ជម្លោះ ប៉ាឡេស្ទីន-អ៊ីស្រាអែល មិនយូរមិនឆាប់រាលដាលជាសង្គ្រាមសាសនាថ្មី ក្រោយការវាយប្រហារច្រើនឡើងៗលើទីតាំងសក្ការៈបូជានានា

ទីប្រឹក្សាកិច្ចការសាសនា របស់មេដឹកនាំប៉ាឡេស្ទីន លោក Mahmoud Al-Habbash បាននិយាយថា អាជ្ញាធរប៉ាឡេស្ទីនបានព្រមាន អស់រយៈពេលជាច្រើនឆ្នាំមកហើយ នៃការផ្ទុះឡើងនូវសង្គ្រាមសាសនា ដោយសារ “ការរំលោភបំពានរបស់អ៊ីស្រាអែល ទៅលើទីតាំងដ៏បរិសុទ្ធនៅទីក្រុង Jerusalem ក៏ដូចជាសកម្មភាពជ្រុលនិយម ដោយអ្នកតាំងទីលំនៅជ្វីហ្វ” ។

មន្ត្រីរូបនោះបានកត់សម្គាល់ថា “ប្រសិនបើស្ថានភាពបច្ចុប្បន្ននៅតែដដែល ហើយប្រសិនបើអ៊ីស្រាអែល និងអ្នកតាំងលំនៅថ្មី មិនបញ្ឈប់ការបង្កឲ្យមានអារម្មណ៍ ខាងសាសនារបស់ប៉ាឡេស្ទីន និងមូស្លីមជាទូទៅនោះ ពិភពលោកនឹងប្រឈមមុខនឹងសង្រ្គាមសាសនា ភ្លើងនឹងឆេះចេញពីប្រទេសប៉ាឡេស្ទីន ហើយពិភពលោកទាំងមូលនឹងចំណាយលើវា” ។

លោក Al-Habbash បាននិយាយថា ប្រតិកម្មរបស់ពិភពអារ៉ាប់ និងមូស្លីម ក៏ដូចជាប្រទេសដទៃទៀត ចំពោះការប្រទូសរ៉ាយដែលកំពុងកើតមាន នៅតំបន់ហ្គាហ្សាស្ទ្រីប និងទឹកដីប៉ាឡេស្ទីនដទៃទៀត គឺមិនគ្រប់គ្រាន់នៅឡើយទេ ។

ទន្ទឹមនោះ យោងតាមទីប្រឹក្សាប្រធានាធិបតីបានឲ្យដឹងថា អាជ្ញាធរប៉ាឡេស្ទីន នឹងបន្តកិច្ចខិតខំប្រឹងប្រែង ដើម្បីប្រមូលការគាំទ្រពីអន្តរជាតិទាំងផ្លូវការ និងសាធារណៈ ដើម្បី “ការពារប៉ាឡេស្ទីន និងសិទ្ធិស្របច្បាប់របស់ប្រជាជនរបស់ខ្លួន” ។

លោកបានបន្ថែមថា “នៅក្នុងបរិបទនេះ យើងធ្វើការនៅគ្រប់ទិសដៅ ជាពិសេសចាប់តាំងពីការផ្តោតអារម្មណ៍ នៃបញ្ហាបច្ចុប្បន្នលើទីក្រុង Jerusalem ក៏ដូចជាការវាយប្រហារលើវិហារសាសនា និងទីសក្ការៈបូជានានា ដែលទាក់ទងនឹងពិភពឥស្លាមទាំងមូល” ។

គួរបញ្ជាក់ថា ការប្រយុទ្ធគ្នាដែលកំពុងបន្តនេះ បានធ្វើឲ្យចំនួនអ្នកស្លាប់កើនដល់ ២១៧ នាក់ រួមមានកុមារ ៦៣ នាក់ និងស្ត្រី ៣៦ នាក់នៅតំបន់ហ្គាហ្សា ខណៈមនុស្ស ១២ នាក់ត្រូវបានសម្លាប់ នៅអ៊ីស្រាអែល បន្ទាប់ពីអំពើហិង្សាថ្មីៗនេះបានផ្ទុះឡើងនៅថ្ងៃទី ១០ ឧសភា ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ប៉ាឡេស្ទីន ឲ្យ UN ជួយបញ្ឈប់ឧក្រិដ្ឋកម្មសង្គ្រាមរបស់អ៊ីស្រាអែល មកលើតំបន់ហ្គាហ្សា ដោយអាណិតដល់ក្មេងៗដែលមិនដឹងអី

ចុចអាន ៖ កងទ័ព អ៊ីស្រាអែល បាញ់ទម្លាក់យន្តហោះដ្រូន សង្ស័យជារបស់ប៉ាឡេស្ទីន ក្បែរជ្រលងភ្នំហ្ស៊កដានីនៃតំបន់ West Bank