ព័ត៌មានអន្ដរជាតិ

អ្នកស្លាប់កើនដល់៥៥នាក់ ដោយសារអគ្គិភ័យដ៏សាហាវនៅហុងកុង

បានផុស

៦ ខែ មុន

នៅ

ថ្ងៃព្រហស្បតិ៍ ២៧ វិច្ឆិកា ២០២៥

ដោយ

Chheang

តួលេខមនុស្សស្លាប់បានហក់ឡើងដល់៥៥នាក់ និងមានអ្នកបាត់ខ្លួនប្រហែល២៨០នាក់ទៀត ក្នុងសោកនាដកម្មអគ្គិភ័យដ៏សាហាវនៅបរិវេណលំនៅឋាន Wang Fuk Court ក្នុងតំបន់ Tai Po ទីក្រុងហុងកុង ខណៈមនុស្សយ៉ាងហោចណាស់៧១នាក់បានរងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Al Jazeera នៅថ្ងៃព្រហស្បតិ៍ទី២៧ខែវិច្ឆិកាឆ្នាំ២០២៥ ប៉ូលិសបានចាប់ខ្លួននាយកពីរនាក់ និងទីប្រឹក្សាវិស្វកម្មម្នាក់ពីក្រុមហ៊ុន Prestige Construction & Engineering Company ពីបទសម្លាប់មនុស្សដោយអចេតនា ក្រោមការចោទប្រកាន់ថាមាន«ការធ្វេសប្រហែសធ្ងន់ធ្ងរ» ក្នុងអំឡុងពេលការងារជួសជុល។ អ្នកស៊ើបអង្កេតជឿថា សម្ភារៈដែលងាយឆេះខ្លាំង ហើយមិនអនុលោមតាមស្តង់ដារ បានបង្កឲ្យភ្លើងរាលដាលយ៉ាងលឿនឆ្លងកាត់រន្ទាឫស្សី និងសំណាញ់សំណង់ចំពេលមានខ្យល់បក់ខ្លាំង។

អគ្គិភ័យបានចាប់ផ្តើមនៅរសៀលថ្ងៃពុធលើរន្ទាខាងក្រៅអគារមួយកម្ពស់៣២ជាន់ ហើយបានរាលដាលយ៉ាងលឿនទៅអគារ៧ ក្នុងចំណោមអគារ៨នៃបរិវេណលំនៅឋាននោះ។ អ្នកពន្លត់អគ្គិភ័យបានគ្រប់គ្រងស្ថានភាពនៅអគារចំនួន៤គិតត្រឹមថ្ងៃត្រង់ថ្ងៃព្រហស្បតិ៍នេះ ប៉ុន្តែផ្សែងក្រាស់នៅតែបន្តហុយចេញពីបរិវេណអគារលំនៅឋានផ្សេងទៀតដែលជាកន្លែងរបស់ពលរដ្ឋប្រហែល៤៨០០នាក់ស្នាក់នៅ។

ក្រុមអ្នកជួយសង្គ្រោះបានជម្លៀសមនុស្សប្រមាណ៩០០នាក់ ដោយមានមនុស្សចាស់ជាច្រើនក្នុងចំណោមអ្នករងគ្រោះ។ អ្នកនៅរស់រានមានជីវិតខ្លះបានរៀបរាប់ពីការព្យាយាមរត់គេចយ៉ាងភ័យស្លន់ស្លោតាមរយៈច្រករបៀងដែលពោរពេញដោយផ្សែង ខណៈដែលក្រុមគ្រួសារកំពុងរង់ចាំដំណឹងអំពីមនុស្សជាទីស្រលាញ់ដែលនៅតែជាប់ក្នុងអគារ។

មេដឹកនាំហុងកុង លោក John Lee បានបញ្ជាឲ្យមានការត្រួតពិនិត្យសុវត្ថិភាពជាបន្ទាន់នៅគ្រប់បរិវេណលំនៅឋានដែលកំពុងជួសជុល។ ប្រធានាធិបតីចិន លោក ស៊ី ជីនពីង បានសម្តែងការចូលរួមរំលែកទុក្ខ និងអំពាវនាវឲ្យមានកិច្ចខិតខំប្រឹងប្រែងទាំងអស់ដើម្បីកាត់បន្ថយចំនួនអ្នកស្លាប់ និងរបួស។

គ្រោះមហន្តរាយលើកនេះជាអគ្គិភ័យដ៏អាក្រក់បំផុតរបស់ហុងកុងចាប់តាំងពីហេតុការណ៍អគ្គិភ័យឆ្នាំ១៩៩៦ នៅកូវលូន (Kowloon) ដែលបានសម្លាប់មនុស្ស៤១នាក់៕