អ៊ីរ៉ង់ ចេញ​មុខបដិសេធការ​លើក​ឡើងរបស់ ត្រាំ ដែល​ថា កិច្ចព្រមព្រៀងជិត​បាន​សម្រេច​ហើយ

រឿងរ៉ាវចរចាដ៏តានតឹងរវាងប្រទេសអ៊ីរ៉ង់ និងសហរដ្ឋអាមេរិក នៅតែបន្តស្ថិតក្នុងភាពមិនច្បាស់លាស់នៅឡើយ បន្ទាប់ពីមន្ត្រីជាន់ខ្ពស់របស់អ៊ីរ៉ង់ បានចេញមុខអះអាងថា ខ្លួនមិនទាន់បានសម្រេចចិត្តចុងក្រោយណាមួយទៅលើកិច្ចព្រមព្រៀង ដែលអាចកើតមានជាមួយភាគីអាមេរិកនោះទេ។

អ្វីដែលកាន់តែសំខាន់ជាងនេះទៅទៀតនោះ គឺអ៊ីរ៉ង់បានប្ដេជ្ញាចិត្តយ៉ាងដាច់អហង្ការថា ខ្លួននឹងមិនព្រមលះបង់ ឬបន្ទន់ឥរិយាបថចំពោះ «ខ្សែបន្ទាត់ក្រហម» ឬលក្ខខណ្ឌស្នូលដ៏តឹងរ៉ឹងរបស់ខ្លួនជាដាច់ខាត នៅក្នុងការចរចានេះ។

ជុំវិញបញ្ហានេះ លោក Esmaeil Baghaei ដែលជាអ្នកនាំពាក្យក្រសួងការបរទេសអ៊ីរ៉ង់ បានប្រាប់ភ្នាក់ងារសារព័ត៌មានផ្លូវការ IRNA របស់អ៊ីរ៉ង់ កាលពីថ្ងៃព្រហស្បតិ៍ ​​ទី​១១ ខែ​មិថុនា ឆ្នាំ​២០២៦ ថា រាល់ព័ត៌មានទាំងឡាយ ដែលបានចុះផ្សាយតៗគ្នាអំពីពេលវេលា និងទីកន្លែង សម្រាប់ចុះហត្ថលេខាលើកិច្ចព្រមព្រៀងនោះ គ្រាន់តែជាការស្មាន និងជាពាក្យចចាមអារ៉ាមតែប៉ុណ្ណោះ ព្រោះរហូតមកទល់ពេលនេះ គ្មានអ្វីដែលត្រូវបានកំណត់ជាផ្លូវការ ឬសម្រេចរួចរាល់នៅឡើយទេ។

លោកបានពន្យល់បន្ថែមថា ទោះបីជាសេចក្ដីព្រាងនៃអត្ថបទចរចាភាគច្រើន ត្រូវបានភាគីទាំងសងខាងព្រមព្រៀងគ្នាជិតចប់សព្វគ្រប់ទៅហើយក្ដី ប៉ុន្តែដំណើរការនេះ ត្រូវជួបឧបសគ្គម្ដងហើយម្ដងទៀត។ មូលហេតុចម្បង គឺដោយសារតែភាគីសហរដ្ឋអាមេរិក តែងតែផ្លាស់ប្ដូរជំហរ និងលក្ខខណ្ឌរបស់ខ្លួនជាញឹកញាប់ នៅក្នុងអំឡុងពេលពិភាក្សា ដែលធ្វើឱ្យកិច្ចព្រមព្រៀងចុងក្រោយ នៅតែមិនទាន់អាចលេចចេញជារូបរាងឡើងបាន។

ការចេញមុខបដិសេធរបស់អ៊ីរ៉ង់នេះ បានធ្វើឡើងបន្ទាប់ពីលោក ដូណាល់ ត្រាំ បានបង្ហោះសារ​លើបណ្ដាញសង្គម Truth Social គំរាមវាយប្រហារយ៉ាងចាស់ដៃ និងចូលគ្រប់គ្រងកោះ Kharg របស់អ៊ីរ៉ង់ តែភ្លាមៗនោះក៏បានលុបចោលគម្រោងវិញ ដោយអះអាងថា កិច្ចព្រមព្រៀងសន្តិភាព ជិតឈានដល់ការចុះហត្ថលេខាលើអនុស្សរណៈ (MOU) នាចុងសប្ដាហ៍នេះទៅហើយ៕

ប្រែសម្រួល៖ ឈាង