ចិន ចាប់ខ្លួនជនជាតិ​អាមេរិកម្នាក់ សង្ស័យពីបទចារកម្ម

ក្រសួងការបរទេសចិន នាថ្ងៃសុក្រ ទី​១២ ខែ​មិថុនា នេះ បានចេញមុខបញ្ជាក់ជាផ្លូវការអំពីការចាប់ខ្លួនលោក Min Zin ដែលជាពលរដ្ឋអាមេរិក និងជាប្រធានស្ថាប័នស្រាវជ្រាវមួយ ផ្តោតលើកិច្ចការប្រទេសមីយ៉ាន់ម៉ា ដោយចោទប្រកាន់ថា លោកមានការសង្ស័យពីបទលបការណ៍សម្ងាត់ ឬធ្វើសកម្មភាព​គំរាមកំហែងដល់សន្តិសុខជាតិរបស់ចិន។

នៅក្នុងសន្និសីទសារព័ត៌មាន លោក Lin Jian អ្នកនាំពាក្យក្រសួងការបរទេសចិន បានថ្លែងថា អាជ្ញាធរ​ពាក់ព័ន្ធ បានឃាត់ខ្លួនលោក Min Zin ទៅតាមផ្លូវច្បាប់ ក្រោមការសង្ស័យថាបានចូលរួមក្នុងសកម្មភាព​ចារកម្ម ដែលប៉ះពាល់ដល់សន្តិសុខជាតិចិន។ លោកបានបន្ថែមថា ភាគីចិនក៏បានជូនដំណឹងអំពីការចាប់ខ្លួននេះ ទៅកាន់ស្ថានកុងស៊ុលធំរបស់សហរដ្ឋអាមេរិក នៅក្នុងទីក្រុងក្វាងចូវ ភាគខាងត្បូងប្រទេសចិន រួចរាល់ហើយដែរ។ តាមប្រភពព័ត៌មានស្និទ្ធនឹងរឿងរ៉ាវនេះ បានបង្ហើបថា លោក Min Zin ដែលជានាយកប្រតិបត្តិនៃវិទ្យាស្ថានយុទ្ធសាស្ត្រ និងគោលនយោបាយមីយ៉ាន់ម៉ា (ISP-Myanmar) ត្រូវបានសមត្ថកិច្ចឃាត់ខ្លួនភ្លាមៗ នៅឯព្រលានយន្តហោះក្នុងទីក្រុងគុនមីង ភាគនិរតីនៃប្រទេសចិន កាលពីពីរសប្ដាហ៍មុន បន្ទាប់ពីលោកបានហោះហើរទៅ​ដល់ទីនោះ។

ការចាប់ខ្លួនពលរដ្ឋអាមេរិករូបនេះ បានកើតឡើងចំពេលដែលសហរដ្ឋអាមេរិក និងចិន កំពុងតែព្យាយាមសម្របសម្រួល ដើម្បីរក្សាស្ថិរភាពនៃទំនាក់ទំនងទ្វេភាគីដែលកំពុងតែល្អក់កករ ក្រោយដំណើរទស្សនកិច្ចរបស់ប្រធានាធិបតីអាមេរិក លោក ដូណាល់ ត្រាំ ទៅកាន់ទីក្រុងប៉េកាំង កាលពីខែមុន។

បើក្រឡេកទៅមើលប្រវត្តិរបស់លោក Min Zin វិញ លោកគឺជាអតីតនិស្សិតសកម្មជនម្នាក់ ដែលធ្លាប់បានចូលរួមក្នុងចលនាទាមទារប្រជាធិបតេយ្យនៅមីយ៉ាន់ម៉ា កាលពីឆ្នាំ១៩៨៨ ហើយក្រោយមកលោកបានបញ្ចប់ការសិក្សាផ្នែកវិទ្យាសាស្ត្រនយោបាយ នៅសាកលវិទ្យាល័យកាលីហ្វ័រញ៉ា នៃ​ទីក្រុង Berkeley ក្នុងសហរដ្ឋអាមេរិក។ លោកក៏ជាស្ថាបនិកម្នាក់ ក្នុងការបង្កើតវិទ្យាស្ថាន ISP នេះឡើង ដែលដំបូងឡើយមានមូលដ្ឋាននៅក្នុងប្រទេសមីយ៉ាន់ម៉ា ប៉ុន្តែត្រូវបានបង្ខំចិត្តរើចេញទៅក្រៅប្រទេស ក្រោយព្រឹត្តិការណ៍រដ្ឋប្រហារយោធាឆ្នាំ២០២១ ដែលកងទ័ពបានទម្លាក់រដ្ឋាភិបាលជាប់ឆ្នោតតាមបែបប្រជាធិបតេយ្យរបស់លោកស្រី អ៊ុងសាន ស៊ូជី។

វិបត្តិនោះ បានរុញច្រានមីយ៉ាន់ម៉ាឱ្យធ្លាក់ក្នុងសង្គ្រាមស៊ីវិលដ៏រ៉ាំរ៉ៃរវាងក្រុមយោធា និងក្រុមប្រដាប់អាវុធគាំទ្រប្រជាធិបតេយ្យ រួមទាំងក្រុមប្រដាប់អាវុធជនជាតិភាគតិច ដែលជាប្រធានបទក្តៅ តែងតែត្រូវបានតាមដានយ៉ាងយកចិត្តទុកដាក់ពីសំណាក់វិទ្យាស្ថានរបស់លោក Min Zin។ ការចេញផ្សាយចុងក្រោយបង្អស់របស់វិទ្យាស្ថាននេះ គឺផ្ដោតខ្លាំងទៅលើការផ្លាស់ប្ដូរនយោបាយនៅមីយ៉ាន់ម៉ា បន្ទាប់ពីមេដឹកនាំរបបសឹក លោក មីន អ៊ុងឡាំង (Min Aung Hlaing) បានឡើងកាន់តំណែងជាប្រធានាធិបតី តាមរយៈការបោះឆ្នោតមួយដែលរៀបចំឡើងដោយកងទ័ព ព្រមទាំងការដួលរលំនៃសេដ្ឋកិច្ចជាតិ។ អ្វីដែលគួរឱ្យកត់សម្គាល់នោះ គឺប្រទេសចិនបានចេញមុខគាំទ្រជាសាធារណៈដល់រដ្ឋាភិបាលថ្មីរបស់មីយ៉ាន់ម៉ា ទោះបីជាការបោះឆ្នោតនោះ រងការរិះគន់យ៉ាងចាស់ដៃពីអន្តរជាតិ ដោយសារតែការផាត់ចេញនូវក្រុមប្រឆាំងធំៗ រួមទាំងគណបក្សរបស់លោកស្រី ស៊ូជី ផងដែរ៕

ប្រែសម្រួល៖ ឈាង