នាយក IAEA ព្រមលូកដៃចូលរួមចំណែក ក្រោយ ត្រាំ ថា កិច្ចព្រមព្រៀងជាមួយ អ៊ីរ៉ង់ ជិតរួចរាល់

អគ្គនាយកនៃទីភ្នាក់ងារថាមពលបរមាណូអន្តរជាតិ (IAEA) នៅថ្ងៃទី១៤ ខែមិថុនា បានប្រកាសថា ស្ថាប័នរបស់លោកបានត្រៀមខ្លួនរួចជាស្រេច ក្នុងការចុះទៅផ្ទៀងផ្ទាត់ និងត្រួតពិនិត្យរាល់កិច្ចព្រមព្រៀងនុយក្លេអ៊ែរណាមួយរវាងសហរដ្ឋអាមេរិក និងអ៊ីរ៉ង់ ខណៈដែលកិច្ចព្រមព្រៀងរបស់​ពួកគេ​កំពុងឈានចូលដល់ដំណាក់កាលចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយរបស់​សារព័ត៌មាន KJD ការប្រកាសរបស់ទីភ្នាក់ងារ IAEA បានធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានបង្ហើបកាលពីថ្ងៃព្រហស្បតិ៍ទី១១ ខែមិថុនា ថា កិច្ចព្រមព្រៀង​សន្តិភាពជាមួយអ៊ីរ៉ង់គឺមាន «ទម្រង់ជិតរួចរាល់ជាស្ថាពរហើយ» ហើយអាចនឹងត្រូវចុះហត្ថលេខានៅក្នុង​តំបន់អឺរ៉ុបក្នុងសប្តាហ៍នេះ ដោយលោក បានឲ្យ​ដឹងថា មេដឹកនាំកំពូលរបស់អ៊ីរ៉ង់ក៏បានអនុម័តលើកិច្ចព្រមព្រៀងនេះដែរ។

លោក Rafael Grossi អគ្គនាយកទីភ្នាក់ងារ IAEA បានថ្លែងទៅកាន់ក្រុមអ្នកយកព័ត៌មានថា «អ្វីដែលសំខាន់បំផុតសម្រាប់ទីភ្នាក់ងារយើង គឺការផ្ទៀងផ្ទាត់ ហើយការដែលយើងនឹងក្លាយជាផ្នែកមួយនៃដំណោះស្រាយ គឺជាទម្រង់ផ្លូវការដ៏សំខាន់បំផុតមួយដែលត្រូវតែមាន។ ជាពិសេសនោះ នៅពេលដែលពួកគេព្រមព្រៀងគ្នាលើចំណុចណាមួយ ហើយស្នើឲ្យយើងធ្វើការផ្ទៀងផ្ទាត់ ខ្ញុំត្រូវតែដាក់រឿងនេះទៅកាន់ក្រុមប្រឹក្សាភិបាលរបស់ខ្ញុំ ដើម្បីស្នើសុំការអនុញ្ញាតក្នុងការបំពេញភារកិច្ចនោះ»។

លោក Grossi ក៏បានបង្ហើបទៀតថា កិច្ចព្រមព្រៀងណាមួយដែលនឹងលេចចេញរូបរាងឡើង ពោលគឺទាមទារឲ្យមានវិធានការត្រួតពិនិត្យឲ្យបានគ្រប់ជ្រុងជ្រោយ ហើយយើងនឹងត្រូវពិនិត្យមើលអ្វីៗទាំងអស់ដែលមាននៅក្នុងនោះ។

យ៉ាងណាមិញ នៅក្នុងឱកាសនោះផងដែរ លោក Grossi ក៏បានលើកឡើងពីនិន្នាការដែលបណ្តាប្រទេសជាច្រើនកំពុងពិចារណាឡើងវិញលើការប្រើប្រាស់ថាមពលនុយក្លេអ៊ែរ ដើម្បីទទួលបានប្រភពថាមពលដែលអាចទុកចិត្តបាន និងមានកាបូនទាប ដោយលោកបានស្រង់សម្តីរបស់ប្រធានគណៈកម្មការអឺរ៉ុប លោកស្រី Ursula von der Leyen ដែលបានចាត់ទុកការដើរចេញពីថាមពលនុយក្លេអ៊ែររបស់អឺរ៉ុបកាលពីពេលមុនថាជា «កំហុសយុទ្ធសាស្ត្រ»៕

អត្ថបទ ៖ សាង ស្រីល័ក្ខ