ព័ត៌មានអន្ដរជាតិ

ប្រមុខណាតូ៖ ទោះបី សង្រ្គាមអ៊ុយក្រែនចប់ ក៏រុស្ស៊ីនៅតែជាការគំរាមកំហែងដល់អឺរ៉ុប

បានផុស

៩ វិនាទី មុន

នៅ

ថ្ងៃព្រហស្បតិ៍ ២ កក្កដា ២០២៦

ដោយ

អគ្គលេខាធិការអង្គការណាតូ (NATO) លោក Mark Rutte បានព្រមាននៅថ្ងៃពុធថា ប្រទេសរុស្ស៊ីនឹងនៅបន្តគំរាមកំហែងរយៈពេលវែងដល់សន្តិសុខអឺរ៉ុបនៅតំបន់មហាសមុទ្រអាត្លង់ទិក បើទោះបីជាការបញ្ចប់សង្គ្រាមប្រឆាំងនឹងអ៊ុយក្រែនក៏ដោយ។

ថ្លែងក្នុងសន្និសីទសារព័ត៌មានរួមគ្នាមួយនិងចុះផ្សាយដោយទីភ្នាក់ងារសារព័ត៌មាន Anadolu នៅថ្ងៃទី០១ ខែកក្តដា ឆ្នាំ២០២៦ នៅទីក្រុងប៊ែរឡាំងជាមួយអធិការបតីអាល្លឺម៉ង់ លោក Rutte បានជំរុញឱ្យសម្ព័ន្ធមិត្តរក្សាសម្ពាធលើទីក្រុងមូស្គូ បង្កើនល្បឿនលើវិស័យការពារជាតិ និងវិនិយោគបន្ថែមទៀតលើឧស្សាហកម្មការពារជាតិ។

អគ្គលេខាធិការអង្គការណាតូ លោក Mark Rutte ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Rutte ប្រាប់អ្នកយកព័ត៌មានថា៖ « យើងត្រូវតែរក្សាសម្ពាធលើរុស្ស៊ី។ សូម្បីតែពេលសង្គ្រាមរបស់ពួកគេប្រឆាំងនឹងអ៊ុយក្រែនបញ្ចប់ក៏ដោយ រុស្ស៊ីនឹងនៅតែជាការគំរាមកំហែងរយៈពេលវែងដល់សន្តិសុខអឺរ៉ុប-អាត្លង់ទិក! បរិយាកាសសន្តិសុខអន្តរជាតិកាន់តែមានភាពប្រែប្រួល និងស្មុគស្មាញ»។

លោកក៏បានថ្លែងអំណរគុណដល់ប្រទេសអាល្លឺម៉ង់ ចំពោះការគាំទ្រផ្នែកហិរញ្ញវត្ថុ និងយោធាដ៏រឹងមាំចំពោះអ៊ុយក្រែន ហើយលើកឡើងថា កិច្ចប្រជុំកំពូលណាតូសប្តាហ៍ក្រោយ នៅទីក្រុងអង់ការ៉ានឹងផ្តល់ឱកាសដល់សម្ព័ន្ធមិត្ត និងដៃគូដើម្បីពិភាក្សាអំពីជំនួយសន្តិសុខប្រកបដោយចីរភាព អាចព្យាករណ៍បាន និងយូរអង្វែងសម្រាប់អ៊ុយក្រែន។

លោក Rutte បានគូសបញ្ជាក់ថា ប្រទេសនៅអឺរ៉ុប ក៏កំពុងផ្តល់ការគាំទ្រយ៉ាងច្រើនដល់ទីក្រុងកៀវ ប៉ុន្តែការគាំទ្រជាបន្តបន្ទាប់របស់សហរដ្ឋអាមេរិកគឺជាគន្លឹះក្នុងការរក្សាសមត្ថភាពការពារជាតិរបស់អ៊ុយក្រែន។

លោក Rutte បន្ថែមថា៖ « ពេលនិយាយអំពីការការពារអ៊ុយក្រែន សហរដ្ឋអាមេរិកនៅតែមិនអាចខ្វះបាន។ លំហូរនៃការគាំទ្រសំខាន់ៗពីអាមេរិកចូលទៅក្នុងប្រទេសអ៊ុយក្រែននៅតែបន្ត ជាពិសេសសារៈសំខាន់នៃប្រព័ន្ធការពារដែនអាកាស Patriot ក្នុងការការពារហេដ្ឋារចនាសម្ព័ន្ធសំខាន់ៗរបស់អ៊ុយក្រែន និងហេដ្ឋារចនាសម្ព័ន្ធថាមពល និងផ្នែកខាងក្នុងរបស់ទីក្រុង»។

លោកបន្តថា៖ « មានតែសហរដ្ឋអាមេរិកទេដែលអាចធ្វើបែបនេះទ្រង់ទ្រាយធំ ហើយទីក្រុងវ៉ាស៊ីនតោននៅតែធ្វើគាំទ្រ និងជួយតាមវិធីជាច្រើនទៀត មិនមែនត្រឹមតែបង្ហាញក្នុងសន្និសីទសារព័ត៌មាននោះទេ»៕

សម្រួល៖ ណឺ មិនា