រកឃើញមនុស្សស្លាប់ដល់៩៤នាក់ ក្នុងសោកនាដកម្មអគ្គិភ័យនៅ ហុងកុង

អាជ្ញាធរហុងកុងបញ្ជាក់ថា មនុស្សស្លាប់ក្នុងសោកនាដកម្មអគ្គិភ័យដ៏រន្ធត់ឆាបឆេះប្លុកអាផាតមិន បានកើនដល់៩៤នាក់ហើយ​ គិតត្រឹមថ្ងៃសុក្រទី២៨ខែវិច្ឆិកាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Reuters, អគ្គិភ័យនៅតំបន់ Wang Fuk Court ក៏បណ្តាលឲ្យមនុស្សច្រើននាក់ទៀតរងរបួសធ្ងន់ផងដែរ ហើយជិត៣០០នាក់កំពុងបាត់ខ្លួន ខណៈក្រុមសង្គ្រោះព្រមានថា តួលេខមនុស្សស្លាប់នឹងបន្តកើនឡើង។

យ៉ាងណា មកទល់ពេលនេះ មូលហេតុបង្កជាអគ្គិភ័យនៅតែមិនទាន់ដឹងច្បាស់ប៉ុន្តែ បើតាមការសន្និដ្ឋានរបស់ប៉ូលិស, វាអាចបណ្តាលមកពីក្រុមហ៊ុនសំណង់មួយដែលធ្វេសប្រហែសខ្លាំង ក្នុងការប្រើប្រាស់សម្ភារៈគ្មានសុវត្ថិភាព។

អគ្គិភ័យបានឆេះរាលដាលក្នុងល្បឿនលឿនមិនធម្មតា បណ្តាលមកពី សម្ភារសំណង់ដែលងាយឆេះ និង រន្ទាឫស្សី ដែលដាក់ជាប់អគារទាំងនោះសម្រាប់ការជួសជុល។

រដ្ឋាភិបាលបានរកឃើញក្រុមហ៊ុនម៉ៅការដែលចុះបញ្ជីសម្រាប់អគារនេះគឺ Prestige Construction and Engineering Company Limited ប៉ុន្តែក្រុមហ៊ុនមិនបានឆ្លើយតប នឹងការហៅទូរស័ព្ទជាច្រើនលើកដើម្បីសុំការអត្ថាធិប្បាយនោះទេ។

ជុំវិញសោកនាដកម្មនេះដែរ ប៉ូលិសបានចាប់ខ្លួនបុរសបីនាក់មកពីក្រុមហ៊ុនសំណង់រួចទៅហើយ ដោយជាប់សង្ស័យពីបទមនុស្សឃាតដោយអចេតនា។

សូមជម្រាបថា តំបន់ Wang Fuk Court ជាប្លុកមានអាផាតមិនប្រហែល ២ ០០០ ស្ថិតនៅក្បែរៗគ្នា មានមនុស្សស្នាក់នៅជិត ៤ ៨០០នាក់ ភាគច្រើនជាចាស់ៗ អាយុ៦៥ឆ្នាំឡើង៕

អត្ថបទ៖ សុខ សុវណ្ណ