ហុងកុង នឹងបោះចោលវ៉ាក់សាំងកូវីដរាប់លានដូស ព្រោះមិនសូវមានអ្នកចាក់

មន្ត្រីមួយរូបបានព្រមានកាលពីថ្ងៃអង្គារទី២៥ខែឧសភាថា ទីក្រុងហុងកុង ប្រហែលជាត្រូវបោះបង់ចោលវ៉ាក់សាំងកូវីដ រាប់លានដូស ពីព្រោះថ្នាំបង្ការទាំងនោះជិតផុតកំណត់ ហើយហើយមិនសូវមានអ្នកចុះឈ្មោះចាក់។

ទីក្រុងហុងកុង គឺជាកន្លែងមួយក្នុងចំណោមទីតាំងតិចតួចបំផុតនៅលើពិភពលោក ដែលមានសំណាងទទួលបានវ៉ាក់សាំងច្រើនគ្រប់គ្រាន់ ដើម្បីការពារប្រជាជនចំនួន៧.៥លាននាក់ របស់ខ្លួន។

ប៉ុន្តែការមិនទុកចិត្តលើរដ្ឋាភិបាល បូករួមជាមួយព័ត៌មានក្លែងក្លាយតាមអ៊ីនធើណិត បាននាំឲ្យមានភាពស្ទាក់ស្ទើរចាក់វ៉ាក់សាំងនិង ធ្វើឲ្យយុទ្ធនាការចាក់ថ្នាំបង្ការជួបឧបសគ្គ។

កាលពីថ្ងៃអង្គារ សមាជិកម្នាក់នៃក្រុមការងារទទួលបន្ទុកចាក់ថ្នាំបង្ការរបស់រដ្ឋាភិបាល បានព្រមានថា ប្រជាជនហុងកុង នៅសល់ពេលត្រឹមតែ៣ខែទៀតប៉ុណ្ណោះ មុនពេលវ៉ាក់សាំង Pfizer-BioNTech បាច់ដំបូងរបស់ទីក្រុងនេះ អស់សុពលភាព។

លោក Thomas Tsang អតីតអ្នកត្រួតពិនិត្យមជ្ឈមណ្ឌលការពារសុខភាព បានប្រាប់វិទ្យុ RTHK ថា “វ៉ាក់សាំងទាំងអស់មានកាលបរិច្ឆេទផុតកំណត់។ យោងតាមផែនការបច្ចុប្បន្ន ពួកគេមិនអាចប្រើប្រាស់បានទេ បន្ទាប់ពីកាលបរិច្ឆេទផុតកំណត់ ហើយមជ្ឈមណ្ឌលចាក់ថ្នាំបង្ការសហគមន៍ BioNTech នឹងបញ្ឈប់ដំណើរការបន្ទាប់ពីខែកញ្ញាទៅ”។

លោក Tsang បន្តថា វាមិនត្រឹមត្រូវទេ ដែលហុងកុងកំពុងអង្គុយលើគំនរវ៉ាក់សាំងដែលមិនត្រូវបានប្រើ ខណៈពេលពិភពលោកផ្សេងទៀតកំពុងស្វែងរកការចាក់វ៉ាក់សាំង។

ហុងកុង បានទិញវ៉ាក់សាំង Pfizer-BioNTech និងវ៉ាក់សាំង Sinovac របស់ចិន មួយមុខ ៧.៥លានដូស។

រហូតមកដល់ពេលនេះ មានប្រជាជនត្រឹមតែ១៩ភាគរយប៉ុណ្ណោះ ដែលបានទទួលវ៉ាក់សាំង លើកទីមួយ ខណៈ ១៤ភាគរយ ទទួលបានដូសទី២៕

ប្រែសម្រួល៖ Vann Vann

ប្រភព៖ CNA

ចុចអាន៖ វ៉ាក់សាំង Sputnik V របស់រុស្ស៊ីមានប្រសិទ្ធភាពជិត ១០០ ភាគរយប្រឆាំងកូវីដបំប្លែងខ្លួនប្រេស៊ីល ក្រោយចាក់ពេញ ២ ដូស