រដ្ឋាភិបាលជប៉ុន​ នឹង​បង្កើត​ទី​ភ្នាក់​ងារ​ចារកម្ម​កណ្តាល​លើក​​ដំបូង​ ចាប់​តាំង​ពី​សង្រ្គាម​លោកលើក​ទី​២

កា​សែត The New York Times បាន​រាយការណ៍នៅ​ថ្ងៃ​ទី​១៣ ខែ​កក្ក​ដា ថា ប្រទេស​ជប៉ុន​កំពុង​បង្កើត​ទីភ្នាក់​ងារ​ចារ​កម្ម​កណ្តាល​ដំបូង​របស់​ខ្លួន​ ចាប់តាំង​ពី​សង្គ្រាម​លោកលើកទី២ ដោយមាន​ជំនួយពីសម្ព័ន្ធមិត្តលោក​ខាងលិច ចំពេល​មាន​ភាព​តានតឹង​​​​ក្នុង​ភូមិសាស្រ្ត​​​​សកលលោក ​​ដោយសារ​តែ​​អរិភាព​​​ជាមួយ​​ប្រទេស​រុស្ស៊ី កូរ៉េខាងជើង និងចិន​។

កាសែត Newsmax ក៏បាន​រាយការណ៍កាលពីខែមិថុនា​ អំពីផែនការសម្រាប់​ទីភ្នាក់ងារនេះផងដែរ។

ទីភ្នាក់​ងារ​ចារកម្ម​ជាតិ(NIA) នឹង​បម្រើ​ជាមជ្ឈមណ្ឌលបញ្ជាការកណ្តាល ដោយ​សំយោគព័ត៌មានពីក្រសួង​ជាច្រើន។

ទី​ភ្នាក់​ងារ​នេះ នឹងត្រូវបានត្រួតពិនិត្យដោយ​ក្រុមប្រឹក្សាស៊ើប​ការណ៍​សម្ងាត់ជាតិ ដែល​មាននាយករដ្ឋ​មន្ត្រីជប៉ុន​ គឺ លោក​ស្រី​ Sanae Takaichi ជាប្រធាន ដើម្បី​ពង្រឹងកិច្ចខិតខំប្រឹងប្រែង​ប្រឆាំង​ចារកម្ម​និងឥទ្ធិពលបរទេស។

លោកស្រី Takaichi ជាអ្នកអភិរក្ស​និយមដ៏តឹងរ៉ឹង បាន​ក្លាយជានាយករដ្ឋមន្ត្រីស្ត្រីដំបូង​គេរបស់ប្រទេសជប៉ុនកាល​ពីឆ្នាំមុន។ រដ្ឋបាលរបស់​លោកស្រី​ កាលពីខែមីនា បានអនុម័ត​សេចក្តីព្រាងច្បាប់មួយ ដើម្បីធ្វើ​ឱ្យការិយាល័យស៊ើបការណ៍សម្ងាត់ និងស្រាវជ្រាវរបស់​គណៈរដ្ឋមន្ត្រី (CIRO) មាន​ភាព​ប្រសើរឡើង ដើម្បី​ពង្រឹងសមត្ថភាពប្រមូល និង​វិភាគព័ត៌មានសម្ងាត់របស់​ប្រទេសជប៉ុន។​

មន្ត្រី​ស៊ើបការណ៍សម្ងាត់មក​ពីសហរដ្ឋអាមេរិក អូស្ត្រាលី និងអាល្លឺម៉ង់ បាន​ជួយ​ជប៉ុន ​ដើម្បី​ពង្រឹង​សមត្ថភាពប្រទេស​នេះ​​។

មន្ត្រីអាមេរិកបាន​ផ្តល់យោបល់លើការការពារតាម​អ៊ីនធឺណិត ចារកម្មឧស្សាហកម្ម ការពិនិត្យ​អំពីការវិនិយោគបរទេស និងការត្រួតពិនិត្យភ្នាក់ងារបរទេស​ឡើងវិញ​។

មិន​តែ​ប៉ុណ្ណោះ​ប្រទេស​ជប៉ុន​រក្សា​កិច្ចសហប្រតិបត្តិការ​យ៉ាងជិតស្និទ្ធ​​ជាមួយសមភាគី​នៅ​ក្នុងប្រទេសពាក់ព័ន្ធជាប្រចាំ៕

សម្រួល៖ ណឺ មិនា