីភ្នាក់ងារសុវត្ថិភាពចំណីអាហារ និងការសិក្សាវេជ្ជសាស្ត្រ ការបរិភោគទុរេន ដែលមានផ្ទុកសារធាតុទាំងនេះក្នុងរយៈពេលវែង អាចបណ្តាលឲ្យ​មានផលវិបាក ដូចជា៖

ជំងឺមហារីក៖ សារធាតុ Auramine O ត្រូវបានគេចាត់ទុកថាជាភ្នាក់ងារបង្កមហារីក ដែលអាចធ្វើឲ្យ​ខូចកោសិកាក្នុងរាងកាយ។

បញ្ហាតម្រងនោម៖ លោហៈធាតុ Cadmium គឺជាសត្រូវសាហាវបំផុត សម្រាប់តម្រងនោម។ វាអាចកកកុញក្នុងសរីរាង្គនេះ និងធ្វើឲ្យ​តម្រងនោមចុះខ្សោយរហូតដល់ខូចទាំងស្រុង។

ជំងឺឆ្អឹង៖ ការមានជាតិ Cadmium ក្នុងខ្លួនច្រើនពេក ធ្វើឲ្យ​ឆ្អឹងស្ពោត ងាយបាក់ និងបង្កជាការឈឺចាប់រ៉ាំរ៉ៃ ដែលគេស្គាល់ថាជាជំងឺ «Itai-Itai»។

ការណែនាំ សម្រាប់អ្នកបរិភោគ

អ្នកជំនាញ បានផ្តល់អនុសាសន៍ថា មុននឹងសម្រេចចិត្តទិញទុរេនមកបរិភោគ អ្នកប្រើប្រាស់គួរពិនិត្យមើលឲ្យ​បានច្បាស់។ ប្រសិនបើសម្បកទុរេនមានពណ៌លឿងខុសធម្មតា ឬមានស្នាមជ្រលក់ពណ៌នៅតាមបន្លា និងទង គួរតែចៀសវាងជាដាច់ខាត។ ការជ្រើសរើសទិញពីប្រភពដែលជឿទុកចិត្ត ឬមានការបញ្ជាក់ត្រឹមត្រូវពីអាជ្ញាធរ គឺជាជម្រើសដ៏ល្អបំផុត ដើម្បីការពារសុវត្ថិភាពគ្រួសារលោកអ្នក៕

អត្តបទ៖ ឈាង