ព័ត៌មានអន្ដរជាតិ

របាយការណ៍មួយរកឃើញ មីស៊ីលរបស់ចិន មានសមត្ថភាពវាយប្រហារដល់អូស្រ្តាលីដោយផ្ទាល់

បានផុស

២៦ វិនាទី មុន

នៅ

ថ្ងៃចន្ទ ១៥ មិថុនា ២០២៦

ដោយ

មីស៊ីលរបស់ប្រទេសចិនមានសមត្ថភាពអាចវាយប្រហារដោយផ្ទាល់ទៅដល់អូស្ត្រាលី ហើយការគំរាមកំហែងនេះ កំពុងកើនឡើង ខណៈទីក្រុងប៉េកាំងកំពុងប្រមូលផ្តុំអាវុធរយៈចម្ងាយឆ្ងាយ និងអាវុធល្បឿនលឿនជាងសំឡេង ព្រមទាំងសាងសង់កោះសិប្បនិម្មិតនៅសមុទ្រចិនខាងត្បូង។ នេះបើយោងតាមរបាយការណ៍របស់វិទ្យាស្ថាន Lowy Institute ប្រទេសអូស្រ្តាលី និងចុះផ្សាយដោយសារព័ត៌មាន The Japan Times នៅថ្ងៃទី១៤ ខែមិថុនា ឆ្នាំ២០២៦ ។

វិទ្យាស្ថាន បានរកឃើញថា ការគំរាមកំហែងចម្បង ចំពោះអូស្ត្រាលីគឺនឹងមកពីមីស៊ីលរបស់ចិនបាញ់ចេញពីកប៉ាល់ នាវាមុជទឹក និងមីស៊ីលផ្លោងរយៈចម្ងាយមធ្យមថ្មីមួយ ដែលអាចហោះទៅដល់ទ្វីបនៃកោះនេះ ពីប្រទេសចិន។

មីស៊ីលបាលីស្ទិក DF-21D របស់ចិន។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិអាមេរិកធ្លាប់បានលើកឡើងកាលពីខែធ្នូ ថា សមត្ថភាពរបស់ចិនក្នុងការវាយប្រហារលើអូស្ត្រាលីនឹងកើនឡើងក្នុងរយៈពេលមួយទសវត្សរ៍ខាងមុខ ដោយសារតែចំនួនកងទ័ពរបស់ចិនកំពុងកើនឡើង។

យោធាអាមេរិកនិយាយកាលពីខែធ្នូ ថា មីស៊ីល DF-27 របស់ចិន មានចម្ងាយបាញ់ពី៥ ០០០ ទៅ ៨ ០០០គីឡូម៉ែត្រ។ ក្នុងរបាយការណ៍ដោយវិទ្យាស្ថានបន្តទៀតថា ការគំរាមកំហែងផ្នែកយោធាដោយផ្ទាល់របស់ចិនបង្កឡើងចំពោះអូស្ត្រាលី តែសាធារណជនមិនបានយល់ច្បាស់ទេ។

លោក Sam Roggeveen នាយកកម្មវិធីសន្តិសុខអន្តរជាតិរបស់វិទ្យាស្ថាន Lowy និយាយថា៖ « ការរកឃើញនេះមិនមែនជារឿងយោធានិយម ឬនយោបាយប្រជាធិបតេយ្យទេ ហើយក៏មិនមែនជារឿងភ័យស្លន់ស្លោ ឬមិនខ្វល់ខ្វាយអ្វីដែរ។ ខ្ញុំគិតថាការរីកចម្រើននៃកងទ័ពរំដោះប្រជាជនគឺជារឿងសំខាន់បំផុត ចំពោះសន្តិសុខអូស្ត្រាលីចាប់តាំងពីការដួលរលំនៃសហភាពសូវៀត ហើយវាជាតម្រូវការបន្ទាន់សម្រាប់ការពិភាក្សារបស់អូស្ត្រាលីសម្រាប់ទទួលព័ត៌មានកាន់តែច្រើនអំពីរឿងនេះ»។

គួរបញ្ជាក់ថា ប្រទេសអូស្ត្រាលីបានផ្លាស់ប្តូរយុទ្ធសាស្ត្រយោធារបស់ខ្លួនកាលពីបីឆ្នាំមុន ដើម្បីឆ្លើយតបទៅនឹងការកសាងកងទ័ពជើងទឹកយ៉ាងឆាប់រហ័សរបស់ចិន។

យ៉ាងណា រដ្ឋាភិបាលរបស់នាយករដ្ឋមន្ត្រី លោក Anthony Albanese បង្ហាញពីភាពស្ទាក់ស្ទើរក្នុងការនិយាយពីសក្តានុពល នៃការវាយប្រហាររបស់ចិនដោយផ្ទាល់លើដីគោកអូស្ត្រាលី។

ហើយសមត្ថភាពរបស់ប្រទេសចិនអាចកាត់ផ្តាច់ខ្សែទំនាក់ទំនងក្រោមសមុទ្រ ការវាយប្រហារតាមអ៊ីនធឺណិត និងការរារាំងពាណិជ្ជកម្មតាមសមុទ្រ ជាហានិភ័យមួយកម្រិតសម្រាប់ប្រទេសអូស្ត្រាលី។ របាយការណ៍សង្កត់ធ្ងន់ថា៖ « ការគំរាមកំហែងវាយប្រហារដោយផ្ទាល់គឺជាការពិត និងកំពុងកើនឡើង»។

ដោយឡែក មីស៊ីលផ្លោងរយៈចម្ងាយមធ្យម Dong Feng-26 អាចហោះទៅដល់ភាគខាងជើងអូស្ត្រាលី ប្រសិនបើដាក់ពង្រាយពីកោះមួយក្នុងចំណោមកោះសាងសង់ដោយសិប្បនិម្មិតរបស់ទីក្រុងប៉េកាំងនៅសមុទ្រចិនខាងត្បូង។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិន។

មិនតែប៉ុណ្ណោះ ការគំរាមកំហែងដល់អូស្ត្រាលីនឹងកើនឡើងយ៉ាងខ្លាំង ប្រសិនបើចិនដាក់ពង្រាយយន្តហោះទម្លាក់គ្រាប់បែករយៈចម្ងាយឆ្ងាយ ដ្រូន ឬដាក់ពង្រាយយន្តហោះទម្លាក់គ្រាប់បែក និងមីស៊ីល នៅលើកោះប៉ាស៊ីហ្វិកនៅជិតអូស្ត្រាលី៕

សម្រួល៖ ណឺ មិនា